მთავარი
ლოცვანი
ფსალმუნნი
ახალი აღთქმა
ძველი აღთქმა
დაუჯდომლები
პარაკლისები
განმარტებები
სხვადასხვა თემები
წიგნის შესახებ
მთავარი
ლოცვანი
ფსალმუნნი
ახალი აღთქმა
ძველი აღთქმა
დაუჯდომლები
პარაკლისები
განმარტებები
სხვადასხვა თემები
წიგნის შესახებ
მღვდელმან: კურთხეულ არს ღმერთი ჩუენი, ყოვლადვე, აწ და მარადის და უკუნითი უკუნისამდე.
მკითხველმან: ამინ. დიდება შენდა, ღმერთო ჩვენო, დიდება შენდა.
მეუფეო ზეცათაო, ნუგეშინისმცემელო, სულო ჭეშმარიტებისაო, რომელი ყოველგან ხარ და ყოველსავე აღავსებ მადლითა შენითა, საუნჯეო კეთილთაო, მომნიჭებელო ცხოვრებისაო, მოვედ და დაემკვიდრე ჩვენს შორის და წმიდა მყვენ ჩვენ ყოვლისაგან ბიწისა და აცხოვნენ, სახიერო, სულნი ჩვენნი.
წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.
უფალო შეგვიწყალენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.
მღვდელმან: რამეთუ შენი არს სუფევაჲ, ძალი და დიდებაჲ აწ და მარადის და უკუნითი უკუნისამდე.
მგალობელთა: ამინ.
უფალო შეგვიწყალენ (12–ჯერ).
უფალო, შეისმინე ლოცვისა ჩემისაი, ყურად-იღე ვედრებაი ჩემი ჭეშმარიტებითა შენითა, შეისმინე ჩემი სიმართლითა შენითა; და ნუ შეხუალ საშჯელსა მონისა შენისა თანა, რამეთუ არა განმართლდეს შენ წინაშე ყოველი ცხოველი, რამეთუ დევნა მტერმან სული ჩემი და დაამდაბლა ქუეყანად ცხორებაი ჩემი, დამსუა მე ბნელსა შინა, ვითარცა მკუდარი საუკუნოი. და მოეწყინა ჩემთანა სულსა ჩემსა, და ჩემ შორის შემიძრწუნდა გული ჩემი. მოვიხსენე დღეთა პირველთაი, და ვიწურთიდ ყოველთა მიმართ საქმეთა შენთა და ქმნულსა ხელთა შენთასა ვზრახევდ. განვიპყრენ შენდამი ხელნი ჩემნი, და სული ჩემი, ვითარცა ქუეყანაი ურწყული შენდამი. მსთუად შეისმინე ჩემი, უფალო, რამეთუ მოაკლდა სულსა ჩემსა; ნუ გარე-მიიქცევ პირსა შენსა ჩემგან, და ვემსგავსო მათ, რომელნი შთავლენან მღვიმესა. მასმინე მე განთიად წყალობაი შენი, რამეთუ მე შენ გესავ; მაუწყე მე, უფალო, გზაი, რომელსაცა ვიდოდი, რამეთუ შენდამი აღვიღე სული ჩემი. მიხსენ მე მტერთა ჩემთაგან, უფალო, რამეთუ შენ შეგევედრე. მასწავე მე, რაითა ვყო ნებაი შენი, რამეთუ შენ ხარ ღმერთი ჩემი; სული შენი სახიერი მიძღოდეს მე ქუეყანასა წრფელსა. სახელისა შენისათვის, უფალო, მაცხოვნო მე და სიმართლითა შენითა გამოიყვანო ჭირისაგან სული ჩემი. და წყალობითა შენითა მოსრნე მტერნი ჩემნი და წარსწყმიდნე ყოველნი მაჭირვებელნი სულისა ჩემისანი, რამეთუ მე მონაი შენი ვარ.
არა უარყავით თქუენ უფალი იესუ ქრისტე, დიდებულნო ქვაბთახეველნო მოწამენო, და ერთობითა მიხუედით რა ასპარეზსა ვნებისასა, ანგელოზთა და წმიდათა თანა სუფევთ წინაშე ღმრთისა, და ყოველთა მორწმუნეთა უშურველად განუყოფთ რაი მადლსა და წყალობასა, აწ ჩუენცა ვითხოვთ მეოხებასა თქუენსა მისა მიმართ, რაითა განსაცდელთა და ვნებათა ჩუენთა ღელვანი დააყუდოს და წარგვიმართოს ნავთსაყუდელსა მას ცხორებისასა.
დიდება მამასა და ძესა და წმიდასა სულსა.
არა უარყავით თქუენ უფალი იესუ ქრისტე, დიდებულნო ქვაბთახეველნო მოწამენო, და ერთობითა მიხუედით რა ასპარეზსა ვნებისასა, ანგელოზთა და წმიდათა თანა სუფევთ წინაშე ღმრთისა, და ყოველთა მორწმუნეთა უშურველად განუყოფთ რაი მადლსა და წყალობასა, აწ ჩუენცა ვითხოვთ მეოხებასა თქუენსა მისა მიმართ, რაითა განსაცდელთა და ვნებათა ჩუენთა ღელვანი დააყუდოს და წარგვიმართოს ნავთსაყუდელსა მას ცხორებისასა.
აწ და მარადის და უკუნითი უკუნისამდე, ამინ.
არასადა დავსდუმნეთ, ღმრთსმშობელო, ძლიერებათა შენთა ქებად, უღირსნი ესე მონანი შენნი. რამეთუ არათუმცა შენ გვფარევდი ოხითა შენითა, ვინმცა სადა გვიხსნნა ჩუენ ესოდენთა ჭირთაგან; ანუ ვინმცა დაგვიცვნა ჩუენ აქამომდე ფლობილად? არასადა განგეშორნეთ ჩუენ, დედუფალო კურთხეულო, რამეთუ შენ იხსნი სულთა ჩუენთა ყოველთა განსაცდელთაგან.
ფსალმუნი 50
1. მიწყალე მე, ღმერთო, დიდითა წყალობითა შენითა და მრავლითა მოწყალებითა შენითა ახოცე უშჯულოებაი ჩემი.
2. უფროის განმბანე მე უშჯულოებისა ჩემისაგან და ცოდვათა ჩემთაგან განმწმიდე მე.
3. რამეთუ უშჯულოებაი ჩემი მე უწყი, და ცოდვაი ჩემი წინაშე ჩემსა არს მარადის.
4. შენ მხოლოსა შეგცოდე და ბოროტი შენ წინაშე ვყავ; რაითა განმართლდე სიტყუათაგან შენთა და სძლო შჯასა შენსა.
5. რამეთუ ესერა უშჯულოებათა შინა მიუდგა და ცოდვათა შინა მშვა მე დედამან ჩემმან.
