უწმინდესი და უნეტარესი
სრულიად საქართველოს კათოლიკოს-პატრიარქი ილია II

პატრიარქისადმი მიძღვნილი ლექსები

ქართვლის მნათობო!

უწმინდესსა და უნეტარესს, სრულიად საქართველოს კათოლიკოს-პატრიარქს ილია II-ს

ნუგზარ ჩიკვაიძე

ქართვლის მნათობო, ქარ-ბორბალას როგორ გავექცეთ,
თავს დაგვტრიალებ სიხარულის, ტანჯვის დღეებში,
ლოცვით გიჭირავს ეს ცა, თავზე რომ არ დაგვექცეს
და არ ჩაგვმარხოს ბაბილონის ბილწ ნანგრევებში.

ხელით გიპრყია ცრემლ-ლოცვებით გადაბანილი
სამშობლოს გული ნოეს წმინდა კიდობანივით.

იქ მიუწვდემელ ბაღ-ვენახში ჰყვავის ხეხილი,
სიწმინდით შენით მეომარი აღსდგა მონიდან,
დგას საქართველო დამეწყრილი და დამეხილი
და გველ-ვეშაპი მოიჩქარის ბაბილონიდან.

უქარტეხილოდ არც ყოფილან ჩვენი დღეები,
ჩვენ დღეთა მათთა ბინადარნი ვით გვიყელებენ,
რას ღაღადებენ, უწმინდესო, ეს ნანგრევები
ან ეს ცა-მთები, ეს ველები რას მეტყველებენ.

მიწის ბნელეთში შეხიზნულა ყრმა პირტიტველი,
ჭაბუკმან მრწემმან დედის გული ვერ გაახარა,
როგორ დაგღალეთ, ჩვენი ცოდვის ცრემლით მტვირთველო,
ქართული დარდით დაბარდნილა შენი ჭაღარა.

შენი ხმა მამულს ესალბუნებ-ესასოება,
ვენახ-მტევნებში ამართულა, როგორც ხარდანი;

ცოდვებმან ჩვენმან შეაწუხეს ღვთის სათნოება,
ცოდვებმან ჩვენმან განარისხეს ღვთის სამართალი;
შენი ხმა მამულს ესალბუნებ-ესასოება,
ვენახ-მტევნებში ამართულა, როგორც ხარდანი;

ჩვენს ჭრილობებში ჩაბელტილი გველის შხამია,
დაბნეულ ქართველს გულ-გონება გადაეღალა,
ლოცვებმან შენმან შეაკავეს ღვთის მრისხანება
და შენს ცრემლებში დაწმენდილა ჩვენი ქვეყანა.

სოფლისა თავზე მობრიალე არწივ-ლომი ხარ,
ეს კლდე-მინდვრები დაჩეხილი შენი ტანია;
ცრემლით და ლოცვით მოთმინების გზას შესდგომიხარ
და ჩვენი ცოდვა გოლგოთაზე აგიტანია.

შენ გვიხმობ ცისკენ, ჩვენ კი უფალს როგორ დავშორდით,
და მაინც გვინდა ჩვენს განზრახვებს ღმერთის გზა ერქვას...
წმინდა მამაო, გადაგღალეთ ჩვენი ბავშვობით,
თუმცა ამ ცოდვებს ურჯულობა უნდა დაერქვას.

ო, სულნათელო, მაცხოვრისა მოგვეც მშვიდობა,
დღეს ხმალ-აბჯარი შეგვწყდომია ტანზე ღილივით,
გვარწყულ-გვაპურებს ეგ სიმშვიდე და სულდიდობა,
ლოცვით, კურთხევა-სიყვარულით, ღვთიურ ღიმილით,

ჰგავს საქართველო სამშვიდობოს გასულ კიდობანს,
თავს შენი კვერთხი დასდგომია ზეთისხილივით.

ჩემო პატრიარქო

ქართულ საგალობელს მადლი დაეფინა 
სული იბერული სუნთქავს სამზიანოს, 
ზეცით დაფერილი წმიდა თვალები გაქვს, 
სულის სითეთრეში მადლი დაგფრთიანობს.

სითბოდათოვლილმა ჯვარმა ილიბანა, 
საროდ გესირმება სული მოსალბუნე, 
ბერთა იბერიას ნატრის მწირი ბანა, 
მირონ გადმოღვივით მცხეთის ხოდაბუნებს.

ლომისს ეფონება მამის მაისობა, 
ცაი სმარაგდოი სულში ჩაიკმიე, 
გული გაგვიწმინდე ტკბილო პატრიარქო, 
დარდით დასეტყვილი, მადლით ჩაგვინისლე.

ზეცის დედოფალმა შვილად დაგიგულვა, 
იბერთ მამობრივი სული დაგვიმორჩე. 
აღმაშენებელმა შტასი გიდავითნა, 
ქრისტეს ეკლებმა კი შუბლი დაგიკოცნეს.

ლოცვის სინატიფე ათოვს ღუდუშაურს, 
აჩხოტს სულიწმიდის მადლი აცისკარებს, 
ზეცას ქერუბიმობს რქაი დავითური, 
ქრისტეშობის მადლით გერგეტ გაწმიდანებს.

ქართულ საგალობელ გუმბათს ეკამარა, 
ვახტანგ მადლსამოსად მცხეთას იპირველებს. 
მამა დაგვილოცეთ, ზეცად იბერიავ, 
თამარ გვირგვინოსან, გვირგვინს გიმზისფერებს.

ჯვარო უმძიმესო, ჯვარო უტკბესო, 
სოფლის სიშავიდან მადლი ამოძოვე. 
მამა დაგვილოცნეთ, დიდნო წინაპრებო, 
ჯვარო უძლეველო, მამა დაგვილოცე.

მირკანს მოუსხია კვართის მოსასხამი, 
მცხეთის სიწმინდეში მადლი დაგვფრთიანობს, 
ზეცით დაკვებილი წმიდა თვალები გაქვს, 
ჩემო პატრიარქო, ჩემო პატრიარქო.

მირკანს მოუსხია კვართის მოსასხამი, 
მცხეთის სიწმინდეში მადლი დაგვფრთიანობს, 
ზეცით დაკვებილი წმიდა თვალები გაქვს, 
ჩემო პატრიარქო, ჩემო პატრიარქო