წმიდა ეფრემ ასური

52 მაცხოვნებელი სიტყვა

მე-46 კვირა: ივლტოდე ამაოებისაგან, რომელიც ღმერთისაგან განგვაშორებს!

არასარწმუნოა აწინდელი საუკუნე, საყვარელნო, იმიტომ, რომ რაიმეს მფლობელს ყოველივეს ართმევს, და ადამიანიც იტანჯება, დიდად დაშვრება და წუხდება ქვეყნიურ ცხოვრებაში. და ვინც არ გულმოდგინებს მისთვის, ქვეყნიური ცხოვრებისთვის, ის გულწრფელად, არაპირმოთნედ შეუვრდება ღმერთს, რადგან ამა წუთისოფლისგან არანაირი წინდი არა აქვს აქაური წარმავალი სიკეთეებისა. ეს ქვეყანა თავის თავში განხრწნადს შეიცავს, იმიტომ, რომ თავად არის დაფუძნებული სიკვდილზე. ვისაც მასში ყოველივე აკლია და უქონელია, იმას არც მოქიშპე ჰყავს და ის არც ინაწილებს სხვათა ამაო შრომას. მაშ, რატომ არ უნდა გახდე შენ, ჰოი, კაცო, კეთილგონიერი და რატომ არ უნდა გაწყვიტო კავშირი ამა განხრწნად, ამაო ქვეყანასთან? რატომ ვერ უნდა მოახერხო ამაოების ძლევა, რათა ქონებაზე უარის თქმით თანხმობა გქონდეს სინანულთან? კაცთა ქვეყნიური საქმეების მემკვიდრე – ამაოებაა, უსარგებლობა, რამეთუ ისინი გაფანტულობას იწვევენ, მომხვეჭელობის სიყვარულს, დიდებისმოყვარეობისა და ავხორცობის, ხორციელ სიამეთა სიყვარულს აღმოაცენებენ, და ამიტომ ამაოება უაღრესად კეთილგანწყობილია თავის აღმომაცენებელთადმი.

სძლიე გველის მზაკვრობას და შეინარჩუნე კეთილგანწყობა მეუფისადმი. აღიღე ყოველივე, რაც ამაოებას ეკუთვნის, და ღმერთს მიეცი ეს, რათა მომავალ საუკუნეში შენი კუთვნილი სიკეთენი დაიმკვიდრო. ღმერთს მიუძღვენი შენი ქონება და ამაოება დაკარგავს უფლებებს შენზე და მოაკლდება თავის მემკვიდრეობას. შეადგინე ანდერძი საკუთარ სახელზე, იმიტომ, რომ შენ, როგორც მოკვდავი, უნდა აღესრულო, და თუკი ყოველივეში მართალი და უფლის ერთგული იქნები, შენსას ყოველთვის უკანვე მიიღებ! შენი სიკვდილი მემკვიდრის ნაცვლად შენზე მზრუნველად, შენს მეურვედ გადააქციე, რათა როცა დადგება მკვდრეთით აღდგომის ჟამი, მიიღო ყველაფერი ეს როგორც მიწევნულმა ქრისტეს სრულყოფილ ასაკს. შეეფარე სიკვდილს, როგორც ჩვილი ყრმა, რადგან ჯერ არა გაქვს ხელმწიფება შენს საკუთრებაზე, და წარმოდექი მკვდრეთით აღდგომაში შენი ნაშრომის სრულუფლებიან მფლობელად და ბატონად!