აღშფოთდნენ (1) კორე, ძე ისსარისი, ძისა კაათისი, ძისა ლევისი, დათან და აბირონ, ძენი ელიაბისნი, და აჯან, ძე ფალეკისი, ძისა რუბენისი, ავნან, ძე ფალეთისი, ძისა რუბენისი. აღშფოთდნენ აარონის წინააღმდეგ იმ განზრახვით, რომ ან მღვდლობა წაერთვათ, ან მასთან ერთად კარავში ემსახურათ. მაგრამ მანამადე, როცა ეგვიპტეში აგურებს ამზადებდნენ, ეს არ მოუნდომებიათ; არც მაშინ, როცა მათ იქ სცემდნენ; არც ცოტა მოგვიანებით მოუთხოვიათ ეს, როცა ზღვა იყო გაპობილი და ებრაელები ხმელეთით გადადიოდნენ, ეგვიპტელები კი წყალში იძირებოდნენ, რადგან სასჯელისა და სამსჯავროს შიში ჰქონდათ. კორე და სხვები, ვინც აარონის წინააღმდეგ გამოვიდნენ და მისი მღვდლობის მიღება მოისურვეს, სულიერი ხედვით იმ მღვდელთმთავრებს წარმოადგენენ, რომლებიც ჩვენი უფლის წინააღმდეგ ილაშქრებდნენ და, მსგავსად იგავში ხსენებული ვენახისა, მისი სამემკვიდრეოს ხელში ჩაგდებას ესწრაფოდნენ.

(32) განსთქდა ქუეყანა ქუეშე მათსა. ასე მოეწიათ ღვთის სასჯელი და ქვესკნელში ჩაცვივდა ყველა, ვინც ეგვიპტურ სიამეებს მისტიროდა და ბოროტებით სავსე ეგვიპტე შეადარა რა წმინდა სამღვდელოებას, იმ სიამეთა ნაცვლად მღვდლობა მოინდომა.

(37-38) აღკრიბეთ საცეცხლურები ეგე რვალისა შორის დამწუართა მაგათ და ცეცხლი ესე უცხოი მიაბნიე მუნ, რამეთუ განწმიდნეს საცეცხლურები ესე ამათ ცოდვილთანი სულითა მათითა და შექმნენ ეგენი პეპელად ჭედილად გარემო სადებელად საკურთხეველისა. თუკი ღვთის განმარისხებელთა საცეცხლურები განიწმიდნეს ამათ ცოდვილთანი სულითა და საკურთხევლის მოწყობაზე გამოიყენეს, მაშინ მით უფრო განიწმინდება აღმსარებელთა სხეულები მათი სულით.

წინა - სარჩევი - შემდეგი