მთავარი
ლოცვანი
ფსალმუნნი
ახალი აღთქმა
ძველი აღთქმა
დაუჯდომლები
პარაკლისები
განმარტებები
სხვადასხვა თემები
წიგნის შესახებ
მთავარი
ლოცვანი
ფსალმუნნი
ახალი აღთქმა
ძველი აღთქმა
დაუჯდომლები
პარაკლისები
განმარტებები
სხვადასხვა თემები
წიგნის შესახებ
მღვდელმან: კურთხეულ არს ღმერთი ჩუენი, ყოვლადვე, აწ და მარადის და უკუნითი უკუნისამდე.
მკითხველმან: ამინ. დიდება შენდა, ღმერთო ჩვენო, დიდება შენდა.
მეუფეო ზეცათაო, ნუგეშინისმცემელო, სულო ჭეშმარიტებისაო, რომელი ყოველგან ხარ და ყოველსავე აღავსებ მადლითა შენითა, საუნჯეო კეთილთაო, მომნიჭებელო ცხოვრებისაო, მოვედ და დაემკვიდრე ჩვენს შორის და წმიდა მყვენ ჩვენ ყოვლისაგან ბიწისა და აცხოვნენ, სახიერო, სულნი ჩვენნი.
წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.
უფალო შეგვიწყალენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.
მღვდელმან: რამეთუ შენი არს სუფევაჲ, ძალი და დიდებაჲ აწ და მარადის და უკუნითი უკუნისამდე.
მგალობელთა: ამინ.
უფალო შეგვიწყალენ (12–ჯერ).
1. უფალო, შეისმინე ლოცვისა ჩემისაი, ყურად-იღე ვედრებაი ჩემი ჭეშმარიტებითა შენითა, შეისმინე ჩემი სიმართლითა შენითა;
2. და ნუ შეხუალ სასჯელსა მონისა შენისა თანა, რამეთუ არა განმართლდეს შენ წინაშე ყოველი ცხოველი.
3. რამეთუ დევნა მტერმან სული ჩემი და დაამდაბლა ქუეყანად ცხოურებაი ჩემი, დამსუა მე ბნელსა შინა, ვითარცა მკუდარი საუკუნოი.
4. და მოეწყინა ჩემ თანა სულსა ჩემსა, და ჩემ შორის შემიძრწუნდა გული ჩემი.
5. მოვიხსენე დღეთა პირველთაი და ვიწურთიდ ყოველთა მიმართ საქმეთა შენთა და ქმნულსა ხელთა შენთასა ვზრახევდ.
6. განვიპყრენ შენდამი ხელნი ჩემნი, და სული ჩემი ვითარცა ქუეყანაი ურწყული შენდამი.
7. მსთუად შეისმინე ჩემი, უფალო, რამეთუ მოაკლდა სულსა ჩემსა, ნუ გარე-მიიქცევ პირსა შენსა ჩემგან, და ვემსგავსო მათ, რომელნი შთავლენან მღვიმესა.
8. მასმინე მე განთიად წყალობაი შენი, რამეთუ მე შენ გესავ; მაუწყე მე, უფალო, გზაი, რომელსაცა ვიდოდი, რამეთუ შენდამი აღვიღე სული ჩემი.
9. მიხსენ მე მტერთა ჩემთაგან, უფალო, რამეთუ შენ შეგევედრე.
10. მასწავე მე, რაითა ვყო ნებაი შენი, რამეთუ შენ ხარ ღმერთი ჩემი, სული შენი სახიერი მიძღოდენ მე ქუეყანასა წრფელსა.
11. სახელისა შენისათვის, უფალო, მაცხოვნო მე და სიმართლითა შენითა გამოიყვანო ჭირისაგან სული ჩემი.
12. და წყალობითა შენითა მოსრნე მტერნი ჩემნი და წარსწყმიდნე ყოველნი მაჭირვებელნი სულისა ჩემისანი, რამეთუ მე მონაი შენი ვარ.
გვაცხოვნენ ჩუენ, ყოველთა დედოფალო, მადლისა შენისა მეძიებელნი სურვილითა, და ყოველთა სნეულებათა და ვნებათაგან გამოგვიხსენ მოლტოლვილნი სიხარულისმომნიჭებელისა ხატისა მომართ შენისა, ხოლო სამწყსოი შენი, ყოვლითურთ შენდა მსასოებელი, დაიცევ ყოველთა განსაცდელთა და სენთაგან.
დიდება მამასა და ძესა და წმიდასა სულსა.
გვაცხოვნენ ჩუენ, ყოველთა დედოფალო, მადლისა შენისა მეძიებელნი სურვილითა, და ყოველთა სნეულებათა და ვნებათაგან გამოგვიხსენ მოლტოლვილნი სიხარულისმომნიჭებელისა ხატისა მომართ შენისა, ხოლო სამწყსოი შენი, ყოვლითურთ შენდა მსასოებელი, დაიცევ ყოველთა განსაცდელთა და სენთაგან.
აწ და მარადის და უკუნითი უკუნისამდე, ამინ.
არასადა დავსდუმნეთ, ღმრთსმშობელო, ძლიერებათა შენთა ქებად, უღირსნი ესე მონანი შენნი. რამეთუ არათუმცა შენ გვფარევდი ოხითა შენითა, ვინმცა სადა გვიხსნნა ჩუენ ესოდენთა ჭირთაგან; ანუ ვინმცა დაგვიცვნა ჩუენ აქამომდე ფლობილად? არასადა განგეშორნეთ ჩუენ, დედუფალო კურთხეულო, რამეთუ შენ იხსნი სულთა ჩუენთა ყოველთა განსაცდელთაგან.
ფსალმუნი 50
1. მიწყალე მე, ღმერთო, დიდითა წყალობითა შენითა და მრავლითა მოწყალებითა შენითა ახოცე უშჯულოებაი ჩემი.
2. უფროის განმბანე მე უშჯულოებისა ჩემისაგან და ცოდვათა ჩემთაგან განმწმიდე მე.
3. რამეთუ უშჯულოებაი ჩემი მე უწყი, და ცოდვაი ჩემი წინაშე ჩემსა არს მარადის.
