პარაკლისი სავედრებელი
უფლისა ჩვენისა მიმართ იესუ ქრისტესა
ნარკომანიის წარმწყმედელი ვნებისაგან გასათავისუფლებლად

 

 მღვდელმან: კურთხეულ არს ღმერთი ჩუენი, ყოვლადვე, აწ და მარადის და უკუნითი უკუნისამდე.

 

 მკითხველმან: ამინ. დიდება შენდა, ღმერთო ჩვენო, დიდება შენდა.

 

 მეუფეო ზეცათაო, ნუგეშინისმცემელო, სულო ჭეშმარიტებისაო, რომელი ყოველგან ხარ და ყოველსავე აღავსებ მადლითა შენითა, საუნჯეო კეთილთაო, მომნიჭებელო ცხოვრებისაო, მოვედ და დაემკვიდრე ჩვენს შორის და წმიდა მყვენ ჩვენ ყოვლისაგან ბიწისა და აცხოვნენ, სახიერო, სულნი ჩვენნი.

 

 წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).

 

 დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 

 ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.

 

 უფალო შეგვიწყალენ (3-გზის).

 

 დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 

 მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.

 

 მღვდელმან: რამეთუ შენი არს სუფევაჲ, ძალი და დიდებაჲ აწ და მარადის და უკუნითი უკუნისამდე.

 

 მგალობელთა: ამინ.

 

 უფალო შეგვიწყალენ (12–ჯერ).

 

 

უფალო იესუ ქრისტე, შენ წმიდითა ბაგითა შენითა თქუ, ვითარმედ „ამენ გეტყვი თქუენ: უკუეთუ ორნი თქუენგანნი შეითქუნენ ქუეყანასა ზედა ყოვლისათვისვე საქმისა, რომელიცა ითხოონ, ეყოს მათ მამისა ჩემისაგან ზეცათაისა, რამეთუ სადაცა იყვნენ ორნი გინა სამნი შეკრებულ სახელისა ჩემისათვის, მუნ ვარ მე შორის მათსა“ (მათ. 18,19-20), უცვალებელნი არიან სიტყუანი შენნი, ღმერთო ჩუენო, და მიუწთომელ არს განგებულებაი შენი, და აურაცხელნი არიან მოწყალებანი შენნი და კაცთმოყუარებასა შენსა არ აქუს ოხჭანი.

 

 

1. უფალო, შეისმინე ლოცვისა ჩემისაი, ყურად-იღე ვედრებაი ჩემი ჭეშმარიტებითა შენითა, შეისმინე ჩემი სიმართლითა შენითა; 

 

2. და ნუ შეხუალ სასჯელსა მონისა შენისა თანა, რამეთუ არა განმართლდეს შენ წინაშე ყოველი ცხოველი. 

 

3. რამეთუ დევნა მტერმან სული ჩემი და დაამდაბლა ქუეყანად ცხოურებაი ჩემი, დამსუა მე ბნელსა შინა, ვითარცა მკუდარი საუკუნოი. 

 

4. და მოეწყინა ჩემ თანა სულსა ჩემსა, და ჩემ შორის შემიძრწუნდა გული ჩემი. 

 

5. მოვიხსენე დღეთა პირველთაი და ვიწურთიდ ყოველთა მიმართ საქმეთა შენთა და ქმნულსა ხელთა შენთასა ვზრახევდ. 

 

6. განვიპყრენ შენდამი ხელნი ჩემნი, და სული ჩემი ვითარცა ქუეყანაი ურწყული შენდამი. 

 

7. მსთუად შეისმინე ჩემი, უფალო, რამეთუ მოაკლდა სულსა ჩემსა, ნუ გარე-მიიქცევ პირსა შენსა ჩემგან, და ვემსგავსო მათ, რომელნი შთავლენან მღვიმესა. 

 

8. მასმინე მე განთიად წყალობაი შენი, რამეთუ მე შენ გესავ; მაუწყე მე, უფალო, გზაი, რომელსაცა ვიდოდი, რამეთუ შენდამი აღვიღე სული ჩემი. 

 

9. მიხსენ მე მტერთა ჩემთაგან, უფალო, რამეთუ შენ შეგევედრე. 

 

10. მასწავე მე, რაითა ვყო ნებაი შენი, რამეთუ შენ ხარ ღმერთი ჩემი, სული შენი სახიერი მიძღოდენ მე ქუეყანასა წრფელსა. 

 

11. სახელისა შენისათვის, უფალო, მაცხოვნო მე და სიმართლითა შენითა გამოიყვანო ჭირისაგან სული ჩემი. 

 

12. და წყალობითა შენითა მოსრნე მტერნი ჩემნი და წარსწყმიდნე ყოველნი მაჭირვებელნი სულისა ჩემისანი, რამეთუ მე მონაი შენი ვარ.

 

 

 

 

 

 

 

ტროპარი

 

  აცხოვნე უფალო ერი შენი და აკურთხე სამკვიდრებელი შენი, ძლევაი ჯუარითა ბარბაროზთა ზედა ღმრთივდაცულსა ერსა ჩუენსა მოანიჭე და საფარველსა ქუეშე მისსა დაიცევ, რაითა ვიტყოდეთ: უფალო, დიდებაი შენდა.

 

  დიდებაი მამასა და ძესა და წმიდასა სულსა.

 

  აცხოვნე უფალო ერი შენი და აკურთხე სამკვიდრებელი შენი, ძლევაი ჯუარითა ბარბაროზთა ზედა ღმრთივდაცულსა ერსა ჩუენსა მოანიჭე და საფარველსა ქუეშე მისსა დაიცევ, რაითა ვიტყოდეთ: უფალო, დიდებაი შენდა.

 

  აწ და მარადის და უკუნითი უკუნისამდე ამინ.

 

  შესავედრებელო, საშინელო, უხრწნელო, ყოვლად საგალობელო ღმრთისმშობელო, სახიერო მცველო უბრძოლველო, მიითუალე ვედრებაი ჩუენ უღირსთა ამათ, დაამტკიცე მართლმადიდებლობაი, აცხოვნე ერი ჩუენი და ზეგარდამო ძლევაი მოანიჭე ქრისტეს ღმრთისა მიერ, რომელი ჰშევ, მხოლოო კურთხეულო.

 

ფსალმუნი 50

 

1. მიწყალე მე, ღმერთო, დიდითა წყალობითა შენითა და მრავლითა მოწყალებითა შენითა ახოცე უშჯულოებაი ჩემი. 

 

2. უფროის განმბანე მე უშჯულოებისა ჩემისაგან და ცოდვათა ჩემთაგან განმწმიდე მე. 

 

3. რამეთუ უშჯულოებაი ჩემი მე უწყი, და ცოდვაი ჩემი წინაშე ჩემსა არს მარადის. 

 

4. შენ მხოლოსა შეგცოდე და ბოროტი შენ წინაშე ვყავ; რაითა განმართლდე სიტყუათაგან შენთა და სძლო შჯასა შენსა. 

