წმიდა პალადი ჰელენოპოლელი

ლავსაიკონი

13. ყოფილი ვაჭრის - სერაპიონის ამბავი

ნიტრიის მთაზე მოღვაწეობდა კიდევ ერთი მამა, სახელად სერაპიონი, რომელიც აქ მოსვლამდე ვაჭრობას მისდევდა. როცა ის მონასტერში მოვიდა, ისეთ ასაკში იყო, რომ ვეღარ შეძლო რაიმე კეთილ საქმის დაუფლებოდა. ის ვერც წმინდა წერილს კითხულობდა და ვერც ფსალმუნები დაისწავლა. მან ამ მთაზე ოცი წელი გაატარა და ამ ხნის მანძილზე თავისი მონაგებით სნეულებს ეხმარებოდა: ყიდულობდა წამლებს და ყველაფერს, რაც მათ ესაჭიროებოდათ. მამა სერაპიონი განთიადიდან ცხრა საათამდე სენაკებში მიმოდიოდა და დავრდომილებს ეძებდა. მას თან მიჰქონდა ყურძენი, ბროწეული, კვერცხი. ის ყველას აძლევდა იმას, რაც სურდათ.

ასე იღვაწა წმინდა მამამ სიბერემდე. უძლურთა შეწევნით ის თავად ქრისტეს ემსახურებოდა. როცა მისი ამ სოფლიდან განსვლის ჟამი მოახლოვდა, სერაპიონმა თავისი ნივთები ერთ ძმათაგანს გადასცა, რომელსაც სურდა, რომ მისი გზა განეგრძო. მამა სერაპიონმა სთხოვა, მის ნაცვლად მომსახურებოდა ძმებს, რადგან მთაზე ხუთი ათასამდე მოღვაწე იყო და მათ ბევრ რამეში დახმარება და შეწევნა ესაჭიროებოდათ.

წინა თავი სარჩევი შემდეგი თავი