6. რამეთუ ესერა ჭეშმარიტებაი შეიყუარე, უჩინონი და დაფარულნი სიბრძნისა შენისანი გამომიცხადენ მე.
7. მასხურო მე უსუპითა და განვწმიდნე მე, განმბანო მე და უფროის თოვლისა განვსპეტაკნე.
8. მასმინო მე გალობაი და სიხარული, და იხარებდენ ძუალნი დამდაბლებულნი.
9. გარე-მიაქციე პირი შენი ცოდვათა ჩემთაგან და ყოველნი უშჯულოებანი ჩემნი ახოცენ.
10. გული წმიდაი დაჰბადე ჩემ თანა, ღმერთო, და სული წრფელი განმიახლე გუამსა ჩემსა.
11. ნუ განმაგდებ მე პირისა შენისაგან და სულსა წმიდასა შენსა ნუ მიმიღებ ჩემგან.
12. მომეც მე სიხარული მაცხოვარებისა შენისაი და სულითა მთავრობისათა დამამტკიცე მე.
13. ვასწავლნე უშჯულოთა გზანი შენნი და უღმრთონი შენდა მოიქცენ.
14. მიხსენ მე სისხლთაგან, ღმერთო, ღმერთო ცხორებისა ჩემისაო, იხარებდეს ენაი ჩემი სიმართლესა შენსა.
15. უფალო, ბაგენი ჩემნი აღახუნე, და პირი ჩემი უთხრობდეს ქებულებასა შენსა.
16. რამეთუ უკეთუმცა გენება, მსხუერპლი შე-მცა-მეწირა, არამედ საკუერთხი არა გთნდეს.
17. მსხუერპლი ღმრთისა არს სული შემუსრვილი, გული შემუსრვილი და დამდაბლებული ღმერთმან არა შეურაცხ-ჰყოს.
18. კეთილი უყავ, უფალო, ნებითა შენითა სიონსა და აღეშენნენ ზღუდენი იერუსალემისანი.
19. მაშინ გთნდეს მსხუერპლი სიმართლისაი, შესაწირავი და ყოვლად-დასაწუელი; მაშინ შეიწირნენ საკურთხეველსა შენსა ზედა ზუარაკნი.
გალობაი 1, უგალობდითსა
ძლისპირი: ეტლთა სიმრავლეი მხედრებითურთ ზღუასა მეწამულსა სიღრმესა შთაითხინეს სიმტკიცითა მკლავისაითა ქრისტეს მიერ და იხსნეს ისრაელნი, და ძლევისა გალობასა ახლად იტყოდეს.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
ქებით შეგამკობთ მორწმუნენი წმიდათა დიდებულთა მოწამეთა, დედათა და მამათა, სამღდელოთა და ერთა, და საფარველსა თქუენსა შევვედრებთ თავსა ჩუენსა.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
ღუაწლი თქუენი ბრწყინვალედ შეუმოსიეს რაი ეკლესიასა ჩუენსა, გვიწესს ლოცვითა გარდახდად წმიდისა ხსენებისა თქუენისა, და გალობად ყოვლადწმიდისა სამებისა.
დიდებაი მამასა და ძესა და წმიდასა სულსა.
განსთქუამს რაი ქვაბთახევისა მონასტერი დიდებულსა მარტვილობასა თქუენსა, წინაშე ხატთა თქუენთა შევრდომილნი, არა დავსცხრებით ქებად თქუენდა და დიდებად ღმრთისა.
აწ და მარადის და უკუნითი უკუნისამდე, ამინ.
გუნდმან წინაისწარმეტყუელთამან წინაით მოგასწავა შენ მთად საღმრთოდ და კარად განუვლელად, ამისთვისცა გევედრებით: კარნი სინანულისანი საღმრთონი განგვიხუენ ჩუენ, ქალწულო.
გალობა 3, განძლიერდასა
ძლისპირი: რომელმან დააფუძნე ქუეყანაი წყალთა ზედა და მიეც ნაყოფიერებაი ყოლადვე, კლდესა ზედა, ქრისტე, მცნებათა შენთასა შეუძრავსა დაამტკიცე ეკლესიაი შენი, მხოლოო სახიერ და კაცთ-მოყუარე.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
აღაბორგა რაი ბილწი ლანგ-თემურ ბაგრატ მეფისა მიერ ლაშქართა მისთა აღსპობამან, ქართლად მოწევნულმან სძლო სპასა მას ქარველთასა, და დიდითა ლაშქრითა აღაოხრა და დაჰსწუა ქართლი, და შეუხდა ქუაბთახევისა მონასტერსა.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
შესრულთა მათ თათართა მარბიელთა სამკვიდრებელსა მას ღმრთისასა, შეაგინეს რაი ტაძარი იგი ყოვლადწმიდისა დედისაი, წარმოსტყუენეს ყოვლითურთ და განიტაცნეს ჭურჭელნი და საუნჯე სავანისაი.
დიდებაი მამასა და ძესა და წმიდასა სულსა.
დიდებულსა მას მონასტერსა, ვითარცა ყუდროსა ნავსაყუდელსა, შევლტოლვილი ერი, სამღდელოთა და მონაზონთა თანა, ლოცვითა და მარხვითა განკაფულნი, ევედრებოდენ ღმერთსა ხსნასა და შეწევნასა.
აწ და მარადის და უკუნითი უკუნისამდე, ამინ.
მარჯუენით ქრისტეისა მდგომარემან, ვითარცა დედოფალმან შემოსილმან, ღმრთივსახარულევანო, სამოსლითა ოქროვანითა, სუფევაი ზეციერი გვითხოვე ჩუენ, მეოხებითა შენითა, ქალწულო, ყოვლადწმიდაო.
გვიხსენ განსაცდელთაგან მონანი შენნი, ყოვლადწმიდაო ღმრთისმშობელო ქალწულო, რამეთუ ჩვენ ყოველნი, შემდგომად ღმრთისა, შენდა მოვილტვით, ვითარცა უძლეველისა ზღუდისა და შუამდგომელისა.
მოიხილე ჩუენ ზედა, ყოვლადქებულო ღმრთისმშობელო, და ხორცთა ჩუენთა წყლულებანი ბოროტნი განჰკურნენ, და სულისა ჩუენისა სნეულებანი.
მრჩობლი კვერექსი
დიაკონმან: შეგჳწყალენ ჩვენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით ღმრთივ–დაცულისა ერისა ჩუენისა და მეუფებისა მისისათჳს (მთავრობისა და მხედრობისა) მისისათჳს.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით უწმიდესისა და უნეტარესისა, სრულიად საქართველოს კათოლიკოს–პატრიარქისა და მცეთა–თბილისის მთავარეპისკოპოსისა და ბიჭვინთისა და ცხუმ–აფხაზეთის მიტროპოლიტისა, დიდისა მეუფისა, მამისა ჩუენისა ილიასათჳს, და ყოვლადუსამღვდელოესისა... (აქა მოიხსენეთ ადგილობრიბი მღვდელმთავარი), და ყოველთა ქრისტეს მიერ ძმათა ჩუენთათვის.