 

5. რამეთუ ესერა უშჯულოებათა შინა მიუდგა და ცოდვათა შინა მშვა მე დედამან ჩემმან. 

 

6. რამეთუ ესერა ჭეშმარიტებაი შეიყუარე, უჩინონი და დაფარულნი სიბრძნისა შენისანი გამომიცხადენ მე. 

 

7. მასხურო მე უსუპითა და განვწმიდნე მე, განმბანო მე და უფროის თოვლისა განვსპეტაკნე. 

 

8. მასმინო მე გალობაი და სიხარული, და იხარებდენ ძუალნი დამდაბლებულნი. 

 

9. გარე-მიაქციე პირი შენი ცოდვათა ჩემთაგან და ყოველნი უშჯულოებანი ჩემნი ახოცენ. 

 

10. გული წმიდაი დაჰბადე ჩემ თანა, ღმერთო, და სული წრფელი განმიახლე გუამსა ჩემსა. 

 

11. ნუ განმაგდებ მე პირისა შენისაგან და სულსა წმიდასა შენსა ნუ მიმიღებ ჩემგან. 

 

12. მომეც მე სიხარული მაცხოვარებისა შენისაი და სულითა მთავრობისათა დამამტკიცე მე. 

 

13. ვასწავლნე უშჯულოთა გზანი შენნი და უღმრთონი შენდა მოიქცენ. 

 

14. მიხსენ მე სისხლთაგან, ღმერთო, ღმერთო ცხორებისა ჩემისაო, იხარებდეს ენაი ჩემი სიმართლესა შენსა. 

 

15. უფალო, ბაგენი ჩემნი აღახუნე, და პირი ჩემი უთხრობდეს ქებულებასა შენსა. 

 

16. რამეთუ უკეთუმცა გენება, მსხუერპლი შე-მცა-მეწირა, არამედ საკუერთხი არა გთნდეს. 

 

17. მსხუერპლი ღმრთისა არს სული შემუსრვილი, გული შემუსრვილი და დამდაბლებული ღმერთმან არა შეურაცხ-ჰყოს. 

 

18. კეთილი უყავ, უფალო, ნებითა შენითა სიონსა და აღეშენნენ ზღუდენი იერუსალემისანი. 

 

19. მაშინ გთნდეს მსხუერპლი სიმართლისაი, შესაწირავი და ყოვლად-დასაწუელი; მაშინ შეიწირნენ საკურთხეველსა შენსა ზედა ზუარაკნი.

 

 

გალობაი 1, უგალობდითსა

 

ძლისპირი: ზღუაი მეწამული კუერთხმან განაპო, განხმეს სიღრმენი და უფსკრულ-იქმნნეს გზა უჭურვილთა და შეჭურვილთა მათ საფლავ, არა მმარხველ გუამთა. გალობით უგალობდეთ, რამეთუ დიდებით დიდებულ არს ქრისტე, ღმერთი ჩუენი ცხოველი.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

მხოლოდ-შობილო ქრისტე, ღმრთისა სიტყუაო, რაჟამს დაიკალ ნებსით მსხუერპლად მამისა და შეიწირე ცოდვათათვის სოფლისა, წმიდა ჰყავ, მხსნელო, ეკლესიაი სისხლითა თვისითა და შვილნი მისნი იხსნენ ყოვლისაგან საცთურისა.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

სარწმუნოებითა თაყუანის-გცემთ და ძრწოლით მივემთხუევით ჯუარსა შენსა, რომელი მომეც ჩუენ საჭურველად და შემწედ, იესუ კაცთმოყუარეო, და შენდა მომართ ვღაღადებთ: იხსენ ერი ჩუენი ყოვლისაგან ვნებისა და საცთურისაგან სოფლისა.

დიდებაი მამასა და ძესა და წმიდასა სულსა

აწ აღძრულ არიან უღმრთოთა გუნდნი, ქრისტე, რაითა შერყვნან სარწმუნოებაი შენი ქუეყანასა ზედა, და ჭეშმარიტებაი დაამცრონ ერსა შორის ჩუენსა, გარნა შენ მოგვეც სიმხნე საცხოვრებელი და საღმრთოი, აღსრულებად ნებათა შენთა.

აწ და მარადის და უკუნითი უკუნისამდე, ამენ.

ჩუენ-წილ ჰბრძოდე, უწყალოდ მბრძოლთა მათ ჩუენთა, იესუ ქრისტეს – ღმრთისა მშობელო, რომელნი ესე გესავთ, და ყოველთა ჭირთა და საფრხეთაგან იხსენ ქუეყანაი ესე, წილხვედრი შენი, რამეთუ შენ ხარ, უბიწოო, სასოი და წინამძღუარი ჩუენი.

 

 

გალობა 3, განძლიერდასა

 

ძლისპირი: სამებაო წმიდაო, აღამაღლე რქაი ეკლესიისაი დღეს მიუდრეკელად, უზეშთაეს ბუნებათა, სიმაღლესა ზედა სარწმუნოებისა შენისასა, საფუძველსა შეურყეველსა და მას შინა განმაძლიერენ.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

განაძლიერე ეკლესიაი შენი, ქრისტე ღმერთო, რომელი აღაშენე ძალითა ჯუარისა შენისაითა, რომლითა არცხვინე ეშმაკსა, და უვნებელად დაგვიცევ ყოველთა მისთა მანქანებათაგან.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

რომელმან მომიგენ ჩუენ ერად თვისად მორწმუნედ სისხლითა შენითა, ქრისტე, მშვიდობაი შენი მომეც ჩუენ და დაიცევ მარადის სამწყსოი შენი უვნებელად.

დიდებაი მამასა და ძესა და წმიდასა სულსა

მოვედით და შეუვრდეთ უფალსა, რაითა ჰყოს სიმტკიცითა მკლავისა თვისისაითა შურის-გებაი მაჭირვებელთა ზედა ქართველთასა, და შეურყეველად დაამტკიცოს ერი ჩუენი მართლმადიდებლობასა.

აწ და მარადის და უკუნითი უკუნისამდე, ამენ.

ნავთსაყუდელად ხსნისა გიცნობთ შენ მორწმუნენი, ქალწულო მარიამ, რომელმან შევ მაცხოვარი ჩუენ ყოველთაი გამოუთქუმელად, მისა მიმართ მეოხ გუეყავ, რაითა მიხსნეს განსაცდელთაგან.

გვიხსნენ განსაცდელთაგან მონანი შენნი, ყოვლადწმიდაო ღმრთისმშობელო ქალწულო, რამეთუ ჩუენ ყოველნი, შემდგომად ღმრთისა, შენდა მოვივლტვით, ვითარცა უძლეველისა ზღუდისა და შუამდგომელისა.

მოიხილე ჩუენზედა, ყოვლადქებულო ღმრთისმშობელო, და ხორცთა ჩუენთა წყლულებანი ბოროტნი განჰკურნენ და სულისა ჩუენისა სნეულებანი.