4. შენ მხოლოსა შეგცოდე და ბოროტი შენ წინაშე ვყავ; რაითა განმართლდე სიტყუათაგან შენთა და სძლო შჯასა შენსა.
5. რამეთუ ესერა უშჯულოებათა შინა მიუდგა და ცოდვათა შინა მშვა მე დედამან ჩემმან.
6. რამეთუ ესერა ჭეშმარიტებაი შეიყუარე, უჩინონი და დაფარულნი სიბრძნისა შენისანი გამომიცხადენ მე.
7. მასხურო მე უსუპითა და განვწმიდნე მე, განმბანო მე და უფროის თოვლისა განვსპეტაკნე.
8. მასმინო მე გალობაი და სიხარული, და იხარებდენ ძუალნი დამდაბლებულნი.
9. გარე-მიაქციე პირი შენი ცოდვათა ჩემთაგან და ყოველნი უშჯულოებანი ჩემნი ახოცენ.
10. გული წმიდაი დაჰბადე ჩემ თანა, ღმერთო, და სული წრფელი განმიახლე გუამსა ჩემსა.
11. ნუ განმაგდებ მე პირისა შენისაგან და სულსა წმიდასა შენსა ნუ მიმიღებ ჩემგან.
12. მომეც მე სიხარული მაცხოვარებისა შენისაი და სულითა მთავრობისათა დამამტკიცე მე.
13. ვასწავლნე უშჯულოთა გზანი შენნი და უღმრთონი შენდა მოიქცენ.
14. მიხსენ მე სისხლთაგან, ღმერთო, ღმერთო ცხორებისა ჩემისაო, იხარებდეს ენაი ჩემი სიმართლესა შენსა.
15. უფალო, ბაგენი ჩემნი აღახუნე, და პირი ჩემი უთხრობდეს ქებულებასა შენსა.
16. რამეთუ უკეთუმცა გენება, მსხუერპლი შე-მცა-მეწირა, არამედ საკუერთხი არა გთნდეს.
17. მსხუერპლი ღმრთისა არს სული შემუსრვილი, გული შემუსრვილი და დამდაბლებული ღმერთმან არა შეურაცხ-ჰყოს.
18. კეთილი უყავ, უფალო, ნებითა შენითა სიონსა და აღეშენნენ ზღუდენი იერუსალემისანი.
19. მაშინ გთნდეს მსხუერპლი სიმართლისაი, შესაწირავი და ყოვლად-დასაწუელი; მაშინ შეიწირნენ საკურთხეველსა შენსა ზედა ზუარაკნი.
გალობაი 1, უგალობდითსა
ძლისპირი: აღვაღებ პირსა ჩემსა, რაითა აღივსოს სულითა და აღმოთქუას დიდებაი დედისა და დედოფლისაი, და სიხარულითა ვუგალობდე სასწაულთა შენთა.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
მოვედით მორწმუნენო, და შეუვრდეთ მოწყალესა დედასა და ყოველთა დედოფალსა „პანტანასას“, რამეთუ უმეტეის სასოებისა ნუგეშინისცემს და კურნებს ყოველთა მწუხარეთა და სნეულთა.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
ვითარცა მაცხოვნებელი წყაროი, ცუარსა მას ნუგეშისასა გარდამოუდინებს წმიდაი ხატი ეგე შენი ღირსებით თაყუანისმცემელთა მისთა და ასუმევს მათ წყალსა ცხორებისასა.
დიდებაი მამასა და ძესა და წმიდასა სულსა.
მცნობნი ურიცხუთა საკვირველებათა შენთა, ჰოი, ყოველთა დედოფალო `პანტანასა~, სურვილითა შეგიტკბობთ და გევედრებით, რაითა გვიხსნნე ჩუენ ყოველთა სენთა და ვნებათაგან.
აწ და მარადის და უკუნითი უკუნისამდე, ამინ.
საკვირველ არიან, უფალო, საქმენი შენნი, რამეთუ მოჰმადლე შენ სოფელსა საღმრთოი ყრმაი, ქალწული მარიამი, რომელ ყოველთა ტომთაგან აღირჩიე საცხოვნებელად კაცთა ნათესავისა.
გალობა 3, განძლიერდასა
ძლისპირი: ცხოველო და უშურველო წყაროო მგალობელთა შენთაო, სულითა განამტკიცე გუნდი მოსავთა შენთაი, და ღირს ჰყავ გვირგვინსა დიდებისასა ღმრთეებრივითა დიდებითა შენითა.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
საწუთოისა ცხორებისა ნაღველსა და ღელვათა მრავალსახეთა დაატკბობ დედობრივითა მეოხებითა შენითა, უბიწოო, და განსაცდელსა შინა მოგვივლენ შეწევნასა ხატისა მიერ შენისა.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
ნუ გარე-მიიქცევ პირსა შენსა ჩუენგან, რომელნი შეუვრდებით სასწაულთმოქმედსა ხატსა შენსა „პანტანასას“, და გევედრებით: უსძლოო დედოფალო, დაგვიფარენ ყოველთა ძვირთა და ურვათაგან.
დიდებაი მამასა და ძესა და წმიდასა სულსა.
ვითარცა მხურვალესა შემწესა გევედრებით, ყოველთა დედოფალო, ნათესავთა და მოყუასთა ჩუენთათვის, რაითა უკურნებელთა სენთაგან განჰკურნო, (სახელები) და მიჰმადლო შუებაი და ლხინებაი.
აწ და მარადის და უკუნითი უკუნისამდე, ამინ.
ჰოი, ყოველთა დედოფალო, დაგვიფარენ ჩუენ პატიოსანითა ომოფორითა შენითა, და ბნელნი იგი ღრუბელნი ურვათა ჩუენთანი განაქარვე ნათლისმფენელთა სხივთა მიერ მადლისა შენისაისა.
მრჩობლი კვერექსი
დიაკონმან: შეგჳწყალენ ჩვენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით ღმრთივ–დაცულისა ერისა ჩუენისა და მეუფებისა მისისათჳს (მთავრობისა და მხედრობისა) მისისათჳს.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით უწმიდესისა და უნეტარესისა, სრულიად საქართველოს კათოლიკოს–პატრიარქისა და მცეთა–თბილისის მთავარეპისკოპოსისა და ბიჭვინთისა და ცხუმ–აფხაზეთის მიტროპოლიტისა, დიდისა მეუფისა, მამისა ჩუენისა ილიასათჳს, და ყოვლადუსამღვდელოესისა... (აქა მოიხსენეთ ადგილობრიბი მღვდელმთავარი), და ყოველთა ქრისტეს მიერ ძმათა ჩუენთათვის.