მგალობელთა: უფალო, შეგჳწყალენ (3-გზის).
დიაკონმან: მერმეცა ვევედრნეთ უფალსა ღმერთსა ჩუენსა, რაითა შეიწყალნეს... (აქა მოიხსენეთ სახელდებით ისინი, ვისთვისაც ევედრებით ღმერთს).
მგალობელთა: უფალო, შეგჳწყალენ (3-გზის).
დიაკონმან: განამრავლე, უფალო, ჟამნი და წელნი ცხოვრებისა მათისანი, და იხსნენ იგინი, უფალო, ყოვლისაგან ჭირისა, რისხვისა და იწროებისა, და ყოვლისაგან წყლულებისა სულისა და ხორცთასა, და მიუტევენ მათ ყოველნი შეცოდებანი მათნი, ნებსითნი და უნებლიეთნი.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით ყოველთა ძმათა და ყოველთა ქრისტიანეთათჳს.
მგალობელთა: უფალო, შეგჳწყალენ (3-გზის).
მღვდელმან: რამეთუ მოწყალე და კაცთმოყვარე ღმერთი ხარ, და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის და უკუნითი უკუნისამდე.
მგალობელთა: ამინ.
კვერექსის ნაცვლად ერისკაცი იტყვის – უფალო, შეგვიწყალენ 40-გზის. დიდებაი… აწდა…
წარდგომა, ხმაი 4
შემოკრბით, ჰოი, ერნო ქართველთანო, მამანო და მონაზონთა კრებულნო მღდელთმთავართა თანა, მდიდარნო და გლახაკნო და ყოველნო ჰასაკნო, რაითა ქებით შევამკობდეთ გუნდსა უბიწოსა, მხედრობასა საღმრთოსა, მწყობრსა რჩეულსა, ბანაკსა წმიდასა, სპარაზენობასა ძლიერსა, სიმრავლესა სამგზის სანატრელსა – ქვაბთახეველთა მოწამეთა, და ვევედრნეთ, ვითარცა ძლიერთა შემწეთა ჩუენთა, რაითა შეუძრველად დაგვიცვან მართლმადიდებლობასა შინა და განგვარინონ ყოველთა განსაცდელთა.
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
ჰოი, მამათა მათ მოწესეთა და მონაზონთა დედათა ერთობაო, სულისა მიერ წმიდისა შეერთებულო, – ქრისტეისთვის პყრობილნო ყრმანო, ჭაბუკნო და მხცოვანნო, და მთავარნო ჩინებულნო, აზნაურნო და გლახაკნო, სულითა ღმრთისაითა საწუთოისა მძლეველნო, და დედანო და დანო ჩუენნო, ღუაწლსა მას მამაკაცებრ ახოვნად შებმულნო, – შეგვეწიეთ წინაშე ღმრთისა, გარე-მოგვზღუდოს საცთურისაგან ეშმაკისა, და დაგვიცვას ზედადასხმისაგან მტერისა.
გალობა 4, მესმასა
ძლისპირი: ესმა მოსლვაი შენი დიდებული, დაუკვირდა ამბაკუმს, ქრისტე, და შიშით ღაღადებდა: გამოხუედ მაცხოვრად ერისა შენისა და ხსნად ცხებულთა შენთა.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
ბოროტად აღიძრნენ რაი ბილწნი ბარბაროსნი, უპირველეს უძლურნი აღსპეს მახვილითა და სულნი მათნი, განწმედილნი ერთობითა აღვიდოდეს ხელთა შინა ზეციერისა ღმრთისა ჩუენისასა.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
აღბორგდენ უსჯულონი. ვითარცა მგელნი ბოროტნი, და მოეხვივნეს რაი არვეთა კრავისათა, მოწყვიდნეს უწყალოდ, ვითარცა ჰეროდემ ჩჩვილნი უმანკონი, და სულსა შევედრებდენ ღმერთსა.
დიდებაი მამასა და ძესა და წმიდასა სულსა.
ხედვიდით რაი უსჯულოთა მიერ მოსრვასა უძლურთასა და შეკრვასა ტყუეთაისა, არა შეირყიეთ, ნეტარნო, არამედ ღუაწლად განემზადეთ, და ითხოვდით ღმრთისაგან დათმენასა.
აწ და მარადის და უკუნითი უკუნისამდე, ამინ.
შემეწიე მე, წმიდაო ღმრთისმშობელო, გემოვნებითა მიერ ხორციელთა მარადის დანთქმულსა, რომელი ესე ვკუნესი მარადღე მდებარე ცხედარსა ზედა მოწყინებისასა.
გალობა 5, ღამითგანსა
ძლისპირი: რომელმან შეიმოსე ნათელი სამოსლად, შენდა მოვილტი, შენ გიღაღადებ: განანათლე სული ჩემი დაბნელებული, ვითარცა ხარ მხოლოი, მრავალმოწყალე.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
მოიცალეს რაი კლვისაგან უსჯულოთა, სიცილითა შეასხნეს ეჟვანნი მოწესეთა და მონაზონთა დედათა, და აიძულებდენ როკუად, და იშუებდენ დამდაბლებითა მათითა.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
ბრძანებისაებრ უღმრთოისა მის თემურისა გაუწყეს რაი ტყუეთა: „ვინაიცა არა უარყოფთ ქრისტესა, დაგწვავთ ეკლესიასა შინა თქუენსა“, არა თავს-იდეთ დატევებაი სჯულისაი.
დიდებაი მამასა და ძესა და წმიდასა სულსა.
ჰოი, საკვირველი ეგე ღუაწლი თქუენი, მარტვილნო, რამეთუ სჯულისდებასა მას ცრუისასა არა შეიწყნარებდით და უშიშად ღაღადებდით: „აჰა, ჩუენცა მზანი ვართ შეწირუად ღმრთისა“.
აწ და მარადის და უკუნითი უკუნისამდე, ამინ.
რომელსა იგი ვერ მისწვდების გონებაი, ხორცნი შეიმოსნა, ღმრთივმიმადლებულო, და შენ სამკვიდრებელად თვისად შეგიწყნარა და იხსნნა კაცნი წარწყმედისაგან.
