წმიდა ეფრემ ასური

52 მაცხოვნებელი სიტყვა

1-ლი კვირა: სინანული ცხოვნების დედაა

სასოწარკვეთილებას არ უნდა ვეძლეოდეთ, ძმებო, ჩვენ, ვისაც დედად სინანული გვყავს! ხსნის იმედს არ უნდა ვკარგავდეთ, საყვარელნო, როცა ასეთი დედა გვანუგეშებს. მას ყოველთვის ეწყალვოდა კაცთა მოდგმა და გველის მიერ მონადირებულთ კვლავ სამოთხედ შეიყვანდა ღმერთთან. და განა ჩვენგან იბრუნებს ახლა პირს?! მან შეიწყალა ისინი, როცა ეკლესიის გარეთ იყვნენ; და განა ჩვენ არ მოგვხედავს წყალობით?! იგი რჩევა-შეგონებით მიმართავს იმათ, ვისაც ჯერ არ ურწმუნია; და განა ჩვენ უარგვყოფს, უკვე აღვსებულთ რწმენით?! სასურველის მოპოვების იმედით არავინ დაღუპავს იმას, რაც უკვე ხელთ უპყრია. მაშ, როგორ დათმობს მამა-ღმერთი იმათ, ვინც მას თავისი ძის სისხლით შეუძენია?! ადვილად არავინ განაბნევს იმას, რაც დიდი შრომით აქვს შეკრებილი. მაშ, ღმერთმაც, დანანების გარეშე როგორ უარყოს ისინი, ვინც წარმართთაგან შეიძინა მოციქულთა ღვაწლით?! მან სინანული მოგვმადლა ჩვენ, ვითარცა განმწმედელ-მაკურთხეველი წყალი. თუკი რაიმეში შევცოდავთ, სინანულით განვიბანებით და კვლავ უბიწონი ვხდებით. სინანული, საყვარელნო, უდიდესი ბრძმედია, თავის წიაღში რომ სპილენძს იღებს და ოქროდ გადააქცევს; ტყვიას მიიღებს და ვერცხლად გვიბრუნებს.

სინანული ღმერთის სამსხვერპლოა, იმიტომ, რომ შემცოდენი მისი მეშვეობით მოწყალებად აღძრავენ უფალს თავისადმი. სჯულს დაქვემდებარებულნი ხშირად დიდი ხარჯების მიზეზით ამბობენ უარს თავიანთი ცოდვების გამოცხადებაზე, და ეს სიძნელე მსხვერპლის შეწირვაში საფარველად ემსახურებოდა მანკიერებას. თავისი მოსვლით ქრისტემ განაგდო ეს, მოგვმადლა რა სინანულის მსხვერპლი. რისთვის გჭირდება, ცოდვილო, ცხვრის ყიდვა? სინანული ხომ მთელი ფარაა, რომელიც ეკლესიას ეკუთვნის. რისთვის გჭირდება ფრინველის ყიდვა? – სინანული ხომ ცაა, რომელიც შესაწირი ფრინველის ნაცვლად მოახედიებს შენსკენ ღმერთს! სინანული საღმრთო ტრაპეზია, იმიტომ, რომ მისით ღმერთი კაცობრიობის ცხოვნებას გემულობს! ღმერთის სათნო-ყოფას მინდობილი სინანული სულიწმიდის მადლთან აზიარებს ცოდვილს და ადამიანს მთლიანად შექმნის ძედ ღმრთისა.

გუშინდელი მკვდარნი – დღეს სინანულით განცოცხლდებიან ღმერთისთვის; გუშინ უცხონი – აწ თვისად შეექმნებიან ღმერთს; გუშინ უსჯულონი – დღეს წმიდანი ხდებიან.

მაშ, ჩვენც შევინანოთ, ძმანო, ცოდვილებმა, რათა ვსძლიოთ ეშმაკს! მარადის სინანული შევსწიროთ ღმერთს, რათა სათნო-ვეყოთ მას!