მგალობელთა: უფალო, შეგჳწყალენ (3-გზის).
დიაკონმან: მერმეცა ვევედრნეთ უფალსა ღმერთსა ჩუენსა, რაითა შეიწყალნეს... (აქა მოიხსენეთ სახელდებით ისინი, ვისთვისაც ევედრებით ღმერთს).
მგალობელთა: უფალო, შეგჳწყალენ (3-გზის).
დიაკონმან: განამრავლე, უფალო, ჟამნი და წელნი ცხოვრებისა მათისანი, და იხსნენ იგინი, უფალო, ყოვლისაგან ჭირისა, რისხვისა და იწროებისა, და ყოვლისაგან წყლულებისა სულისა და ხორცთასა, და მიუტევენ მათ ყოველნი შეცოდებანი მათნი, ნებსითნი და უნებლიეთნი.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით ყოველთა ძმათა და ყოველთა ქრისტიანეთათჳს.
მგალობელთა: უფალო, შეგჳწყალენ (3-გზის).
მღვდელმან: რამეთუ მოწყალე და კაცთმოყვარე ღმერთი ხარ, და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის და უკუნითი უკუნისამდე.
მგალობელთა: ამინ.
წარდგომა
ვითარცა ხარი შენ სასოი და მფარველი ჩუენი შემდგომად ღმრთისა, ეგრეთცა სასწაულთმოქმედი ხატი ესე შენი „ყოველთა დედოფალი – პანტანასა“ გუაქუს ჩუენ, ვითარ უსასყიდლოი მკურნალი სულთა და ხორცთაი, და გევედრებით: შეგვეწიე ვნებათა და ბოროტთა განსაცდელთა შინა დანთქმულთა, და გვიხსენ ყოველთა ძვირთა და სალმობათაგან.
გალობა 4, მესმასა
ძლისპირი: იესუ, მჯდომარე დიდებით საყდართა ღმრთეებისათა, მოვიდა ღრუბლითა სულმცირითა, რომელ არს ქალწული გამოუცდელი ხსნად ჩუენდა, მღაღადებელთა: დიდებაი ძალსა შენსა, მხსნელო ჩუენ ყოველთაო.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
ოდეს ჭაბუკი ვინმე, დანთქმული წყუდიადსა შინა გრძნებისასა, მიიწია ვატოპედისა სავანესა, შევრდომითა თაყუანისცა წმიდასა ხატსა შენსა „პანტანასას“, და გამოჰკრთა რაი მისგან ელვაი ნათლისაი, ვითარცა უსულოი, ქუე-დააკუეთა.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
გულისხმა-ყო ჭაბუკმან, ბოროტისაგან შეპყრობილმან, ვითარმედ ძალი შენი სძლევს უკეთურებათა მტერისათა, და აქებდა შენ მიერ გამოუთქუმელად შობილსა ძესა და ღმერთსა ყოველთასა, მას ევედრე, აწ ჩუენცა დაგვიცვას და განგვარინოს მანქანებათაგან ეშმაკისა.
დიდებაი მამასა და ძესა და წმიდასა სულსა.
საშინელი ძლიერებაი ხატისა შენისაი აჩუენე რაი კაცსა მას ვნებულსა, ცოდვანი თვისნი მსწრაფლ შეინანა, და დემკვიდრა ვატოპედისა მონასტერსა, რაითა ლოცვითა და ღუაწლითა განიწმიდოს თავი თვისი მწიკულისაგან.
აწ და მარადის და უკუნითი უკუნისამდე, ამინ.
გიხაროდენ, ღმრთივაღრჩეულო ყრმააო, სიყრმითგანვე აღზრდილო ტაძარსა შინა, აწ ჩუენცა ღირს-გვყავ ტაძარსა შინა ღმრთისასა წმიდათა საიდუმლოთა ზიარებისა, საკურნებელად სულთა ჩუენთა, და ჟამსა აღსასრულისასა განგვიხუენ ჩუენ ბჭენი სასუფეველისანი და წარგვიძეღუ ზეციერსა ტაძარსა ძისა შენისასა.
გალობა 5, ღამითგანსა
ძლისპირი: შეძრწუნდებიან ყოველნი ღმრთეებრივითა დიდებითა შენითა, რამეთუ შეიწყნარე მუცელსა შენსა ღმერთი ყოველთაი, უქორწინებელო სძალო, და შევ უჟამოი ძეი, რომელმან ყოველთა მგალობელთა შენთა მოგუმადლე მშვიდობაი.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
იხარებდენ მამანი გამობრწყინებასა წმიდისა ხატისა შენისასა, რამეთუ ესევითარი სასწაული ჩუენებულ იყო შეწევნისათვის შეცთომილთა და ვნებულთა, აწ ჩუენცა განგვარინე ყოვლისაგან საფრხისა და გვიხსენ ცოდვათაგან.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
აღასრულებდი რაი ნიშთა და კურნებათა ხატისა მიერ შენისა, გულისხმა-ყვეს სავანისა მის მოსაგრეთა, ვითარმედ ხარი შენ მკურნალი დიდი, მფარველი მტკიცეი და ზედამხედველი მათთვის, რომელნი სასოებენ შეწევნასა შენსა და მადლობენ ღმერთსა.
დიდებაი მამასა და ძესა და წმიდასა სულსა.
წმიდაი და ელვარექმნილი ხატი შენი განითქუა რაი ყოველსა ქუეყანასა, მრავალნი მიივლტოდენ ხილვად მისდა, და ეძიებდენ შენგან დაცვასა და წყალობასა, აწ ჩუენცა მოგვანიჭე მადლი, და კურთხევაი, და წარგვიმართე გზისა მიმართ ცხორებისა.
აწ და მარადის და უკუნითი უკუნისამდე, ამინ.