გალობა 6, ღაღადყავსა
ძლისპირი: გარე-მომიცვეს ღელვათა, და მექმნა საფლავ მუცელი ვეშაპისაი, და გიღაღადებ: მიხსენ მე, კაცთმოყუარე, და მაცხოვნე მე, მრავალმოწყალე უფალო.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
ეჰა, უშიში ახოვანებაი, გული გითქმიდათ რაი ქრისტეს მიერ მიღებასა ძლევისა გვირგვინისასა, და ღაღადებდით: „ვერარამან განგვაშოროს ჩუენ სიყუარულსა მისსა“.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
ვერცარა დაითმენდეს რაი კადნიერებასა თქუენსა ბარბაროსნი, განძვინებულნი მიგათრევდენ ტაძარსა, რაითა ტარიგნი ეგე შეიწირნეთ ღმერთმთავრისა ტარიგისად წმიდასა მას წმიდათასა.
დიდებაი მამასა და ძესა და წმიდასა სულსა.
არად შერაცხდით განჩინებასა უღმრთოთასა და კადნიერებითა ღაღადებდით: „დაღათუ დაიწვიან ხორცნი გახრწნადნი, მოვიღებთ უხრწნელსა ჯილდოსა – საუკუნესა მას ცხორებასა“.
აწ და მარადის და უკუნითი უკუნისამდე, ამინ.
გულსა შენსა განვლო მახვილმან, იხილე-რაი ჯუარსა ზედა ძეი შენი, უბიწოო ქალწულო, და საღმრთოი გუერდი მისი ლახურისა მიერ მოწყლული და გოდებდ სიმწარით.
გვიხსენ განსაცდელთაგან მონანი შენნი, ყოვლადწმიდაო ღმრთისმშობელო ქალწულო, რამეთუ ჩვენ ყოველნი, შემდგომად ღმრთისა, შენდა მოვილტვით, ვითარცა უძლეველისა ზღუდისა და შუამდგომელისა.
მოიხილე ჩუენ ზედა, ყოვლადქებულო ღმრთისმშობელო, და ხორცთა ჩუენთა წყლულებანი ბოროტნი განჰკურნენ, და სულისა ჩუენისა სნეულებანი.
კვერექსის ნაცვლად ერისკაცი იტყვის: – უფალო, შეგვიწყალენ 12-გზის. დიდებაი… აწდა…
კონდაკი, ხმაი 4
თქუენზედა მოწევნადთა განსაცდელთა ვინმე-უძლოა, ქვაბთახეველნო მოწამენო, სხურებითა სისხლთაითა სულნელ-ყავთ ეკლესიაი ქართველთაი, რომელსა შინა იქება მადლი თქუენი და ოხითა თქუენითა ღმრთისაგან, ყოველთა მოგუენიჭების წყალობაი.
სხუაი კონდაკი
საქებელ არს უპატიოსნესი შეკრებულებაი თქუენი არა ხრწნადითა ნათესავობითა, არამედ უხრწნელითა და ანგელოსებრითა ერთობითა რჩეული და წმიდა ქმნილი, რომელთაცა სახლსა შინა უფლისასა – წმიდასა შინა ეკლესიასა შესწირნეთ თავნი თვისნი ღმერთსა, ფრიად განგადიდნათ, წმიდანო ქვაბთახეველნო მოწამენო, და მოგანიჭათ აღთქმული იგი მადლი კურნებისა და შეწევნისაი.
იკოსი
ბრძანებაი უსჯულოთაი არა ისმინნეთ, ჰოი, ღუაწლით შემოსილნო მოწამენო, ქვაბთახევისა მონასტერსა შინა ლანგ თემურისა მიერ ვნებულნო, და სარწმუნოებითა მტკიცითა განაქიქეთ რაი მძლავრთა უღმრთოებაი, ლახვართა მიერ უწყალოდ დაიგმირეთ და ცეცხლთა მიერ დაიწვით, ხოლო მსხუერპლი ეგე სათნო იყო ღმერთმან და დაგადგათ ნათელი, ამისთვის ხსენებაი თქუენი ქებით აღესრულების.
დიაკონმან: სიბრძნით. მოხედენ.
მღდელმან: მშვიდობა ყოველთა.
მგალობელთა: და სულისაცა შენისა თანა.
დიაკონმან: წარდგომა ფსალმუნისაგან დავითისა, ხმაი 4: საკვირველ-არს ღმერთი წმიდათა შორის მისთა, ღმერთი ისრაელისა.
მგალობელთა: საკვირველ-არს ღმერთი წმიდათა შორის მისთა, ღმერთი ისრაელისა.
დიაკონმან: იქადიან წმიდანი დიდებითა და იხარებენ სარეცელსა ზედა მათსა.
მგალობელთა: საკვირველ-არს ღმერთი წმიდათა შორის მისთა, ღმერთი ისრაელისა.
დიაკონმან: საკვირველ-არს ღმერთი წმიდათა შორის მისთა,
მგალობელთა: ღმერთი ისრაელისა.
დიაკონმან: სიბრძნით.
მგალობელთა: ებრაელთა მიმართ ეპისტოლე, წმიდისა პავლე მოციქულისა საკითხავი
მღდელმან: უფლისა მიმართ ვილოცოთ.
მგალობელთა: უფალო, შეგჳწყალენ!
მღდელმან: რამეთუ წმიდა ხარ შენ, ღმერთო ჩუენო, და რომელი წმიდათა შორის განისუენებ, და შენდა დიდებასა აღვავლენთ, მამისა, და ძისა და წმიდისა სულისა, აწ და მარადის, და უკუნითი უკუნისამდე,
მგალობელთა: ამინ.
დიაკონმან: ყოველი სული აქებდით უფალსა.
გუნდი: ყოველი სული აქებდით უფალსა.
დიაკონმან: აქებდით ღმერთსა წმიდათა შორის მისთა, აქებდით მას სამყაროთა ძალისა მისისათა.
გუნდი: ყოველი სული აქებდით უფალსა.
დიაკონმან: ყოველი სული
გუნდი: აქებდით უფალსა.
დიაკონმან: ღირსყოფად ჩუენდა სმენად წმიდისა სახარებისა უფალსა ღმერთსა ჩუენსა ვევედრნეთ.
მგალობელთა: უფალო, შეგჳწყალენ (3-გზის).
დიაკონმან: სიბრძნით აღემართენით და ისმინეთ წმიდა სახარება.
მღვდელმან: მშჳდობაჲ ყოველთა.
მგალობელთა: და სულისაცა შენისა თანა.
დიაკონმან: მათესაგან წმიდისა სახარებისა საკითხავი.
მგალობელთა: დიდებაჲ შენდა, უფალო, დიდებაჲ შენდა.
დიაკონმან: მოხედენ.