 

 

მრჩობლი კვერექსი

 

 დიაკონმან: შეგჳწყალენ ჩვენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა გევედრებით ღმრთივ–დაცულისა ერისა ჩუენისა და მეუფებისა მისისათჳს (მთავრობისა და მხედრობისა) მისისათჳს.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა გევედრებით უწმიდესისა და უნეტარესისა, სრულიად საქართველოს კათოლიკოს–პატრიარქისა და მცეთა–თბილისის მთავარეპისკოპოსისა და ბიჭვინთისა და ცხუმ–აფხაზეთის მიტროპოლიტისა, დიდისა მეუფისა, მამისა ჩუენისა ილიასათჳს, და ყოვლადუსამღვდელოესისა... (აქა მოიხსენეთ ადგილობრიბი მღვდელმთავარი), და ყოველთა ქრისტეს მიერ ძმათა ჩუენთათვის.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა ვევედრნეთ უფალსა ღმერთსა ჩუენსა, რაითა შეიწყალნეს... (აქა მოიხსენეთ სახელდებით ისინი, ვისთვისაც ევედრებით ღმერთს).

 

 მგალობელთა: უფალო, შეგჳწყალენ (3-გზის).

 

 დიაკონმან: განამრავლე, უფალო, ჟამნი და წელნი ცხოვრებისა მათისანი, და იხსნენ იგინი, უფალო, ყოვლისაგან ჭირისა, რისხვისა და იწროებისა, და ყოვლისაგან წყლულებისა სულისა და ხორცთასა, და მიუტევენ მათ ყოველნი შეცოდებანი მათნი, ნებსითნი და უნებლიეთნი.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა გევედრებით ყოველთა ძმათა და ყოველთა ქრისტიანეთათჳს.

 

 მგალობელთა: უფალო, შეგჳწყალენ (3-გზის).

 

 მღვდელმან: რამეთუ მოწყალე და კაცთმოყვარე ღმერთი ხარ, და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის და უკუნითი უკუნისამდე.

 

 მგალობელთა: ამინ.

 

 

წარდგომაი, ხმაი 3

 

 მვითარცა გესლი გუელისაი მოსწამლავს და მოაკუდინებს კაცსა, ეგრეთცა ჰაშიში, თრიაქი და ბანგი მოსწამლავს გულსა და სულსა კაცისასა, და მოაკუდინებს სიყუარულსა ღმრთისა და მოყუასისასა, ამისთვის ყოველთა ბოროტთა ამათ ვნებათაგან ღელვაგვემულნი (სახელები), შეიწყნარენ და თავი გუელისაი შეჰმუსრე, განმგმერელი მათი გესლითა ცოდვისაითა, რაითა გულისხმა-მოგებულნი განეშორნენ ბილწთა მათ ჩვეულებათა თვისთა, და გადიდებდენ შენ, სახიერო იესუ, ვითარცა ყოვლისმპყრობელსა მაცხოვარსა და მხსნელსა.

 

 

გალობა 4, მესმასა

 

ძლისპირი: რაჟამს წინაისწარმეტყუელმან იხილა საიდუმლოი დაფარული, განკვირვებულმან ღაღად-ყო: რამეთუ დასდევ წყალობით სიყუარული მტკიცე, მამაო, და ძე შენი მხოლოდ-შობილი მოეც ძეთა კაცთასა მომტევებელად ცოდვათა.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

არარაი არს ესრეთ საყუარელ და საწადელ ეშმაკისა, ვითარ თრიაქითა და ჰაშიშითა დაბანგვაი კაცისაი, გარნა შენ გამოიტაცე ხელთაგან მისთა (სახელი) და შთაუნერგე გულსა შინა მოძაგებაი ცოდვისაი და სიყუარული სათნოებისაი.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

შენ, რომელმან განანათლენ კაცთა ნათესავი მოსლვითა შენითა, ქრისტე, და განსწმიდენ კიდენი ქუეყანისანი ჯუარითა, აწ, მეუფეო, დაიცევ მახლობელნი ჩუენნი (სახელები) მონებისაგან ბოროტისა, და განუღე კარი სარწმუნოებისა.

დიდებაი მამასა და ძესა და წმიდასა სულსა

ვითარ არა შევძრწუნდეთ მხედველნი მემთვრალეთა და ბანგისაგან გაბრუებულთა, მხსნელო იესუ, ვერცავის ძალუძს რაი ხსნაი მათი თვინიერ შენსა, ამისთვის გევედრებით: ძალითა თვისითა შეაგონე, რაითა იჯმნენ ცოდვისაგან და შეუდგნენ ქრისტესა.

აწ და მარადის და უკუნითი უკუნისამდე, ამენ.

საკვირველითა მით შეწევნითა შენითა განზრახვანი წარმართთანი განაქარვენ, ჰოი, შესავედრებელო ჭირვეულთაო ღმრთივ-მომადლებულო, და კუალად ძლიერნი და ბოროტნი მბრძოლნი ჩუენნი დაამხუენ, ქალწულო, და მზაკუვარებანი მათნი განაქიქენ.

 

 

გალობა 5, ღამითგანსა

 

ძლისპირი: ბნელისაგან ცოდვათაისა გიღაღადებენ შენ სულნი ჩუენნი, მრავალ-მოწყალეო ღმერთო, ნათლითა მით მიუაჩრდილებელითა განგუანათლენ და წარგვიმართენ სლვანი ჩუენნი, მახარობელო მშვიდობისაო.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

ნათელი მოხუედ, ქრისტე, სოფლად, და ჰნათობ რაი აღმსარებელთა შენთა, აღანთე გულთა შინა უმეცართა და უძლურთასა (სახელები) საღმრთოი ცეცხლი მოშურნეობისაი, რაითა შეიყვარონ სიწმიდე და აღიძრნენ მსახურებად შენდა.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

მეუფეო ღმერთო, რომელი მოწყალებითა ჰრიდებ ერსა შენსა, და კუალადვე მოაქცევ შენდამი მწუხარებათა მიერ და განსაცდელთა, აწ დაიცევ მახლობელნი ჩუენნი (სახელები), მომკუდარნი ვნებათა მძლავრებისაგან და განაცხოველე სადიდებელად შენდა.

დიდებაი მამასა და ძესა და წმიდასა სულსა

ვითარ დასთრგუნე მტერობაი მთავრისა მის ბნელისაი და განანათლე სოფელი თვით მაღლით გამოჩინებულმან იესუ, მზემან სიმართლისამან, გარე-შეუწერელმან ღმერთმან, ეგრეთვე აწ დაამხუე მძლავრებაი კაცთა მათ უკეთურთა, განმხრწნელთა ერისა ჩუენისათა.

აწ და მარადის და უკუნითი უკუნისამდე, ამენ.