გიხაროდენ, ყოვლადქებულო დედოფალო, ცისკარო, შენ მიერ სულთა ჩუენთათვის აღმობრწყინებულისა ნათლისა მიმართ წარმმართებელო, რომელმან შევ მზეი სიმართლისაი ქრისტე, სიხარული და ხსნაი სოფლისაი.
გალობა 6, ღაღადყავსა
ძლისპირი: მოვედით, ღმრთივგანბრძნობილნო, აღვასრულოთ ღმრთეებრივი და ყოვლადპატიოსანი ესე დღესასწაული ღმრთისმშობლისაი, აღვიტყუელნეთ და ვადიდოთ მისგან შობილი ღმერთი.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
განდიდნა რაი ხატი ეგე უძლურთა კურნებითა და განწირულთა აღდგინებითა, მეფენი და მთავარნი ერთა თანა მიისწრაფდენ ხილვად მისდა, და მოიღებდენ აღსრულებასა კეთილთა თხოვათასა.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
ხედვიდეს რაი მამანი სასწაულთმოქმედსა ხატსა შენსა, განამრავლეს პირნი მისნი, ვითარცა ჭეშმარიტად უსასყიდლონი მკურნალნი ყოველთა მათდა შევრდომილთა და მადლობდენ უფალსა.
დიდებაი მამასა და ძესა და წმიდასა სულსა.
ვითარცა ყოვლად დიდებული „პანტანასა“ მიანიჭებს მოსავთა მისთა ნუგეშისცემასა, ეგრეთცა წმიდანი პირნი მისნი სიტკბოებითა შენითა აღმოგვიცენებენ სულთა და ხორცთა კურნებასა.
აწ და მარადის და უკუნითი უკუნისამდე, ამინ.
ჰოი, ტრედო წმიდაო, და კრაო უბიწოო, გამოუთქუმელად მშობელო საღმრთოისა მის ტარიგისა და მწყემსისაო, ყოველთა ანგელოსთა წესთა უმაღლესო, ევედრე ჩვენთვის ღმრთეებრივსა ძესა შენსა.
კონდაკი
წარდგომილნი წინაშე წმიდისა ხატისა შენისა, ლმობიერითა გულითა გიგალობთ შენ, ღმრთისმშობელო, და გევედრებით: დაგვიცევ ჩუენ საფარველითა მადლისა შენისაითა და გვიხსენ სნეულებათა და ჭირთაგან, რაითა ყოველნი სიხარულითა ვხმობდეთ შენდამო: გიხაროდენ, ყოვლადწმიდაო დედოფალო ყოველთაო, მსწრაფლშემწეო და მკურნალო მოსავთა შენთაო!
იკოსი
ანგელოზი მდგომარეი წინაშე პირსა ღმრთისასა ზეცითგან გარდამოხდა და გიხაროდენი უგალობა რაი ყოველთა დედოფალსა, ღმრთისამაუწყებელითა ხმითა უღაღადა: გიხაროდენ, აღსრულებაო საღმრთოისა განგებულებისაო; გიხაროდენ, წყაროო დაუშრეტელო სიხარულისაო და ცუარო მადლისაო; გიხაროდენ, სენთა მრავალფერთა დამხსნელო და დამნთქუმელო ყოველთა ვნებათაო; გიხაროდენ, ყუდროო ნავთასაყუდელო, შემწყნარებელო ტვირთმძიმეთა და მაშურალთაო; გიხაროდენ, ყოვლადწმიდაო დედოფალო ყოველთაო, მსწრაფლშემწეო და მკურნალო მოსავთა შენთაო!
დიაკონმან: სიბრძნით. მოხედენ.
მღდელმან: მშვიდობა ყოველთა.
მგალობელთა: და სულისაცა შენისა თანა.
დიაკონმან: წარდგომა ფსალმუნისაგან დავითისა: მოვიხსენო სახელი შენი ყოველსა შორის თესლსა და თესლსა..
მგალობელთა: მოვიხსენო სახელი შენი ყოველსა შორის თესლსა და თესლსა.
დიაკონმან: ისმინე, ასულო, და იხილე და მოყავ ყური შენი.
მგალობელთა: მოვიხსენო სახელი შენი ყოველსა შორის თესლსა და თესლსა.
დიაკონმან: მოვიხსენო სახელი შენი.
მგალობელთა: ყოველსა შორის თესლსა და თესლსა.
დიაკონმან: უფლისა მიმართ ვილოცოთ.
მგალობელთა: უფალო, შეგჳწყალენ.
მღდელმან: რამეთუ წმიდა ხარ შენ, ღმერთო ჩუენო, და რომელი წმიდათა შორის განისუენებ, და შენდა დიდებასა აღვავლენთ, მამისა, და ძისა და წმიდისა სულისა, აწ და მარადის, და უკუნითი უკუნისამდე,
მგალობელთა: ამინ.
დიაკონმან: ყოველი სული აქებდით უფალსა.
მგალობელთა: ყოველი სული აქებდით უფალსა.
დიაკონმან: აქებდით ღმერთსა წმიდათა შორის მისთა, აქებდით მას სამყაროთა ძალისა მისისათა.
მგალობელთა: ყოველი სული აქებდით უფალსა.
დიაკონმან: ყოველი სული.
მგალობელთა: აქებდით უფალსა.
დიაკონმან: ღირსყოფად ჩუენდა სმენად წმიდისა სახარებისა უფალსა ღმერთსა ჩუენსა ვევედრნეთ.
მგალობელთა: უფალო, შეგჳწყალენ (3-გზის).
დიაკონმან: სიბრძნით აღემართენით და ისმინეთ წმიდა სახარება.
მღვდელმან: მშჳდობაჲ ყოველთა.
მგალობელთა: და სულისაცა შენისა თანა.
დიაკონმან: ლუკასაგან წმიდისა სახარებისა საკითხავი.
მგალობელთა: დიდებაჲ შენდა, უფალო, დიდებაჲ შენდა.
დიაკონმან: მოხედენ.