სახარება მათესი
ჰრქუა უფალმან თვისთა მოწაფეთა: აჰა, მე მიგავლინებ თქუენ ვითარცა ცხოვართა შორის მგელთა; იყვენით უკუე მეცნიერ, ვითარცა გუელნი, და უმანკონი ვითარცა ტრედნი. ეკრძალებოდეთ კაცთაგან, რამეთუ მიგცემდენ თქუენ კრებულსა და შორის შესაკრებელთა მათთა გტანჯვიდენ თქუენ; და წინაშე მთავართა და მეფეთა მიგიყვანენ თქუენ ჩემთვის საწამებელად მათდა და წარმართთა. და რაჟამს მიგცნენ თქუენ, ნუ ჰზრუნავთ, ვითარ ანუ რასა იტყოდით, რამეთუ მოგეცეს თქუენ მას ჟამსა შინა, რასა-იგი იტყოდით. რამეთუ არა თქუენ იყვნეთ მეტყუელნი, არამედ სული მამისა თქუენისაი, რომელი იტყოდის თქუენ შორის, რამეთუ მისცეს ძმამან ძმაი სიკუდიდ, და მამამან შვილი; და აღსდგენ შვილნი მამა-დედათა ზედა და მოჰკვლიდენ მათ; და იყვნეთ თქუენ მოძულებულ ყოველთაგან სახელისა ჩემისათვის, ხოლო რომელმან დაითმინოს სრულიად, იგი ცხოვნდეს.
მგალობელთა: დიდებაჲ შენდა, უფალო, დიდებაჲ შენდა.
მკითხველმან: დიდება მამასა და ძესა და წმიდასა სულსა.
მეოხებითა წმიდათა და სანატრელთა ქვაბთახეველთა მოწამეთაითა, მოწყალეო, აღხოცენ ცოდვათა ჩუენთა სიმრავლენი.
აწ და მარადის და უკუნითი უკუნისამდე, ამინ.
მეოხებითა წმიდისა ღმრთისმშობელისათა, მოწყალეო, აღხოცენ ცოდვათა ჩემთა სიმრავლენი.
მიწყალე მე, ღმერთო, დიდითა წყალობითა შენითა, და მრავლითა მოწყალებითა შენითა აღხოცენ უსჯულოებაჲ ჩემი და შემიწყალე მე, ღმერთო.
გერი: ასპარეზი ღუაწლისაი სრულ-ყვენით რაი ქრისტეისთვის თავის შეწირვითა, აღმაღლდით ზეცას, ქვაბთახეველნო მოწამენო, და ღირს-ქმნილნი სწორსა პატივსა და დიდებასა, გვირგვინოსან იქმენით მარჯვენისაგან ღმრთისა, აწ ჩუენცა მეოხ გვეყვენით წინაშე მისსა, მოჰმადლოს სოფელსა მშვიდობაი და კეთილმორწმუნესა ერსა ჩუენსა ძლევაი მტერთა ზედა, შეურყეველად დამტკიცებაი ეკლესიათაი, და წყალობაი სულთა ჩუენთა.
ლოცვა მღვდლისა მიერ სათქუმელი
აცხოვნე, ღმერთო, ერი შენი, და აკურთხე სამკვიდრებელი შენი, მოხედენ სოფელსა შენსა წყალობითა და მოწყალებითა, აღამაღლე რქაი ქრისტეანეთა მართლმადიდებელთაი, და გარდამოავლინენ ჩუენ ზედა მდიდარნი წყალობანი შენნი, მეოხებითა ყოვლადწმიდისა დედოფლისა ჩუენისა ღმრთისმშობელისა, და მარადის ქალწულისა მარიამისაითა; ძლიერებითა პატიოსნისა და ცხოველსმყოფელისა ჯუარისაითა; მეოხებითა პატიოსანთა უხორცოთა ზეცისა ძალთაითა; პატიოსნისა, დიდებულისა, წინაისწარმეტყუელისა, წინამორბედისა და ნათლისმცემელისა იოვანეისითა, წმიდისა დიდისა წინაისწარმეტყუელისა ელია თეზბიტელისა და მართლისა ენუქისითა; წმიდათა დიდებულთა, და ყოვლად–ქებულთა მოციქულთა თავთა, პეტრეისა და პავლეისითა; წმიდისა მოციქულისა თომასი და საქართველოს განმანათლებელთა მოციქულთა: ანდრია პირველწოდებულისა, სვიმონ კანანელისა, ბართლომესი, თადეოზისა და მატათაისითა; ღირსისა დედისა ჩუენისა, მოციქულთა სწორისა ქალწულისა ნინო ქართველთ განმანათლებელისა და წმიდათა მოციქულთა სწორთა: მეფისა მირიანისა და დედოფლისა ნანაისითა; წმიდათა შორის მამათა ჩუენთა, და მსოფლიოთა დიდთა მოძღუართა და მღდელმთავართა: ბასილი დიდისა, გრიგოლი ღმრთისმეტყუელისა, და იოვანე ოქროპირისაითა; წმიდათა შორის მამისა ჩუენისა ნიკოლოზ მირონ–ლუკიის მთავარეპისკოპოსისა და საკვირველთმოქმედისაითა; წმიდისა დიდებულისა და ღუაწლისა–მძლისა მოწამისა, ძლევა–შემოსილისა გიორგისა და წმიდათა დიდთა ქალწულ–მოწამეთა ბარბარეისა და მარინეისითა; წმიდათა მამამთავართა ჩუენთა: პეტრე, სამუელ, სარმიან, მამაი, არსენ, მელქისედეკ, იოანე–ოქროპირ, ნიკოლოზ, ევდიმოზ, იოსებ, კირიონ, და ამბროსისაითა; ღირსისა მამისა ჩუენისა იოვანე ზედაზნელისა და ათორმეტთა მისთა მოწაფეთა, მეორედ განმანათლებელთა საქართველოს ეკლესიისა და მარადის მფარველთა მისთა და წმიდისა მღდელმოწამისა ნეოფიტე ურბნელისაითა; ღმრთივ–განბრძნობილთა ნეტართა მამათა ჩუენთა: ილარიონ ქართველისა, სერაპიონ ზარზმელისა, გრიგოლ ხანძთელისა და საბა იშხნელისაითა; ღირსთა მამათა ჩუენთა ათონელთა: იოვანე და გაბრიელ ქართველთა, იოვანე თორნიკ–ყოფილისა და ეფთვიმე და გიორგი მთაწმინდელთაითა; წმიდათა დიდებულთა და ღუაწლისა–მძლეთა მოწამეთა ჩუენთა: რაჟდენისა, ევსტათი მცხეთელისა, ჰაბო ტფილელისა, მიქაელ–გობრონისა, თევდორე მღდლისა, ქრისტეფორე გურულისა, ნიკოლოზ დვალისა, კოზმანისა, არგვეთისა მთავართა დავით და კონსტანტინეისა და კონსტანტინე მთავრისაითა; წმიდისა მთავარ–მოწამისა ბიძინასა და წმიდათა დიდებულთა მოწამეთა: შალვა და ელიზბარ ქსნის ერისთავთაითა; წმიდისა მოწამისა შალვა ახალციხელისა და წმიდათა ათთა–ბევრთა მოწამეთა, ტფილისს ხუარაზმელთაგან მოწყუედილთაითა; წმიდათა მოწამეთა ექვსი ათასთა გარეჯელთა ბერთა და მრავალთა წმინდათა მამათა და დედათა, აჭარაში თურქთაგან წამებულთაითა; წმიდათა ღუაწლისამძლეთა მეფეთა და დედოფალთა: მირდატ, აშოტ, არჩილ, დემეტრე, ლუარსაბ, შუშანიკ და ქეთევანისაითა და წმიდათა კეთილ–მორწმუნეთა და დიდთა მეფეთა ჩუენთა: ვახტანგ გორგასალისა, დავით აღმაშენებელისა, დემეტრე–დამიანეისა, თამარისა და სოლომონისაითა; წმიდისა ილია მართლისა, ექვთიმე ღმრთისკაცისა და ექვთიმე აღმსაარებლისაითა; წმიდათა აღმსარებელთა მამათა ჩუენთა, იოვანეისი და გიორგი–იოანე ბეთანიელთა და ღირსისა მამისა ჩუენისა არქიმანდრიტისა გაბრიელისა, აღმსაარებელისა და სალოსისაითა; წმიდათა და მართალთა მშობელთა ღმრთისაითა იოაკიმ და ანნაისითა (და წმიდისა სახელი, რომლისა არს ტაძარი და დღის წმიდანი მოიხსენიოს), და წმიდისა დიდისა მღდელმთავრისა, შანხაისა და სან–ფრანცისკოს მთავარეპისკოპოსისა იოანესი, განმანათლებლისა და საკვირველმოქმედისაითა, და ყოველთა წმიდათა შენთაითა გევედრებით შენ, მრავალ–მოწყალეო ღმერთო, შეისმინე ჩუენ ცოდვილთა ვედრებაი, და შეგვიწყალენ ჩუენ.