შეგვიწყალე, ქალწულო წმიდაო მარიამ, და ნუ მიმცემ ჩუენ ხელთა მძლავრთა მათ უკეთურთასა, რაითა არა ჰსთქუან ყოველთა, სადა არს ღმრთისმშობელი, რომლისა მიმართ აქუთ სასოებაი, და სამწყსოი შენი დაიფარე უბრძოლუელად.

 

 

გალობა 6, ღაღადყავსა

 

ძლისპირი: მუცლად იღო იონა ვეშაპმან და არა განხრწნა მან იგი, რამეთუ მით მოასწავა სახე სამ-დღე დაფლვისა შენისაი, რომელმანცა დაფლვაი თავს იდევ ჩუენვის, სახიერ, და ეტყოდა იგი მცველთა მათ: ჰოი, ცრუნო, წყალობაი თქუენი დაუტევეთ თქუენ დღეს.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

კლდესა ზედა აღაშენე ეკლესიაი და მას შინა წარმართნი შეკრიბენ რაი მგალობლად შენდა, წინააღმდგომნი ძალნი აღძრულ არიან განქარვებად ძალისა შენისა, ქრისტე, გარნა აწ გარე-შეზღუდენ ძალთა მიერ ზეცისათა.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

შენდა მოვივლტით, ქრისტე, განწირულთა სასოო, და გევედრებით: აწ მგელნი მტაცებელნი გარე-მოგვადგენ სიტყვიერთა ცხოვართა შენთა განხრწნად, გარნა შენ გვიხსენ და მოგვეც მწყემსნი და განმგენი სარწმუნონი და მართალნი, წინამძღურად სამწყსოთა თვისთა.

დიდებაი მამასა და ძესა და წმიდასა სულსა

ვითარცა ბელიარ დასითურთ თვისით მოაუძლურე, ქრისტე, ეგრეთცა ერი ჩუენი, ძილისა დახსნილებასა შინა შთავრდომილი, განაფრთხვე, და ყოველთა წარმწყმედელთა მათ საქმეთა ეშმაკისათა, დაფარულთა და საჩინოთა, სრულიად განაშორე.

აწ და მარადის და უკუნითი უკუნისამდე, ამენ.

შენ მხოლოი გვივი უხრწნელი საფარველი, ქალწულო, გარნა არა იციან ხელმწიფებაი შენი უღმრთოთა ერთა, რომელნი გვაჭირვებენ წილხვედრთა შენთა, არამედ შეჰსძრენ და შეაძრწუნენ იგინი, დედოფალო, და განგვარინე ყოველთა ძვირთა და განსაცდელთა.

გვიხსნენ განსაცდელთაგან მონანი შენნი, ყოვლადწმიდაო ღმრთისმშობელო ქალწულო, რამეთუ ჩუენ ყოველნი, შემდგომად ღმრთისა, შენდა მოვივლტვით, ვითარცა უძლეველისა ზღუდისა და შუამდგომელისა.

მოიხილე ჩუენზედა, ყოვლადქებულო ღმრთისმშობელო, და ხორცთა ჩუენთა წყლულებანი ბოროტნი განჰკურნენ და სულისა ჩუენისა სნეულებანი.

 

 

 

 

კონდაკი. ხმა 4.

 

 რომელი ამაღლდი ნებსით ჯუარსა ზედა, მოსახელესა შენსა ახალსა მოქალაქობასა, წყალობანი შენნი მოგუანიჭენ, ქრისტე ღმერთო, ახარე ძალითა შენითა ღმრთივდაცულსა ერსა ჩუენსა და ძლევაი მოჰმადლე მას მბრძოლთა მიმართ, რომელსა თანა შემწედ აქუს შენი საჭურველი მშვიდობისაი, უძლეველი საძლეველი, ჯუარი შენი, ყოვლადძლიერი.

 

 

 დიაკონმან: სიბრძნით. მოხედენ.

 

 მღდელმან: მშვიდობა ყოველთა.

 

 მგალობელთა: და სულისაცა შენისა თანა.

 

 დიაკონმან: წარდგომაი სახარებისაი, ხმაი 7: უფალმან ძალი ერსა თვისსა მოსცეს, უფალმან აკურთხოს ერი თვისი მშვიდობით.

 

 მგალობელთა: უფალმან ძალი ერსა თვისსა მოსცეს, უფალმან აკურთხოს ერი თვისი მშვიდობით.

 

 დიაკონმან: შესწირევდით უფლისა შვილნი ღმრთისანი, შესწირევდით უფლისა შვილთა ვერძთასა.

 

 მგალობელთა: უფალმან ძალი ერსა თვისსა მოსცეს, უფალმან აკურთხოს ერი თვისი მშვიდობით.

 

 დიაკონმან: უფალმან ძალი ერსა თვისსა მოსცეს,

 

 მგალობელთა: უფალმან აკურთხოს ერი თვისი მშვიდობით.

 

 დიაკონმან: უფლისა მიმართ ვილოცოთ.

 

 მგალობელთა: უფალო, შეგჳწყალენ.

 

 მღდელმან: რამეთუ წმიდა ხარ შენ, ღმერთო ჩუენო, და რომელი წმიდათა შორის განისუენებ, და შენდა დიდებასა აღვავლენთ, მამისა, და ძისა და წმიდისა სულისა, აწ და მარადის, და უკუნითი უკუნისამდე,

 

 მგალობელთა: ამინ.

 

 დიაკონმან: ყოველი სული აქებდით უფალსა.

 

 მგალობელთა: ყოველი სული აქებდით უფალსა.

 

 დიაკონმან: აქებდით ღმერთსა წმიდათა შორის მისთა, აქებდით მას სამყაროთა ძალისა მისისათა.

 

 მგალობელთა: ყოველი სული აქებდით უფალსა.

 

 დიაკონმან: ყოველი სული.

 

 მგალობელთა: აქებდით უფალსა.

 

 დიაკონმან: ღირსყოფად ჩუენდა სმენად წმიდისა სახარებისა უფალსა ღმერთსა ჩუენსა ვევედრნეთ.

 

 მგალობელთა: უფალო, შეგჳწყალენ (3-გზის).

 

 დიაკონმან: სიბრძნით აღემართენით და ისმინეთ წმიდა სახარება.

 

 მღვდელმან: მშჳდობაჲ ყოველთა.

 

 მგალობელთა: და სულისაცა შენისა თანა.

 

 დიაკონმან: მათესაგან წმიდისა სახარებისა საკითხავი.

 

 მგალობელთა: დიდებაჲ შენდა, უფალო, დიდებაჲ შენდა.

 

 დიაკონმან: მოხედენ.