სახარება ლუკასი
მათ დღეთა შინა აღდგა მარიამ და წარვიდა მთად კერძო მსწრაფლ ქალაქად იუდაისა. და შევიდა სახლსა ზაქარიაისსა და მოიკითხა ელისაბედ. და იყო ვითარცა ესმა ელისაბედს მოკითხვაი მარიამისი, ჰკრთებოდა ყრმაი იგი მუცელსა მისსა და აღივსო სულითა წმიდითა ელისაბედ და ხმა-ყო ხმითა დიდითა და თქუა: კურთხეულ ხარ შენ დედათა შორის და კურთხეულ არს ნაყოფი მუცლისა შენისაი. და ვინაი ჩემდა ესე, რაითა მოვიდეს დედაი უფლისა ჩემისაი ჩემდა. რამეთუ აჰა ესერა ვითარცა იყო ხმაი მოკითხვისა შენისაი ყურთა მომართ ჩემთა, ჰკრთებოდა ყრმაი ესე სიხარულით მუცელსა ჩემსა. და ნეტარ არს, რომელსა ჰრწმენეს, რამეთუ იყოს აღსრულებაი თქმულთაი მათ მისა მიმართ უფლისა მიერ. და თქუა მარიამ: ადიდებს სული ჩემი უფალსა, და განიხარა სულმან ჩემმან ღმრთისა მიმართ, მაცხოვრისა ჩემისა, რამეთუ მოხედნა სიმდაბლესა ზედა მხევლისა თვისისასა, რამეთუ აჰა ესერა ამიერითგან მნატრიდენ მე ყოველნი ნათესავნი, რამეთუ ყო ჩემ თანა დიდებული ძლიერმან, და წმიდა არს სახელი მისი. და დაადგრა მარიამ ელისაბედის თანა სამ თუე, და წარვიდა სახით თვისა.
მგალობელთა: დიდებაჲ შენდა, უფალო, დიდებაჲ შენდა.
მკითხველმან: დიდება მამასა და ძესა და წმიდასა სულსა.
მოწყალებითა შენითა, მრავალმოწყალეო ღმერთო, აღხოცე ცოდვათა ჩუენთა სიმრავლენი.
აწ და მარადის და უკუნითი უკუნისამდე, ამინ.
მეოხებითა წმიდისა ღმრთისმშობელისათა, მოწყალეო, აღხოცენ ცოდვათა ჩემთა სიმრავლენი.
მიწყალე მე, ღმერთო, დიდითა წყალობითა შენითა, და მრავლითა მოწყალებითა შენითა აღხოცენ უსჯულოებაჲ ჩემი და შემიწყალე მე, ღმერთო.
გერი: მოჰმადლე რაი წმიდაი ხატი შენი „პანტანასა“ ათონსა, წყალობისა მისისა შარავანდედითა განათლებულნი ღმრთისმოშიშებითა მივაგებთ პატივსა, ვითარცა სასოსა და ნუგეშინისმცემელსა ჩუენსა და გევედრებით: ყოველთა დედოფალო, მოჰმადლე მშვიდობაი სოფელსა და ერსა ჩუენსა ძლევაი ურიცხუთა მტერთა ზედა, შეურყეველად დამტკიცებაი ეკლესიისაი ქრისტეის ღმრთისაგან, და წყალობაი ყოველთა მორწმუნეთა.
ლოცვა მღვდლისა მიერ სათქუმელი
აცხოვნე, ღმერთო, ერი შენი, და აკურთხე სამკვიდრებელი შენი, მოხედენ სოფელსა შენსა წყალობითა და მოწყალებითა, აღამაღლე რქაი ქრისტეანეთა მართლმადიდებელთაი, და გარდამოავლინენ ჩუენ ზედა მდიდარნი წყალობანი შენნი, მეოხებითა ყოვლადწმიდისა დედოფლისა ჩუენისა ღმრთისმშობელისა, და მარადის ქალწულისა მარიამისაითა; ძლიერებითა პატიოსნისა და ცხოველსმყოფელისა ჯუარისაითა; მეოხებითა პატიოსანთა უხორცოთა ზეცისა ძალთაითა; პატიოსნისა, დიდებულისა, წინაისწარმეტყუელისა, წინამორბედისა და ნათლისმცემელისა იოვანეისითა, წმიდისა დიდისა წინაისწარმეტყუელისა ელია თეზბიტელისა და მართლისა ენუქისითა; წმიდათა დიდებულთა, და ყოვლად–ქებულთა მოციქულთა თავთა, პეტრეისა და პავლეისითა; წმიდისა მოციქულისა თომასი და საქართველოს განმანათლებელთა მოციქულთა: ანდრია პირველწოდებულისა, სვიმონ კანანელისა, ბართლომესი, თადეოზისა და მატათაისითა; ღირსისა დედისა ჩუენისა, მოციქულთა სწორისა ქალწულისა ნინო ქართველთ განმანათლებელისა და წმიდათა მოციქულთა სწორთა: მეფისა მირიანისა და დედოფლისა ნანაისითა; წმიდათა შორის მამათა ჩუენთა, და მსოფლიოთა დიდთა მოძღუართა და მღდელმთავართა: ბასილი დიდისა, გრიგოლი ღმრთისმეტყუელისა, და იოვანე ოქროპირისაითა; წმიდათა შორის მამისა ჩუენისა ნიკოლოზ მირონ–ლუკიის მთავარეპისკოპოსისა და საკვირველთმოქმედისაითა; წმიდისა დიდებულისა და ღუაწლისა–მძლისა მოწამისა, ძლევა–შემოსილისა გიორგისა და წმიდათა დიდთა ქალწულ–მოწამეთა ბარბარეისა და მარინეისითა; წმიდათა მამამთავართა ჩუენთა: პეტრე, სამუელ, სარმიან, მამაი, არსენ, მელქისედეკ, იოანე–ოქროპირ, ნიკოლოზ, ევდიმოზ, იოსებ, კირიონ, და ამბროსისაითა; ღირსისა მამისა ჩუენისა იოვანე ზედაზნელისა და ათორმეტთა მისთა მოწაფეთა, მეორედ განმანათლებელთა საქართველოს ეკლესიისა და მარადის მფარველთა მისთა და წმიდისა მღდელმოწამისა ნეოფიტე ურბნელისაითა; ღმრთივ–განბრძნობილთა ნეტართა მამათა ჩუენთა: ილარიონ ქართველისა, სერაპიონ ზარზმელისა, გრიგოლ ხანძთელისა და საბა იშხნელისაითა; ღირსთა მამათა ჩუენთა ათონელთა: იოვანე და გაბრიელ ქართველთა, იოვანე თორნიკ–ყოფილისა