მგალობელთა: უფალო, შეგჳწყალენ (12-გზის).
მღდელმან: წყალობითა და მოწყალებითა და კაცთმოყუარებითა მხოლოდშობილისა ძისა შენისაჲთა, რომლისა თანა კურთხეულ ხარ, თანა ყოვლადწმიდით, სახიერით, და ცხოველსმყოფელით სულით შენითურთ, აწ და მარადის და უკუნითი უკუნისამდე.
მგალობელთა: ამინ.
გალობა 7, კურთხეულარსა
ძლისპირი: უფროისად ამაღლებულმან ღმერთმან მამათა ჩუენთამან სახუმილი მოტყინარეი ყრმათა მათ განუქარვა და იგინი ღაღადებდეს: ღმერთო, შენ კურთხეულ ხარ.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
იხილეს რაი უშიშოებაი თქუენი უსჯულოთა, მოკრიბნეს შეშაი გარემო ეკლესიისა, და შეგყარნეს რაი წმიდაი კრებული მას შინა, ერთურთსა განამხნობდით და აკურთხევდით ღმერთსა.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
ესმათ რაი ლოცვაი თქუენი, აღაგზეს ბარბაროსთა ცეცხლი, და ალი და კუამლი სიმაღლედ აღვიდოდა, ხოლო თქუენ მონანი უფლისანი, ევედრებოდით მას შეწყნარებასა სასუფეველსა მისსა.
დიდებაი მამასა და ძესა და წმიდასა სულსა.
ხედევდით რაი, წინა-მდებარეთა მათ სატანჯუელთა მამანი და დედანი, და კრებული სამღდელოთა და ერთაი, მზა იყუენით მსხუერპლ შეწირუად წინაშე ზეციერისა საკურთხეველისა.
აწ და მარადის და უკუნითი უკუნისამდე, ამინ.
აღმოგვიბრწყინდა ჩუენ შენ მიერ მზეი იგი დაუღამებელი, ღრუბელო ბრწყინვალეო, ქრისტე ღმერთი ჩუენი, განმანათლებელი უმეცრებისა ბნელსა შინა მყოფთა, ღმრთისმშობელო.
გალობა 8, აკურთხევდითსა
ძლისპირი: შენ, მხოლოსა, დამბადებელსა ყოველთასა გალობაი სულიერი გიღაღადეს ყრმათა: ყოველნი საქმენი უფალსა უგალობდით და ამაღლებდით მას უკუნისამდე.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
დაიწვით რაი ეკლესიასა შინა, პატივ-გცათ ღმერთმან, მარტვილნო, და იატაკთა ზედა დაიბეჭდნეს რაი ხატნი ასოთა თქუენთანი, აჰა, აწ კუალად ჰქადაგებენ ძლევისმოყუარებასა თქუენსა.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
ვითარცა წმიდანი ტარიგნი და ვერძნი, ეკლესიასა შინა შეიწირნეთ რაი ღმრთისა მიმართ, ნეტარნო, სულნი თქუენნი აღმაღლდენ ზეცად, და სიწმიდეი შეიმოსეს ნეშტთა თქუენთა.
დიდებაი მამასა და ძესა და წმიდასა სულსა.
ვითარცა შესაწირავი დიდი, მსხუერპლი ეგე სათნო იყო ღმერთმან და დაადგა რაი ნათელი, აღივსო ეკლესიაი იგი სუნნელებითა უხრწნელითა.
აწ და მარადის და უკუნითი უკუნისამდე, ამინ.
შენ მიერ ჩუენთვის ხორცშემოსილმან ღმერთმან, შენ, წმიდაი და ყოვლად უბიწოი, ყოვლისა ნათესავისა ჩუენისა საღმრთო შუამდგომელ გამოგაჩინა, ქალწულო, ამისთვის მორწმუნენი ხმამაღლად გიგალობთ შენ.
გალობა 9, ადიდებდითსა
ძლისპირი: ესაია, მხიარულ-იყავ, ქალწულმან მუცლად-იღო, და შვა ძეი დაუსაბამოი ევმანუელ, ღმერთი და კაცი, აღმოსავალ სახელი მისი. მას ვადიდებდეთ, და რომელმან შვა იგი, ვნატრიდეთ.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
აწ განსცხრებოდე ქართველთა ეკლესიაო, რამეთუ აღყუავენ სახედ შროშანთა სისხლითა ქვაბთახეველთა მოწამეთაითა, და შეუთხზენ ქებაი ღირსთა მათ ქებისათა.
წმიდანო მოწამენო, ქვაბთახევსა მოწყვედილნო, ევედრეთ ღმერთსა ჩუენთვის.
ვითარ წინაპარნი ჩუენნი მიისწრაფდენ ქუაბთახევისა სავანესა, და თქუენ მიერ მიიღებდეს მადლსა და წყალობასა, აწ ჩუენცა მოვიწევით ვედრებად შეწევნისა თქუენისა და დიდებად ღმრთისა.
დიდებაი მამასა და ძესა და წმიდასა სულსა.