 

სახარება მათესი

 

  ჰრქუა უფალმან, ითხოვდით, და მოგეცეს თქუენ. რამეთუ ყოველი რომელი ითხოვდეს, მოიღოს; და რომელი ეძიებდეს, პოვოს, და რომელი ირეკდეს, განეღოს. ანუ ვინ არს თქუენგანი კაცი, რომელსა სთხოვდეს ძე თვისი პურსა, ნუ ქვაი მისცესა მას? გინა თუ თევზსა სთხოვდეს, ნუ გუელი მისცეს მას? უკუეთუ თქუენ, უკეთურთა, იცით მისაცემელი კეთილი მიცემად შვილთა თქუენთა, რაოდენ უფროისღა მამამან თქუენმან ზეცათამან მოსცეს კეთილი, რომელნი სთხოვდეს მას.

 

 

 მგალობელთა: დიდებაჲ შენდა, უფალო, დიდებაჲ შენდა.

 

 მკითხველმან: დიდება მამასა და ძესა და წმიდასა სულსა.

 

 მოწყალებითა შენითა, მრავალმოწყალეო ღმერთო, აღხოცე ცოდვათა ჩუენთა სიმრავლენი.

 

 აწ და მარადის და უკუნითი უკუნისამდე, ამინ. 

 

 მეოხებითა წმიდისა ღმრთისმშობელისათა, მოწყალეო, აღხოცენ ცოდვათა ჩემთა სიმრავლენი.

 

მიწყალე მე, ღმერთო, დიდითა წყალობითა შენითა, და მრავლითა მოწყალებითა შენითა აღხოცენ უსჯულოებაჲ ჩემი და შემიწყალე მე, ღმერთო.

 

 

  გერი: რომელმან მრავალგზის მოეც ძლევაი მეფეთა ჩუენთა, ქრისტე, და ადიდე ეკლესიაი მართლმადიდებლობასა შინა, ეგრეთვე აწ შეიწირე ლოცვანი ჩუენნი და ეკლესიაი შენი დაიცევ შეუძრველად; მოანიჭე ჯუარითა ძლევაი ერსა ჩუენსა; სიმტკიცე მორწმუნეთა და აღმაღლებაი რქისა მათისაი მწვალებელთა ზედა, მშვიდობაი სოფელსა და წყალობაი სულთა ჩუენთა.

 

 

ლოცვა მღვდლისა მიერ სათქუმელი

 

 აცხოვნე, ღმერთო, ერი შენი, და აკურთხე სამკვიდრებელი შენი, მოხედენ სოფელსა შენსა წყალობითა და მოწყალებითა, აღამაღლე რქაი ქრისტეანეთა მართლმადიდებელთაი, და გარდამოავლინენ ჩუენ ზედა მდიდარნი წყალობანი შენნი, მეოხებითა ყოვლადწმიდისა დედოფლისა ჩუენისა ღმრთისმშობელისა, და მარადის ქალწულისა მარიამისაითა; ძლიერებითა პატიოსნისა და ცხოველსმყოფელისა ჯუარისაითა; მეოხებითა პატიოსანთა უხორცოთა ზეცისა ძალთაითა; პატიოსნისა, დიდებულისა, წინაისწარმეტყუელისა, წინამორბედისა და ნათლისმცემელისა იოვანეისითა, წმიდისა დიდისა წინაისწარმეტყუელისა ელია თეზბიტელისა და მართლისა ენუქისითა; წმიდათა დიდებულთა, და ყოვლად–ქებულთა მოციქულთა თავთა, პეტრეისა და პავლეისითა; წმიდისა მოციქულისა თომასი და საქართველოს განმანათლებელთა მოციქულთა: ანდრია პირველწოდებულისა, სვიმონ კანანელისა, ბართლომესი, თადეოზისა და მატათაისითა; ღირსისა დედისა ჩუენისა, მოციქულთა სწორისა ქალწულისა ნინო ქართველთ განმანათლებელისა და წმიდათა მოციქულთა სწორთა: მეფისა მირიანისა და დედოფლისა ნანაისითა; წმიდათა შორის მამათა ჩუენთა, და მსოფლიოთა დიდთა მოძღუართა და მღდელმთავართა: ბასილი დიდისა, გრიგოლი ღმრთისმეტყუელისა, და იოვანე ოქროპირისაითა; წმიდათა შორის მამისა ჩუენისა ნიკოლოზ მირონ–ლუკიის მთავარეპისკოპოსისა და საკვირველთმოქმედისაითა; წმიდისა დიდებულისა და ღუაწლისა–მძლისა მოწამისა, ძლევა–შემოსილისა გიორგისა და წმიდათა დიდთა ქალწულ–მოწამეთა ბარბარეისა და მარინეისითა; წმიდათა მამამთავართა ჩუენთა: პეტრე, სამუელ, სარმიან, მამაი, არსენ, მელქისედეკ, იოანე–ოქროპირ, ნიკოლოზ, ევდიმოზ, იოსებ, კირიონ, და ამბროსისაითა; ღირსისა მამისა ჩუენისა იოვანე ზედაზნელისა და ათორმეტთა მისთა მოწაფეთა, მეორედ განმანათლებელთა საქართველოს ეკლესიისა და მარადის მფარველთა მისთა და წმიდისა მღდელმოწამისა ნეოფიტე ურბნელისაითა; ღმრთივ–განბრძნობილთა ნეტართა მამათა ჩუენთა: ილარიონ ქართველისა, სერაპიონ ზარზმელისა, გრიგოლ ხანძთელისა და საბა იშხნელისაითა; ღირსთა მამათა ჩუენთა ათონელთა: იოვანე და გაბრიელ ქართველთა, იოვანე თორნიკ–ყოფილისა და ეფთვიმე და გიორგი მთაწმინდელთაითა; წმიდათა დიდებულთა და ღუაწლისა–მძლეთა მოწამეთა ჩუენთა: რაჟდენისა, ევსტათი მცხეთელისა, ჰაბო ტფილელისა, მიქაელ–გობრონისა, თევდორე მღდლისა, ქრისტეფორე გურულისა, ნიკოლოზ დვალისა, კოზმანისა, არგვეთისა მთავართა დავით და კონსტანტინეისა და კონსტანტინე მთავრისაითა; წმიდისა მთავარ–მოწამისა ბიძინასა და წმიდათა დიდებულთა მოწამეთა: შალვა და ელიზბარ ქსნის ერისთავთაითა; წმიდისა მოწამისა შალვა ახალციხელისა და წმიდათა ათთა–ბევრთა მოწამეთა, ტფილისს ხუარაზმელთაგან მოწყუედილთაითა; წმიდათა მოწამეთა ექვსი ათასთა გარეჯელთა ბერთა და მრავალთა წმინდათა მამათა და დედათა, აჭარაში თურქთაგან წამებულთაითა; წმიდათა ღუაწლისამძლეთა მეფეთა და დედოფალთა: მირდატ, აშოტ, არჩილ, დემეტრე, ლუარსაბ, შუშანიკ და ქეთევანისაითა და წმიდათა კეთილ–მორწმუნეთა და დიდთა მეფეთა ჩუენთა: ვახტანგ გორგასალისა, დავით აღმაშენებელისა, დემეტრე–დამიანეისა, თამარისა და სოლომონისაითა; წმიდისა ილია მართლისა, ექვთიმე ღმრთისკაცისა და ექვთიმე აღმსაარებლისაითა; წმიდათა აღმსარებელთა მამათა ჩუენთა, იოვანეისი და გიორგი–იოანე ბეთანიელთა და ღირსისა მამისა ჩუენისა არქიმანდრიტისა გაბრიელისა, აღმსაარებელისა და სალოსისაითა; წმიდათა და მართალთა მშობელთა ღმრთისაითა იოაკიმ და ანნაისითა (და წმიდისა სახელი, რომლისა არს ტაძარი და დღის წმიდანი მოიხსენიოს), და წმიდისა დიდისა მღდელმთავრისა, შანხაისა და სან–ფრანცისკოს მთავარეპისკოპოსისა იოანესი, განმანათლებლისა და საკვირველმოქმედისაითა, და ყოველთა წმიდათა შენთაითა გევედრებით შენ, მრავალ–მოწყალეო ღმერთო, შეისმინე ჩუენ ცოდვილთა ვედრებაი, და შეგვიწყალენ ჩუენ.