და ეფთვიმე და გიორგი მთაწმინდელთაითა; წმიდათა დიდებულთა და ღუაწლისა–მძლეთა მოწამეთა ჩუენთა: რაჟდენისა, ევსტათი მცხეთელისა, ჰაბო ტფილელისა, მიქაელ–გობრონისა, თევდორე მღდლისა, ქრისტეფორე გურულისა, ნიკოლოზ დვალისა, კოზმანისა, არგვეთისა მთავართა დავით და კონსტანტინეისა და კონსტანტინე მთავრისაითა; წმიდისა მთავარ–მოწამისა ბიძინასა და წმიდათა დიდებულთა მოწამეთა: შალვა და ელიზბარ ქსნის ერისთავთაითა; წმიდისა მოწამისა შალვა ახალციხელისა და წმიდათა ათთა–ბევრთა მოწამეთა, ტფილისს ხუარაზმელთაგან მოწყუედილთაითა; წმიდათა მოწამეთა ექვსი ათასთა გარეჯელთა ბერთა და მრავალთა წმინდათა მამათა და დედათა, აჭარაში თურქთაგან წამებულთაითა; წმიდათა ღუაწლისამძლეთა მეფეთა და დედოფალთა: მირდატ, აშოტ, არჩილ, დემეტრე, ლუარსაბ, შუშანიკ და ქეთევანისაითა და წმიდათა კეთილ–მორწმუნეთა და დიდთა მეფეთა ჩუენთა: ვახტანგ გორგასალისა, დავით აღმაშენებელისა, დემეტრე–დამიანეისა, თამარისა და სოლომონისაითა; წმიდისა ილია მართლისა, ექვთიმე ღმრთისკაცისა და ექვთიმე აღმსაარებლისაითა; წმიდათა აღმსარებელთა მამათა ჩუენთა, იოვანეისი და გიორგი–იოანე ბეთანიელთა და ღირსისა მამისა ჩუენისა არქიმანდრიტისა გაბრიელისა, აღმსაარებელისა და სალოსისაითა; წმიდათა და მართალთა მშობელთა ღმრთისაითა იოაკიმ და ანნაისითა (და წმიდისა სახელი, რომლისა არს ტაძარი და დღის წმიდანი მოიხსენიოს), და წმიდისა დიდისა მღდელმთავრისა, შანხაისა და სან–ფრანცისკოს მთავარეპისკოპოსისა იოანესი, განმანათლებლისა და საკვირველმოქმედისაითა, და ყოველთა წმიდათა შენთაითა გევედრებით შენ, მრავალ–მოწყალეო ღმერთო, შეისმინე ჩუენ ცოდვილთა ვედრებაი, და შეგვიწყალენ ჩუენ.
მგალობელთა: უფალო, შეგჳწყალენ (12-გზის).
მღდელმან: წყალობითა და მოწყალებითა და კაცთმოყუარებითა მხოლოდშობილისა ძისა შენისაჲთა, რომლისა თანა კურთხეულ ხარ, თანა ყოვლადწმიდით, სახიერით, და ცხოველსმყოფელით სულით შენითურთ, აწ და მარადის და უკუნითი უკუნისამდე.
მგალობელთა: ამინ.
გალობა 7, კურთხეულარსა
ძლისპირი: არაი მსახურეს ქმნილებასა უფროის შემოქმედისა ღმრთივგანბრძნობილთა ყრმათა, არამედ ახოვანებითა დათრგუნეს შინებაი ცეცხლითა და სახარულევანნი გალობდენ: კურთხეულ ხარ შენ, ღმერთო მამათა ჩუენთაო.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
ვითარცა ხარი შენ სიხარული მთაწმინდელთა, და ნუგეში და სიქადული ვატოპედისა სავანისაი, ეგრეთცა განჰბანე გულნი ჩუენნი ნაკადულთა მიერ მადლისაითა, რომელთა გარდამოგვიდინებ წმიდათა პირთაგან ხატისა შენისაისა.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
ეჰა, ვითარ საკვირველ არს ძალი სასწაულთა შენთაი, რომელთა ცხადად იქმ წმიდათა ხატთა მიერ შენთა, რამეთუ მრავალთა ექმენ შემწე ჭირთა და სნეულებათა შინა, და ყოველნი მადლიერებითა გაქებენ და ადიდებენ ქრისტესა, ძესა შენსა და ღმერთსა.
დიდებაი მამასა და ძესა და წმიდასა სულსა.
ფრიად შეიყუარეს რაი მამათა ჩუენთა „პანტანასა“, ევედრენ ვატოპედისა იღუმენსა, მოანიჭოს წმიდაი პირი მისი სამწყსოსა ივერთა ეკლესიისასა, რაითა მარადის იყოს მსწრაფლ-შემწეი და მკურნალი ყოველთა სნეულთა და დავრდომილთა.
აწ და მარადის და უკუნითი უკუნისამდე. ამინ.
მხოლოო ქმრისა გამოუცდელო ქალწულო მარიამ, უქორწინებელად დაიტიე რაი გარე-შეუწერელი ღმერთი წიაღსა შენსა, გაბრიელ მთავარანგელოსისა თანა გიღაღადებთ: კურთხეულ ხარ შენ დედათა შორის, და კურთხეულ არს ნაყოფი მუცლისა შენისა.
გალობა 8, აკურთხევდითსა
ძლისპირი: ღმრთისმოსავნი ყრმანი სახუმილსა შინა იხსნა ღმერთმან, რომელ შობად იყო ღმრთისმშობელისაგან, აკურთხევდით უფალსა ყოველნი საქმენი მისნი და უგალობდით მას უკუნისამდე.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
მსგავსად ღმრთივმავალისა ვარსკულავისა მოევლინა რაი შუენიერი პირი ხატისა შენისაი ტფილისსა, მამანი სამწყსოთა თანა მიეგებნეს სასოებითა, და გალობითა დააბრძანეს ქეთევან წამებულის ტაძარსა.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
საცნაურად განბრწყინდა ქუეყანასა ჩუენსა დიდებული „პანტანასა“, და იქმნა რაი უძლურთათვის, ვითარცა საუნჯეი მადლისაი, აწ განწმიდე მწიკულნი ცოდვათა ჩუენთა და გვიხსენ მძვინვარე სენთაგან.
დიდებაი მამასა და ძესა და წმიდასა სულსა.
სიყუარულითა აღგიმართეს რაი სავანეი მთასა მას ზედა ზაჰესისასა, ვითარცა ახალი მეტეორა, – სახელსა ზედა „პანტანასა – ყოველთა დედოფლისა“, ხატი ეგე დააბრძანეს ტაძარსა, და ყოველნი გევედრებიან შეწევნასა.
აწ და მარადის და უკუნითი უკუნისამდე. ამინ.
მიძინებასა სოფელი არაი დაუტევე, ღმრთისმშობელო, არამედ მარადის ჩუენ თანა ჰგიებ და მდიდრად გვიწყაროებ სიმხნევესა და ნუგეშსა, რომელნი სახებასა შენსა ამბორს უყოფთ და უგალობთ და ვადიდებთ ღმრთეებრივსა ძესა შენსა.
გალობა 9, ადიდებდითსა
ძლისპირი: იშუებდით ნაშობნი ქუეყანისანი, და იხარებდით ყოველნი უსხეულონი ზეცისანი, რომელნი პატივის-ჰსცემთ წმიდასა ამას დღესასწაულსა ღმრთისმშობელისასა და ხმობდით ღაღადებით: გიხაროდენ, ყოველთა დედოფალო, უბიწოო და მარადის ქალწულო.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
უნათლეს მზისა ბრწყინავს რაი წმიდაი ხატი ესე შენი სასწაულთა ელვითა, კრძალვითა გმსახურებენ მონაზონნი, და მღდელთა თანა პარაკლისითა და გალობითა გავედრებენ რაი ვნებულთა, მარადის ისმენ ლოცვასა მათსა და აღხოც სენთა და სალმობათა.
ყოვლადწმიდაო დედოფალო ყოველთაო, დაგვიცვენ და დაგვიფარენ ჩუენ.
აჩუენე რაი მსწრაფლი იგი შეწევნაი შენი ვითარცა სავანესა მას შინა მოღუაწეთა, ეგრეთვე მუნ ლოცვად მოსწრაფეთა, წლითი-წლად აღასრულებენ ხსენებასა ხატისა შენისასა, უბიწოო, და ღმრთისმსახურებითა ჯეროვანითა ადიდებენ სახიერებასა შენსა და სიწმიდესა.
დიდებაი მამასა და ძესა და წმიდასა სულსა.
დაუტეოთ აწ, ქართველნო, მწუხარებაი, ვითარმედ ხატი ესე ყოველთა დედოფლისაი, რომელსა მარადის ჭურეტენ მონაზონნი ათონისნი, გამოჩნდების ხსნად ერისა ჩუენისა მძვინვარეთა სენთაგან და ყოვლისაგან ჭირისა, და შევუვრდეთ მფარველობასა მისსა.
აწ და მარადის და უკუნითი უკუნისამდე. ამინ.
გნატრიან შენ ყოველნი ნათესავნი ქრისტეანეთანი, რამეთუ მოხედა უფალმან სიმდაბლესა შენსა, ყოვლადწმიდაო ღმრთისმშობელო, და ყო რაი შენ თანა დიდებული ძლიერმან, განიხარა სულმან შენმან ღმრთისა მიმართ, მაცხოვრისა შენისა.
მგალობელთა: ღირს-არს ჭეშმარიტად, რათა გადიდებდეთ, შენ ღვთისმშობელო, რომელი მარადის სანატრელ იქმენ, ყოვლად-უბიწოდ და დედად ღვთისა ჩვენისა. უპატიოსნესსა ქერუბინთასა, და აღმატებით უზესთაესსა სერაბინთასა, განუხრწნელად მშობელსა სიტყვისა ღვთისასა, მხოლოსა ღვთისმშობელსა გალობით გადიდებდეთ. ("ღირს - არს" - ის ნაცვლად საკითხავი საგალობლები)
მღვდელმან აკმიოს.
მკითხველმან: მოვედით, ყოველნო მორწმუნენო, სავანესა მას ყოველთა დედოფლისასა, რაითა ღირს ვიქმნნეთ ჩუენცა შევრდომად კურთხეულისა ამის საუნჯისა, და მის მიერ მადლისა მიმღებელნი უფალსა შევსწირვიდეთ დიდებასა და ქებასა.
მივისწრაფოთ, ყოველნო ქართლოსიანნო, თაყუანისცემად და შევრდომად ხატისა მის, საკვირველად განთქუმულისა, რამეთუ ყოველთა შევედრებულთა მისდა იცავს საფარველითა თვისითა და დაატკბობს ჭირთა და სენთა სიმწარესა.
უშურველად გარდამოავლენ რაი ჩუენ ზედა წყალობასა შენსა სასწაულთმოქმედითა ხატითა შენითა, სათნო-იჩინე და სიმრთელეი მიჰმადლე ფიცხელთა სენთაგან ტანჯულთა და მკურნალთაგან დატევებულთა, (სახელები), რაითა სიხარულითა გმადლობდენ შენ, ჰოი, ყოველთა დედოფალო, და ადიდებდენ ღმერთსა.
წმიდასა და სასწაულთმოქმედსა ხატსა შენსა შევრდომილნი, ღმრთისმშობელო, შენდა შევსწირავთ ვედრებასა, ვითარცა დიდსა მფარველსა და შემწესა შენდა წილხვდომილისა ერისასა, რაითა აწ დაიფარო სამწყსოი შენი, მაჭირვებელთა ვნებათაგან და ეშმაკთა საცთურთაგან.
ზეცისა ძალთა კრებულნი და მოციქულთა გუნდნი და ყოველნი ენანი გადიდებენ შენ, ვითარცა ყოველთა ნათესავთა უზეშთაესსა, ხოლო ჩუენ, მსასოებელნი წმიდისა ამის ხატისა შენისანი, დედად განკაცებულისა უფლისა გქადაგებთ, ყოვლად უბიწოდ, და მართლმადიდებლობითა უღაღადებთ ყოვლადწმიდასა სამებასა:
წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.
უფალო შეგვიწყალენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.