სისხლმან თქუენმან, ქრისტეისთვის დათხეულმან შუენიერად მეწამულ-ყო ეკლესიაი ქართველთაი, ამისთვის ხსენებასა თქუენსა აღასრულებს და გვიწესს ქებად თქუენდა და დიდებად ღმრთისა.
აწ და მარადის და უკუნითი უკუნისამდე, ამინ.
შენ სასანთლედ ბრწყინვალედ წინაისწარმეტყუელმან წინაით გიხილა, ღმრთისმშობელო, მქონებელი ქრისტეის, გონიერისა მის სანთლისა, რომლისა მიერ განვნათლდით ჩუენ სიბნელესა შინა ვნებათასა მდებარენი, ამისთვის გნატრით შენ, ქალწულო.
მგალობელთა: ღირს-არს ჭეშმარიტად, რათა გადიდებდეთ, შენ ღვთისმშობელო, რომელი მარადის სანატრელ იქმენ, ყოვლად-უბიწოდ და დედად ღვთისა ჩვენისა. უპატიოსნესსა ქერუბინთასა, და აღმატებით უზესთაესსა სერაბინთასა, განუხრწნელად მშობელსა სიტყვისა ღვთისასა, მხოლოსა ღვთისმშობელსა გალობით გადიდებდეთ. ("ღირს - არს" - ის ნაცვლად საკითხავი საგალობლები)
მღვდელმან აკმიოს.
მკითხველმან: ეჰა, ვითარ დიდ-არს ძლევაი ბრწყინვალეი, რომელი აჩუენეთ ხორცთა შინა მყოფთა, ვითარცა უხორცოთა, და მძლედ გამოსჩნდით წინაშე ღმრთისა, აწ ჩუენცა შეგვეწიეთ წინაშე მისა, მარტვილნო სანატრელნო, რაითა სულთა ჩუენთა წყლულებანი განჰკუროს და სიმრთელეი მოანიჭოს ხორცთა ჩუენთა.
მამულისა ცისკიდეთა ჟამსა ძნელბედობისა მისისასა, ვითარცა მნათობნი ელვარენი აღმობრწყინდით რაი უგუნურთა შემწირველთა მიერ თქუენთა მახვილითა და ცეცხლითა, აწ ჩუენცა მოვისწრაფით ადგილსა მას მოწამეობისა თქუენისასა, და გევედრებით შეწევნასა წინაშე ღმრთისა, რაითა დასცეს ყოველნი მტერნი და მბრძოლნი ქრისტეანობისაი და დააცხროს ღელვანი იგი ვნებათანი, და ალმური წუალებისაი ოხითა თქუენითა.
თანა-მოწამე იქმენით და თანა-ზიარნი ურთიერთარს, დედანო და მამანო, ქვაბთახევს მოწყვედილნო, რომელნი შესწირვიდით თავთა თვისთა საკურთხეველსა ზედა ცეცხლისასა, წინაშე ქრისტეის ღმრთისა, მისგანვე ითხოვეთ აწ ერისა ჩუენისათვის, რაითა დაიფაროს ზედადასხმისაგან მტერისა და ძმათა შორის ბრძოლისაგან და დაიცვას ეკლესიაი ჩუენი შეურყეველად.
კურთხეულ არს ქრისტე, რომელმან ღირს გყვნა თქუენ მოწამეთა დასთა შეერთებასა და მსგავსად მათსა პატივ გცნა რაი გვირგვინითა ძლევისაითა, აწ ჩუენცა შეგვაწყნარეთ საყუარელსა დედასა მისსა, ქალწულსა ღმრთისმშობელსა, ნუ განგვაშორებს მეოხებასა მისსა წილხვედრთა თვისთა, არამედ აღაგზოს გულსა შინა ჩუენსა საღმრთოი ცეცხლი მოშურნეობისაი, რაითა არცაღა განმცემელ ვექმნნეთ სიქადულსა ჩუენსა მართლმადიდებლობასა, და მარადის ვაქებდეთ ყოვლადწმიდასა სამებასა:
წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.
უფალო შეგვიწყალენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.
მღვდელმან: რამეთუ შენი არს სუფევა, ძალი და დაიდება, მამისა და ძისა და წმიდისა სულისა, აწ და მარადის და უკუნითი უკუნისამდე.
მგალობელთა: ამინ.
მკითხველმან: მიწყალენ ჩუენ, უფალო, შემიწყალენ ჩვენ, რამეთუ ყოველსავე სიტყვის-მიცემისაგან უღონო ვართ, გარნა ამას ვედრებასა შენ, მეუფისა სახიერისა, ცოდვილნი ესე შევსწირავთ. მიწყალენ ჩუენ, უფალო, შეგვიწყალენ ჩუენ.
დიდება მამასა და ძესა და წმიდასა სულსა.
უფალო, შემიწყალენ ჩუენ, რამეთუ შენ გესავთ, ნუ განმირისხდები ჩუენ ფრიად, და ნუცა მოიხსენებ უსჯულოებათა ჩუენთა, არამედ მოიხილე ჩუენზედა წყალობით, ვითარცა სახიერ ხარ, და გვიხსენ ჩუენ სამართლად რისხვისაგან შენისა, რამეთუ შენ ხარ ღმერთი ჩუენი, და ჩუენ ვართ ერნი შენნი, ყოველნივე ქმნულნი ხელითა შენთანი ვართ და სახელი შენი წოდებულ არს ჩუენზედა, და შემიწყალენ ჩუენ.
აწ და მარადის, და უკუნითი უკუნისამდე, ამინ.
მოწყალების კარი განგვიღე, კურთხეულო ღმრთისმშობელო, რათა, რომელნი ესე შენ გესავთ, არა დავეცნეთ, არამედ განვერნეთ წინააღმდგომთა მტერთაგან, რამეთუ შენ ხარ ცხოვრება ნათესავისა ქრისტიანეთასა.
მცირე მრჩობლი კვერექსი
დიაკონმან: შეგჳწყალენ ჩუენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით, მოწყალებისა, სიცოცხლისა, მშჳდობისა, სიმრთელისა, დღეგრძელობისა, მყუდროებისა, განათლებისა, ცხორებისა, შეწევნისა, შენდობისა და ცოდვათა მოტევებისათჳს ყოველთა შვილთა ჩუენისა ეკლესიისა, რაჲთა დაიცვას უფალმან ღმერთმან ჩუენმან სამეუფოჲ ქალაქი ესე ჩუენი და წმიდაჲ ესე მონასტერი (ანუ ეკლესია) და ყოველი სოფელი სიყმილისაგან, სრჳსა, ძრჳსა, მახჳლისა, ზედა მოსლჳსაგან უცხო თესლთასა და ყოვლისაგან ბოროტისა; რაჲთა მოწყალე გუექმნეს ჩუენ ღმერთი კეთილად დგომისათჳს სახიერებითა და კაცთმოყუარებითა თჳსითა, და გარე წარაქციოს რისხვაჲ, მარადის ჩუენ ზედა მომავალი, და გჳჴსნეს ჩუენ სამართლად ჩუენ ზედა მოწევნულისა რისხვისაგან, და შეგჳწყალნეს ჩუენ.