 

 მგალობელთა: უფალო, შეგჳწყალენ (12-გზის).

 

 მღდელმან: წყალობითა და მოწყალებითა და კაცთმოყუარებითა მხოლოდშობილისა ძისა შენისაჲთა, რომლისა თანა კურთხეულ ხარ, თანა ყოვლადწმიდით, სახიერით, და ცხოველსმყოფელით სულით შენითურთ, აწ და მარადის და უკუნითი უკუნისამდე.

 

 მგალობელთა: ამინ.

 

 

გალობა 7, კურთხეულარსა

 

  ძლისპირი: ვცოდეთ და უსჯულო ვიქმნენით, და სიცრუე ვყავთ წინაშე შენსა და არა დავიმარხეთ აწ, არცა ვყავთ, მეუფეო, ვითარ იგი შენ მამცენ ჩუენ, გარნა ნუ მიმცემ ჩუენ სრულიად, მაღალო, მამათა ჩუენთა ღმერთო.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

რომელმან მრავლითა კაცთ-მოყუარებითა თვისითა არა ინებე დატევებაი კაცისაი ხელმწიფებასა ქუეშე ეშმაკისასა, მოწყალეო, დასასრულსა საუკუნეთასა წარწყმედად მიწევნულნი ღელვათაგან ცოდვათაისა (სახელები), იხსენ მხეცისაგან სულთა მომსრველისა.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

დასცენ, უფალო, მტერნი ცხოველსმყოფელისა ჯუარისა შენისანი და ღმრთისმშობელისანი, და იხსენ ერი ჩუენი ბოროტისაგან და გარემომზღუდენ ყოვლისაგან სიბილწისა და საცთურისა, ვითარცა მხოლოი ქველისმოქმედ ხარ.

დიდებაი მამასა და ძესა და წმიდასა სულსა

მხსნელო იესუ, უძლურ ყვენ ყოვლისა ბანგისა განმავრცელებელნი – ურწმუნონი და შემწენი ეშმაკისანი, და დააკუეთე იგინი, ხოლო ვინაი მოეგოს გულისხმასა, მსგავსად ნინეველთაისა, მარადის აქებდეს ღმერთსა.

აწ და მარადის და უკუნითი უკუნისამდე, ამენ.

ვითარცა ზღუდე შეუძრუელი და დაურღუეველი, და გოდოლი შეურყეველი ხარი შენ ქრისტეანეთა ერთა, ეგრეთვე აწ ჩუენცა შენ გხადით, დედოფალო, რაითა გვიხსნნე ყოველთაგან ჭირთა, სენთა და სატანჯველთა.

 

 

გალობა 8, აკურთხევდითსა

 

  ძლისპირი: წმიდანი შენნი ყრმანი ბაბილონსა შინა, ქერაბინთა მიმსგავსებულნი სამსა წმიდასა გალობასა იტყოდეს: გაკურთხევთ შენ, გიგალობთ და აღგამაღლებთ ყოველთა ღმერთსა.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

აჰა, ლომებრ გუექადიან მტერნი ჩუენნი და გვაჭირვებენ, არამედ შენ დაამდაბლე სიმაღლე მათი და გვიხსენ უკეთურთა ბოროტისყოფისაგან, რაითა ცნან, ვითარმედ ერნი ვართ სამწყსოისა შენისა.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

თუალითა შენითა ყოვლისა მხედველითა მოიხილე გესლითა დაბანგულთა და მარადის გონება-დახშულთა ზედა (სახელები). შეიწყალე და განჰკურნე აღურაცხელითა მოწყალებითა შენითა.

დიდებაი მამასა და ძესა და წმიდასა სულსა

სამებაო წმიდაო, აღამაღლე რქაი ეკლესიისაი სიმაღლესა ზედა სარწმუნოებისა შენისასა, საფუძველსა შეურყეველსა, და მას შინა განაძლიერე ერი ჩუენი და მოანიჭე ძლევაი მბრძოლთა ზედა.

აწ და მარადის და უკუნითი უკუნისამდე, ამენ. ღმრთისმშობელო, ყოვლად საგალობელო, შენ ყოველივე ძალგიძს, პირველ საუკუნისა ძისა შენისა თანა, ევედრე უკუე მას, ვითარცა მოწყალე დედაი, ხსნად ჩუენდა ყოველთა ურვათაგან.

 

 

გალობა 9, ადიდებდითსა

 

  ძლისპირი: შენ მხოლოო სანატრელ ხარ თესლებსა შორის, ქალწულო, რამეთუ გამოგვიბრწყინდა შენგან ნათელი მსხდომარეთა ბნელსა მას შინა, და განანათლნა სულნი ჩუენნი. ამისთვის ღმრთისმშობელო, სამართლად გადიდებთ.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

ვითარცა ძუელ-ოდესმე ყოვლადძლიერითა მხედართმძღუანველობითა შენითა იხსენ სამეფოი ქალაქი მტერისაგან, ეგრეთვე აწ დაჰხსენ მზაკუვარებანი ურიცხუთა მტერთა და მაჭირვებელთა ჩუენთა, უბიწოო, და გვიხსენ შინა-განცემისაგან ანგართა მმართველთასა.

უფალო იესუ ქრისტე, მაცხოვარო ჩუენო, შეგვიწყალენ ჩუენ.

ჰოი, დედოფალო წმიდაო, ქრისტეს მტვირთუელო წიაღითა, მოგუფინე წყალობაი შენი, ვითარცა ღრუბელი ნათლისაი, და ახალნერგნი შვილნი ერისა ჩუენისანი განარინე ყოველთა ცნობის მიმხდელთა და წარწყმედელთა მათ ვნებათა და უკეთურებათა.

დიდებაი მამასა და ძესა და წმიდასა სულსა

ზეცისა ძალთა, გუნდთა უხილავთა მიერ გარე-შეზღუდენ ვნებულნი ესე მონანი (სახელები) და უჩინო-ჰყუენ სასტიკი სნეულებაი იგი მათი, ქალწულო წმიდაო ღმრთისმშობელო, და კუალად განამტკიცე, რაითა დაიცვან მცნებანი ძისა შენისანი.

აწ და მარადის და უკუნითი უკუნისამდე, ამენ.

ძალ და სიმტკიცე, მფარუელ და განმაძლიერებელ ექმენ ერსა შენსა, ქალწულო – წიაღითა მტვირთუელო ქრისტეს ღმრთისაო, და მოწყალე-ჰყავ იგი, რაითა დაგვიფაროს ღელვათა და ჭირთაგან, და გვიხსნნეს ცეცხლისა მისგან მერმისა მოსლუადისა.

 

 

 მგალობელთა: ღირს-არს ჭეშმარიტად, რათა გადიდებდეთ, შენ ღვთისმშობელო, რომელი მარადის სანატრელ იქმენ, ყოვლად-უბიწოდ და დედად ღვთისა ჩვენისა. უპატიოსნესსა ქერუბინთასა, და აღმატებით უზესთაესსა სერაბინთასა, განუხრწნელად მშობელსა სიტყვისა ღვთისასა, მხოლოსა ღვთისმშობელსა გალობით გადიდებდეთ. ("ღირს - არს" - ის ნაცვლად საკითხავი საგალობლები)

 

მღვდელმან აკმიოს.

 

 მკითხველმან: თვით მასწავე რაი, მხსნელო ჩუენო და მაცხოვარო, ლოცვად ესრეთ ღმრთივ ბრწყინვალედ ყოლადსამარადისოდ: `მამაო ჩუენო ზეცათაო, შეგვინდვენ და მოგვიტევენ თანანადებნი ჩუენნი, და ნუ შემიყვანებ ჩუენ განსაცდელსა მას წინამდებარესა, არამედ მიხსნენ ჩუენ ბოროტისა მისგან ამპარტავანისა მტერისა, სულთა და ხორცთა ჩუენთა მომსრველისა, სოფლისმპყრობელისა, ბნელისა ბელიარისა~.

მაცხოვარო ჩუენო, სიტყუაო და ძალო მამისაო, შეგვიწყალენ და დააცხურე რისხუაი შენი ცოდვათათვის ჩუენთა, ქრისტე, და დაამხუე სილაღე ორგულთა და ანგართა, ფრიად მოაუძლურეს რაი საზეპუროი ერი ესე შენი მრავლსახეთა მიერ ვნებათაგან, და მიაგე მათ სასჯელი შენი სამართლად.

აწ ზარგანხდილ არიან და მთრთოლვარენი დედანი, და დანი და შვილნი საწყალობელთა მათ ვნებულთა, და ბანგითა და ჰაშიშითა გონებაწართმეულთა და აღიმსთობენ რაი შენდა მომართ, ყოვლად-ძლიერო იესუ, მხსნელო ჩუენო, ცრემლთა მდინარესა ამცვრევენ, და გევედრებიან მახლობელთა თვისთა კურნებასა და ვნებისა მისგან გათავისუფლებასა.

აჰა, აწ მრავალნი უღმრთონი და წარმართნი ექადიან ერსა შენსა, წმიდაო მარიამ, და განიზრახვენ რაი მისთვის ბოროტსა, ნუ მისცემ ხელთა მათსა, რაითა არა ჰსთქუან: სადა არს ღმრთისმშობელი, რომლისა მიმართ აქუსთ სასოებაი, და სამწყსოსა შენსა მოეც კეთილდღეობა და მშვიდობაი, რაითა უვნებელად დაცულნი გმადლობდეთ შენ და ვადიდებდეთ ღმერთსა:

 

 

 წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).

 

 დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 

 ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.

 

 უფალო შეგვიწყალენ (3-გზის).

 

 დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 

 მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.

 

 მღვდელმან: რამეთუ შენი არს სუფევა, ძალი და დაიდება, მამისა და ძისა და წმიდისა სულისა, აწ და მარადის და უკუნითი უკუნისამდე.

 

 მგალობელთა: ამინ.

 

 მკითხველმან: მიწყალენ ჩუენ, უფალო, შემიწყალენ ჩვენ, რამეთუ ყოველსავე სიტყვის-მიცემისაგან უღონო ვართ, გარნა ამას ვედრებასა შენ, მეუფისა სახიერისა, ცოდვილნი ესე შევსწირავთ. მიწყალენ ჩუენ, უფალო, შეგვიწყალენ ჩუენ.

 

 დიდება მამასა და ძესა და წმიდასა სულსა.

 

 უფალო, შემიწყალენ ჩუენ, რამეთუ შენ გესავთ, ნუ განმირისხდები ჩუენ ფრიად, და ნუცა მოიხსენებ უსჯულოებათა ჩუენთა, არამედ მოიხილე ჩუენზედა წყალობით, ვითარცა სახიერ ხარ, და გვიხსენ ჩუენ სამართლად რისხვისაგან შენისა, რამეთუ შენ ხარ ღმერთი ჩუენი, და ჩუენ ვართ ერნი შენნი, ყოველნივე ქმნულნი ხელითა შენთანი ვართ და სახელი შენი წოდებულ არს ჩუენზედა, და შემიწყალენ ჩუენ.

 

 აწ და მარადის, და უკუნითი უკუნისამდე, ამინ.

 

 მოწყალების კარი განგვიღე, კურთხეულო ღმრთისმშობელო, რათა, რომელნი ესე შენ გესავთ, არა დავეცნეთ, არამედ განვერნეთ წინააღმდგომთა მტერთაგან, რამეთუ შენ ხარ ცხოვრება ნათესავისა ქრისტიანეთასა.

 

 

მცირე მრჩობლი კვერექსი

 

 დიაკონმან: შეგჳწყალენ ჩუენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა გევედრებით, წყალობისა, სიცოცხლისა, მშვიდობისა, სიმრთელისა, დღეგრძელობისა, ცხოვრებისა, განათლებისა, მოტევებისა, კეთილად წარმართებისა და მყუდროებისა მონისა (ანუ მჴევლისა) ღმრთისა.

 

 მგალობელთა: უფალო, შეგჳწყალენ (3-გზის).

 

 დიაკონმან: რათა დაიცვას უფალმან ღმერთმან ჩუენმან სამეუფო ქალაქი ესე, ყოველნი ქალაქნი, და სოფელნი ივერიისა სიყმილისაგან, სრვისა, ძრვისა, დანთქმისაგან, ცეცხლისა და მახვილისა, უცხო-თესლთა ზედა მოსლვისაგან, რათა მოწყალე გვექმნეს ჩუენ ღმერთი კეთილად დგომისათჳს სახიერებითა და კაცთმოყვარებითა თჳსითა, და გარე წარაქციოს რისხვა, მარად დღე ჩუენზედა მომავალი, და გჳჴსნეს ჩუენ სამართლად ჩუენზედა მოწევნულისა რისხვისაგან, და შეგჳწყალნეს ჩუენ.

 

 მგალობელთა: უფალო, შეგჳწყალენ (40-გზის).

 

 მღდელმან: შეისმინე ჩუენი, ღმერთო, მაცხოვარო ჩუენო, სასოო ყოველთა კიდეთა ქუეყანისათაო, და რომელნი არიან ზღუათა შინა შორს და ცასა შინა, და მლხინებელ, და მოწყალე ექმენ შეცოდებათა ჩუენთა, და შეგჳწყალენ ჩუენ, რამეთუ მოწყალე და კაცთმოყუარე ღმერთი ხარ და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის, და უკუნითი უკუნისამდე.

 

 მგალობელთა: ამინ.

 

სავედრებელი ლოცვა

 

ჰოი, კაცთ-მოყუარეო უფალო იესუ ქრისტე, მაცხოვარო სულთა ჩუენთაო, რომელი წარწყმედულთა მოიძიებ და შეცთომილთა მოაქცევ, სნეულთა ჰკურნებ, მონანულთა შეიწყალებ, მკუდართა აღადგენ, და გლახაკთა ნუგეშინისცემ, აწ ჩუენცა გხადით მხსნელად ჭირთა და განსაცდელთა შინა, და გიღაღადებთ: მიითუალე სულთქუმაი და ვაებაი დედათა და დათაი, და პატიოსანთა მეუღლეთაი, ქმართა ზედა თვისთა მგოდებელთაი და ყრმათა შეჭირვებულთაი, და შენდამი აქა შევედრებულნი (სახელები) იხსენ მონებისაგან მომაკუდინებელისა მის ვნებისა და განჰკურნე საკვირველად, რაითა ვცნათ ყოველთა, ვითარმედ შენ ხარ ძალი ჩუენი და სიმტკიცე.

ჰოი, უფალო ღმერთო, მაცხოვარო ჩუენო იესუ ქრისტე, მტერნი და მოძულენი შენნი განძლიერდენ, და ზაკულებითა იღუწიან, რაითა ერიცა საუფლოი განხრწნან და გამოაჩინონ ერად ბნელისა, გარნა ჩუენ ვჰსასოებთ შენ ზედა და გევედრებით: მოგუმადლენ მხურვალებაი სარწმუნოებისაი, ძმებრივი სიყუარული მოყუასისაი და საღმრთოი მოშურნეობაი მამულისაი, ხოლო ყოველნი მოწყლულნი ვნებათა მძლავრებისაგან და ცოდვათა ბილწებითა წარტაცებულნი (სახელები) აღმოიტაცე სიღრმეთაგან წარწყმედისაითა და უბოძე ხსნაი სულისა და ხორცისაი. დაიფარე და მსახურებასა შინა განაძლიერე დიდი მეუფე ჩუენი, უწმიდესი და უნეტარესი, სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი, და ბიჭვინთისა და ცხუმ-აფხაზეთის მიტროპოლიტი, მამაი ჩუენი ილია და ყოვლადსამღდელონი მიტროპოლიტნი, მთავარეპისკოპოსნი და ეპისკოპოსნი, პატიოსანნი მღდელნი, ქრისტეს მიერ დიაკონნი და ყოველნი სამონაზვნო წესნი, ზიარნი მართლმადიდებელისა ეკლესიისანი და ყოველნი მართლმორწმუნენი ქრისტეანენი. დაიცევ, სახიერო უფალო, წმიდა ეკლესიაი ჩუენი და ყოველთა შვილთა მისთა კეთილად წარგვიმართე სლუაი გზასა ზედა ჭეშმარიტებისასა, რაითა ვსცხონდეთ, და ღირს ვიქმნეთ სასუფეველსა შენსა, რამეთუ მეუფებაი შენი კურთხეულ არს და დიდებულ, თანა დაუსაბამოით მამით შენით და ყოვლადწმიდით და ცხოველს-მყოფელით სულითურთ, აწ და მარადის და უკუნითი უკუნისამდე, ამენ.

 

 

 დიაკონმან: ყოვლადწმიდაო ღმრთისმშობელო, გუაცხოვნენ ჩუენ.

 

 მგალობელთა: უპატიოსნესსა ქერუბიმთასა და აღმატებით უზესთაესსა სერაბინთასა, განუხრწნელად მშობელსა სიტყჳსა ღმრთისასა, მხოლოსა ღმრთისმშობელსა გალობით გადიდებდეთ.

 

 მღდელმან: დიდებაჲ შენდა, ღმერთო ჩუენო, დიდებაჲ შენდა.

 

 მგალობელთა: დიდებაჲ მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 უფალო, შეგჳწყალენ (3-გზის).

 

 სახელითა უფლისათა, უწმიდესო და უნეტარესო მეუფეო გუაკურთხენ.

 

 მღვდელმან: ქრისტემან ჭეშმარიტმან ღმერთმან ჩუენმან, მეოხებითა ყოვლად უხრწნელისა დედისა თჳსისათა, წმიდათა დიდებულთა და ყოვლად ქებულთა მოციქულთა და (წმიდისა, რომლისაცა იყოს ტაძარი), წმიდათა და მართალთა მშობელთა ღმრთისათა იოაკიმ და ანნასითა (და წმიდისა, რომლისაცა იყოს დღე), და ყოველთა წმიდათათა, შეგჳწყალნეს და გვაცხოვნნეს ჩუენ, ვითარცა სახიერ არს და კაცთმოყუარე.

 

 მგალობელთა: ამინ. უფალო, შეგჳწყალენ (3-გზის).

 

 

განტევებისა შემდგომი საგალობელი

 

უფალო იესუ ქრისტე, სიმტკიცეო და სასოებაო ჩუენო, ნუ მოიხსენებ ცოდვათა ჩუენთა და ნუცა უკუნ-იქცევი რისხვითა შენითა, არამედ წყალობითა მოხედენ ერსა ჩუენსა, და შეჰმუსრენ და დაამხუენ უღმრთონი იგი მზაკუვარნი, რომელნი განიზრახუენ შვილთა ჩუენთა წარწყმედასა თრიაქითა, ჰაშიშითა და ბანგითა, რაითა სცნან ყოველთა, ვითარმედ შენ ხარ ღმერთი ჩუენი და ჩუენ – ერნი შენნი – ყოვლადვე დაცულნი ძლიერებითა შენითა.

ყოვლადუბიწოო ღმრთისმშობელო დედოფალო მარიამ, დედაო იესუ ტკბილისაო, გუაკურთხენ ჩუენ, სარწმუნოებითა შევრდომილნი დედობრივსა მას შენსა მადლსა და შეწევნასა, და ღირს-მყუენ დაუსრულებელსა დიდებასა ძისა შენისასა. ამენ!

 

შეადგინა თინათინ მჭედლიშვილმა