მღვდელმან: რამეთუ შენი არს სუფევა, ძალი და დაიდება, მამისა და ძისა და წმიდისა სულისა, აწ და მარადის და უკუნითი უკუნისამდე.
მგალობელთა: ამინ.
მკითხველმან: მიწყალენ ჩუენ, უფალო, შემიწყალენ ჩვენ, რამეთუ ყოველსავე სიტყვის-მიცემისაგან უღონო ვართ, გარნა ამას ვედრებასა შენ, მეუფისა სახიერისა, ცოდვილნი ესე შევსწირავთ. მიწყალენ ჩუენ, უფალო, შეგვიწყალენ ჩუენ.
დიდება მამასა და ძესა და წმიდასა სულსა.
უფალო, შემიწყალენ ჩუენ, რამეთუ შენ გესავთ, ნუ განმირისხდები ჩუენ ფრიად, და ნუცა მოიხსენებ უსჯულოებათა ჩუენთა, არამედ მოიხილე ჩუენზედა წყალობით, ვითარცა სახიერ ხარ, და გვიხსენ ჩუენ სამართლად რისხვისაგან შენისა, რამეთუ შენ ხარ ღმერთი ჩუენი, და ჩუენ ვართ ერნი შენნი, ყოველნივე ქმნულნი ხელითა შენთანი ვართ და სახელი შენი წოდებულ არს ჩუენზედა, და შემიწყალენ ჩუენ.
აწ და მარადის, და უკუნითი უკუნისამდე, ამინ.
მოწყალების კარი განგვიღე, კურთხეულო ღმრთისმშობელო, რათა, რომელნი ესე შენ გესავთ, არა დავეცნეთ, არამედ განვერნეთ წინააღმდგომთა მტერთაგან, რამეთუ შენ ხარ ცხოვრება ნათესავისა ქრისტიანეთასა.
მცირე მრჩობლი კვერექსი
დიაკონმან: შეგჳწყალენ ჩუენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით, მოწყალებისა, სიცოცხლისა, მშჳდობისა, სიმრთელისა, დღეგრძელობისა, მყუდროებისა, განათლებისა, ცხორებისა, შეწევნისა, შენდობისა და ცოდვათა მოტევებისათჳს ყოველთა შვილთა ჩუენისა ეკლესიისა, რაჲთა დაიცვას უფალმან ღმერთმან ჩუენმან სამეუფოჲ ქალაქი ესე ჩუენი და წმიდაჲ ესე მონასტერი (ანუ ეკლესია) და ყოველი სოფელი სიყმილისაგან, სრჳსა, ძრჳსა, მახჳლისა, ზედა მოსლჳსაგან უცხო თესლთასა და ყოვლისაგან ბოროტისა; რაჲთა მოწყალე გუექმნეს ჩუენ ღმერთი კეთილად დგომისათჳს სახიერებითა და კაცთმოყუარებითა თჳსითა, და გარე წარაქციოს რისხვაჲ, მარადის ჩუენ ზედა მომავალი, და გჳჴსნეს ჩუენ სამართლად ჩუენ ზედა მოწევნულისა რისხვისაგან, და შეგჳწყალნეს ჩუენ.
მგალობელთა: უფალო, შეგჳწყალენ (12-გზის).
მღდელმან: შეისმინე ჩუენი, ღმერთო, მაცხოვარო ჩუენო, სასოო ყოველთა კიდეთა ქუეყანისათაო, და რომელნი არიან ზღუათა შინა შორს და ცასა შინა, და მლხინებელ, და მოწყალე ექმენ შეცოდებათა ჩუენთა, და შეგჳწყალენ ჩუენ, რამეთუ მოწყალე და კაცთმოყუარე ღმერთი ხარ და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის, და უკუნითი უკუნისამდე.
მგალობელთა: ამინ.
დიაკონმან: მუხლმოდრეკით უფლისა მიმართ ვილოცოთ.
მგალობელთა: უფალო, შეგჳწყალენ.
სავედრებელი ლოცვა
მგალობელთა: ამინ.
დიაკონმან: ყოვლადწმიდაო ღმრთისმშობელო, გუაცხოვნენ ჩუენ.
მგალობელთა: უპატიოსნესსა ქერუბიმთასა და აღმატებით უზესთაესსა სერაბინთასა, განუხრწნელად მშობელსა სიტყჳსა ღმრთისასა, მხოლოსა ღმრთისმშობელსა გალობით გადიდებდეთ.
მღდელმან: დიდებაჲ შენდა, ღმერთო ჩუენო, დიდებაჲ შენდა.
მგალობელთა: დიდებაჲ მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
უფალო, შეგჳწყალენ (3-გზის).
სახელითა უფლისათა, უწმიდესო და უნეტარესო მეუფეო გუაკურთხენ.
მღვდელმან: უფალო იესუ ქრისტე, ძეო ღმრთისაო, ლოცვითა ყოვლად წმიდისა დედისა შენისათა, ღირსთა და ღმერთშემოსილთა მამათა ჩვენთათა და ყოველთა წმიდათა შენთათა, შეგვიწყალენ ჩვენ, ამინ.
მგალობელთა: ამინ. უფალო, შეგჳწყალენ (3-გზის).
ყოვლად საკვირველი და მადლმოსილი ხატი შენი „ყოველთა დედოფალი – პანტანასა“, მხსნელად და შესავრდომელად მოჰმადლე რაი ყოველთა მწუხარეთა, მძაფრთა სენთაგან შეპყრობილთა და ეშმაკთა მიერ ბოროტად გუემულთა, აწ ჩუენცა ნუ გვიტევებ შთაფლვად უფსკრულსა უსჯულოებისასა, და გვიხსენ ყოვლისაგან ჭირისა და სულთა და ხორცთა ვნებულებათაგან.
წინაშე ხატისა მის შენისა წარდგომილ ვართ ლმობიერად მორწმუნენი, ჰოი, დედაო, და დედოფალო ყოველთაო, და გევედრებით: ნუ გარე-მიიქცევ პირსა შენსა ჩუენგან, არამედ განგვკურნე და დახსენ მანქანებაი ეშმაკთაი და წინააღმდგომთა ჩუენთაი
ავტორ-შემდგენელი: თინათინ მჭედლიშვილი