მგალობელთა: უფალო, შეგჳწყალენ (12-გზის).
მღდელმან: შეისმინე ჩუენი, ღმერთო, მაცხოვარო ჩუენო, სასოო ყოველთა კიდეთა ქუეყანისათაო, და რომელნი არიან ზღუათა შინა შორს და ცასა შინა, და მლხინებელ, და მოწყალე ექმენ შეცოდებათა ჩუენთა, და შეგჳწყალენ ჩუენ, რამეთუ მოწყალე და კაცთმოყუარე ღმერთი ხარ და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის, და უკუნითი უკუნისამდე.
მგალობელთა: ამინ.
დიაკონმან: მუხლმოდრეკით უფლისა მიმართ ვილოცოთ.
მგალობელთა: უფალო, შეგჳწყალენ.
კვერექსის ნაცვლად ერისკაცი იტყვის – უფალო, შეგვიწყალენ 3-გზის. დიდებაი… აწდა…
სავედრებელი ლოცვა
ჰოი, ეკლესიისა ჩუენისა შეურყეველნო გოდოლნო და მართლმადიდებლობისა სუეტნო საღმრთონო – დედანო და მამანო, ყრმანო, ჭაბუკნო და მხცოვანნო, და მთავარნო ჩინებულნო, აზნაურნო, და გლახაკნო, მარტვილობისა გვირგვინითა განშუენებულნო, მვედრებელთა თქუენთა მსწრაფლშემწენო და წყალობისა მომნიჭებელნო, ყოვლად ნეტარნო ქვაბთახეველნო მოწამენო!
ჰოი, სულისა წმიდითა განრწყინებულნო და პატივისმცემელთა თქუენთა მსწრაფლ-შემწენო, ქვაბთახეველნო მოწამენო, მოგვიხსენეთ წინაშე მაცხოვრისა და ღმრთისა ჩუენისა, რომლისა სიყუარულითა სისხლი დასთხიეთ, სანატრელნო, რაითა წყალობითა მოჰხედოს დედისა თვისისა წილხდომილსა ერსა ჩუენსა, მტვირთველსა საუფლოისა ჯუარისასა ქუეყანასა ზედა, და აღგვავსოს მაცხოვნებელითა მღვიძარებითა და კუალად აღგვიდგინოს საღმრთოი მოშურნეობაი მამულისაი, სიმართლისა სიყუარული და მხნეობაი სულისაი; განაძლიეროს მსახურებასა შინა უწმიდესი და უნეტარესი, სრულიად საქართველოის კათალიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი, დიდი მეუფეი, მამაი ჩუენი ილია, ყოვლადსამღდელონი მიტროპოლიტნი, მთავარეპისკოპოსნი და ეპისკოპოსნი, ყოველნი სამღდელო და სამონაზვნო წესნი და ყოველნი მართლმადიდებელნი ქრისტეანენი. განანათლეოს ქრისტეისმოყუარე მთავრობაი და მხედრობაი მისი დაიცვას პატიოსნითა მეოხებითა თქუენითა.
ჰოი, კრებულო საღმრთოო, ერთითა წმიდითა განზრახვითა შეერთებულნო ქვაბთახეველნო მოწამენო, იმეოხეთ წინაშე ღმრთისა, აღმოგვიყვანოს სიღრმეთაგან ცოდვათასა და გვიხსნას სიყმილისაგან, სრვისა, ძრვისა, ცეცხლისა, მახვილისა, განმხრწნელისაგან ქარისა, ზედა მოსლვისაგან უცხო თესლთაისა და ძმათა შორის ბრძოლისაგან, უცნაურისა სენისა და სიკუდილისაგან, და ყოვლისაგან ბოროტისა, რაითა უბრკოლველად თანა-წარვხდეთ საცთურთა მათ საწუთოისათა, და მარადის შენთანა უგალობდეთ მამასა, ძესა და სულსა წმიდასა, აწ და მარადის, და უკუნითი უკუნისამდე,
მგალობელთა: ამინ.
დიაკონმან: სიბრძნით! ყოვლადწმიდაო ღმრთისმშობელო, გუაცხოვნენ ჩუენ.
მგალობელთა: უპატიოსნესსა ქერუბიმთასა და აღმატებით უზესთაესსა სერაბინთასა, განუხრწნელად მშობელსა სიტყჳსა ღმრთისასა, მხოლოსა ღმრთისმშობელსა გალობით გადიდებდეთ.
მღდელმან: დიდებაჲ შენდა, ღმერთო ჩუენო, დიდებაჲ შენდა.
მგალობელთა: დიდებაჲ მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
უფალო, შეგჳწყალენ (3-გზის).
სახელითა უფლისათა, უწმიდესო და უნეტარესო მეუფეო გუაკურთხენ.
მღვდელმან: უფალო იესუ ქრისტე, ძეო ღმრთისაო, ლოცვითა ყოვლად წმიდისა დედისა შენისათა, ღირსთა და ღმერთშემოსილთა მამათა ჩვენთათა და ყოველთა წმიდათა შენთათა, შეგვიწყალენ ჩვენ, ამინ.
მგალობელთა: ამინ. უფალო, შეგჳწყალენ (3-გზის).
დიდებაი მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
უფალო, შეგვიწყალენ (3-გზის),
უფალო, იესუ ქრისტე, ძეო ღმრთისაო, ლოცვითა ყოვლადწმიდისა დედისა შენისაითა, და ყოველთა წმიდათაითა, შეგვიწყალენ ჩუენ, ამინ.
უფლისა მიერ ერთობითა მიებოძნეთ რაი ივერიელთა, ვითარცა სულთა და ხორცთა მკურნალნი და შემწენი განსაცდელთა შინა, აწ ჩუენცა თაყუანისვჰსცემთ წმიდასა ხატსა თქუენსა და გევედრებით: გვიმეოხეთ წინაშე ღმრთისა, ჰოი, მარტვილნო საკვირველნო, ქვაბთახევისა სავანესა მოწყვედილნო, რაითა დანერგოს ჩუენ შორის შიში და მოძაგებაი ცოდვისაი და ღირს გვყოს სასუფეველსა თვისსა.
დედოფალო, ყოვლად ბრწყინვალეო მარიამ, ლოცვითა მრავალ-ბევრთაგან შეკრებულთა და ქვაბთახევისა ტაძარსა წამებულთა მარტვილთაითა წარგვიმართენ დღენი ცხორებისა ჩუენისანი, სადიდებელად ძისა შენისა და ღმრთისა ჩუენისა, ამინ.
შემდგენელი: თინათინ მჭედლიშვილი