წმინდანთა ცხოვრება

.: ნოემბერი :.

ძველით: 3 ნოემბერი
ახლით: 16 ნოემბერი

ღირსი მამაჲ ჩვენი ნიკოლოზ ქართველთა მნათობი, აკოლოთიათა აღმწერელი (+1308))

ტროპარი: ბრწყინვალებითა ჭეშმარიტისა მოძღვრებისათა განანათლე ქუეყანა და სწავლითა ღმრთისმეტყუელებისაითა დაამტკიცე პირმეტყუელი სამწყსოი ქრისტესი, მამაო ნიკოლოზ ღმრთივგონიერო, ევედრე ღმერთსა შეწყალებად სულთა ჩუენთათვის".

კონდაკი: "ყოვლითა გულითა შენითა ქრისტე, ღმერთი შენი შეიყუარე, დაუტევე ყოველივე ამის სოფლისადა უხორცოთა ძალთა მობაძავითა ცხორებითა იქმენ სამკვიდრებელ სულისა ყოვლადწმიდისა და განმანათლებელ ქუეყანისა ჩუენისა, ღირსო მამაო ნიკოლოზ, მოგვიხსენენ ჩუენ, პატივისმცემელნი სახსენებელისა შენისანი".

ღირსი ნიკოლოზ ქართველთა მნათობი ცხოვრობდა და მოღვაწეობდა XIII საუკუნის შუა წლებიდან XIV საუკუნის დასაწყისამდე. მისი მოღვაწეობის ბოლო წლები ემთხვევა დემეტრე თავდადებულის (ხს. 12 მარტს) ძის, ვახტანგის მეფობის დროს (1301-1308 წწ.).

ღირსი ნიკოლოზ ქართველთა მნათობი, აკოლოთიათა აღმწერლის შესახებ ცნობები მწირადაა შემონახული.

წმიდა ნიკოლოზი თავისი დროის ერთ-ერთი უდიდესი ჰიმნოგრაფი და გამოჩენილი სასულიერო მოღვაწე იყო. სამწუხაროდ, მისი შემოქმედებიდან ჩვენამდე ძალიან ცოტა რამაა მოღწეული.

ანტონ კათალიკოსი (1720-1788 წწ.) წერს, რომ ნიკოლოზი იყო „ავქსონი კანონთ, მრავალ აკოლოთიათ“ და ასახელებს მის ერთ თხზულებას: „ამან უზომოდ წჳმისა გარდამოსვლის დასაყენები შექმნა აკოლოთია, მხურვალსავედრი ღვთისადმი ერისაგან, მაღალგამოთქმით“. ეს აკოლოთია გვხვდება ქართულ კურთხევანში.

წმიდა ნიკოლოზი ქართულ სასულიერო ლიტერატურას მთარგმნელობითი მოღვაწეობითაც ამდიდრებდა, ვარაუდობენ, რომ როგორც ლიტურგისტს, მას უნდა ეკუთვნოდეს ის წესები, კერძოდ, „განგება წყლის კურთხევისა“, რომელიც 1306-1308 წლებშია ნათარგმნი ბერძნულიდან ქართულად.

ცნობილი მეცნიერი და ისტორიკოსი პლატონ იოსელიანი (1809-1875) წერს, რომ მან წმიდა ნიკოლოზის სხვა აკოლოთიანიც ნახა ათონის ივერთა მონასტრის ხელნაწერებში.

წმიდა მამა 1308 წელს აღესრულა მშვიდობით.

„წმიდანთა ცხოვრება“, ტომი IV, თბილისი, 2003 წ.

მოუსმინე: