წმიდა ეფრემ ასური

52 მაცხოვნებელი სიტყვა

მე-8 კვირა: მწამს, უფალო, რომ მაცხოვნებ მე

შენს სამსჯავროზე, ჰოი, მსაჯულთა მსაჯულო, დაე, ნუ ვიქნები თავდადრეკილი ჩემს თანანადებთა გამო! და თუ მე არც ვარ შენდობის ღირსი, შემიწყალე, უფალო, შენი სხეულისა და შენი სისხლის გულისთვის, ჩემში რომ არიან დაფარულნი! შენი სიყვარულით თაყვანს ვცემ შენს ჯვარს და სიხარულით ვეზიარები შენს ხორცსა და სისხლს. ამიტომ მოწყალე იყავ ჩემდამო და მომიტევე მე ცოდვები! არ არის თვალ-ღება შენს სამსჯავროზე, უფალო; ამიტომაც ვძრწი მე, რამეთუ ცოდვილი ვარ. როცა გადაშლიან საშინელ წიგნებს და შენი მართლმსაჯულება ჩემს ბრალეულობებს აღმომიკითხავს მათში, მაშინ შემიწყალე მე სახიერებითა შენითა, უფალო! შენს სახლში შემოსულთაგან უარაფროდ (ცარიელი) არავინ გამოდის უკან, გარდა რწმენით ღატაკისა.

მეზვერე ზაქემ რწმენით შეგიყვანა თავის სახლში, და ცხოვნდა; ასევე ავაზაკმაც ჯვარზე რწმენით მიიღო შენგან ცათა სასუფეველის გასაღები. მაშ, მიიღე, შეისმინე, უფალო, ჩვენი ლოცვები და შენს სიუხვეთა საუნჯედან მოგვმადლე ჩვენი ვედრებების შესრულება! პირს ნუ იბრუნებ ჩემგან, შენს მვედრებელთაგან! მოწყალედ მოიხილე ჩვენზე, შენს განმარისხებლებზე, რათა შენმიერმა მშვიდობამ დაისადგუროს ჩვენში, სიხარულით აღვივსოთ და მართალთა თანა ქება-დიდება აღმოგივლინოთ შენ, მრავალმოწყალეო!