სავედრებელი პარაკლისი
წმიდისა მეფისა თეოდოსი დიდისა.

 

 მღვდელმან: კურთხეულ არს ღმერთი ჩუენი, ყოვლადვე, აწ და მარადის და უკუნითი უკუნისამდე.

 

 მკითხველმან: ამინ. დიდება შენდა, ღმერთო ჩვენო, დიდება შენდა.

 

 მეუფეო ზეცათაო, ნუგეშინისმცემელო, სულო ჭეშმარიტებისაო, რომელი ყოველგან ხარ და ყოველსავე აღავსებ მადლითა შენითა, საუნჯეო კეთილთაო, მომნიჭებელო ცხოვრებისაო, მოვედ და დაემკვიდრე ჩვენს შორის და წმიდა მყვენ ჩვენ ყოვლისაგან ბიწისა და აცხოვნენ, სახიერო, სულნი ჩვენნი.

 

 წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).

 

 დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 

 ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.

 

 უფალო შეგვიწყალენ (3-გზის).

 

 დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 

 მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.

 

 მღვდელმან: რამეთუ შენი არს სუფევაჲ, ძალი და დიდებაჲ აწ და მარადის და უკუნითი უკუნისამდე.

 

 მგალობელთა: ამინ.

 

 უფალო შეგვიწყალენ (12–ჯერ).

 

 

უფალო, შეისმინე ლოცვისა ჩემისაი, ყურად-იღე ვედრებაი ჩემი ჭეშმარიტებითა შენითა, შეისმინე ჩემი სიმართლითა შენითა; და ნუ შეხუალ საშჯელსა მონისა შენისა თანა, რამეთუ არა განმართლდეს შენ წინაშე ყოველი ცხოველი, რამეთუ დევნა მტერმან სული ჩემი და დაამდაბლა ქუეყანად ცხორებაი ჩემი, დამსუა მე ბნელსა შინა, ვითარცა მკუდარი საუკუნოი. და მოეწყინა ჩემთანა სულსა ჩემსა, და ჩემ შორის შემიძრწუნდა გული ჩემი. მოვიხსენე დღეთა პირველთაი, და ვიწურთიდ ყოველთა მიმართ საქმეთა შენთა და ქმნულსა ხელთა შენთასა ვზრახევდ. განვიპყრენ შენდამი ხელნი ჩემნი, და სული ჩემი, ვითარცა ქუეყანაი ურწყული შენდამი. მსთუად შეისმინე ჩემი, უფალო, რამეთუ მოაკლდა სულსა ჩემსა; ნუ გარე-მიიქცევ პირსა შენსა ჩემგან, და ვემსგავსო მათ, რომელნი შთავლენან მღვიმესა. მასმინე მე განთიად წყალობაი შენი, რამეთუ მე შენ გესავ; მაუწყე მე, უფალო, გზაი, რომელსაცა ვიდოდი, რამეთუ შენდამი აღვიღე სული ჩემი. მიხსენ მე მტერთა ჩემთაგან, უფალო, რამეთუ შენ შეგევედრე. მასწავე მე, რაითა ვყო ნებაი შენი, რამეთუ შენ ხარ ღმერთი ჩემი; სული შენი სახიერი მიძღოდეს მე ქუეყანასა წრფელსა. სახელისა შენისათვის, უფალო, მაცხოვნო მე და სიმართლითა შენითა გამოიყვანო ჭირისაგან სული ჩემი. და წყალობითა შენითა მოსრნე მტერნი ჩემნი და წარსწყმიდნე ყოველნი მაჭირვებელნი სულისა ჩემისანი, რამეთუ მე მონაი შენი ვარ.

 

 

 

 

 

 

 

ტროპარი

 

  მოღუაწე იქმენ კეთილმსახურებისა, დიდო მეფეო თეოდოსი, და სამეუფოითა ძალმოსილებითა აღმოფხუერ რაი საცთურნი მწვალებელთა და წარმართთა, დაამტკიცე მართლმადიდებელი სარწმუნოებაი, და მრავალი ერი მიჰგვარე ღმერთსა, მას ევედრე აწ ჩუენთვისცა, რაითა მოგვანიჭოს შენდობაი ცოდვათაი.

 

 დიდება მამასა და ძესა და წმიდასა სულსა.

 

  მოღუაწე იქმენ კეთილმსახურებისა, დიდო მეფეო თეოდოსი, და სამეუფოითა ძალმოსილებითა აღმოფხუერ რაი საცთურნი მწვალებელთა და წარმართთა, დაამტკიცე მართლმადიდებელი სარწმუნოებაი, და მრავალი ერი მიჰგვარე ღმერთსა, მას ევედრე აწ ჩუენთვისცა, რაითა მოგვანიჭოს შენდობაი ცოდვათაი.

 

 აწ და მარადის და უკუნითი უკუნისამდე, ამინ.

 

 არასადა დავსდუმნეთ, ღმრთისმშობელო, ძლიერებათა შენთა ქებად, უღირსნი ესე მონანი შენნი. რამეთუ არათუმცა შენ გვფარევდი ოხითა შენითა, ვინმცა სადა გვიხსნნა ჩუენ ესოდენთა ჭირთაგან; ანუ ვინმცა დაგვიცვნა ჩუენ აქამომდე ფლობილად? არასადა განგეშორნეთ ჩუენ, დედოფალო კურთხეულო, რამეთუ შენ იხსნი სულთა ჩუენთა ყოველთა განსაცდელთაგან.

 

 

ფსალმუნი 50

 

1. მიწყალე მე, ღმერთო, დიდითა წყალობითა შენითა და მრავლითა მოწყალებითა შენითა ახოცე უშჯულოებაი ჩემი. 

 

2. უფროის განმბანე მე უშჯულოებისა ჩემისაგან და ცოდვათა ჩემთაგან განმწმიდე მე. 

 

3. რამეთუ უშჯულოებაი ჩემი მე უწყი, და ცოდვაი ჩემი წინაშე ჩემსა არს მარადის. 

 

4. შენ მხოლოსა შეგცოდე და ბოროტი შენ წინაშე ვყავ; რაითა განმართლდე სიტყუათაგან შენთა და სძლო შჯასა შენსა. 

 

5. რამეთუ ესერა უშჯულოებათა შინა მიუდგა და ცოდვათა შინა მშვა მე დედამან ჩემმან. 

 

6. რამეთუ ესერა ჭეშმარიტებაი შეიყუარე, უჩინონი და დაფარულნი სიბრძნისა შენისანი გამომიცხადენ მე. 

 

7. მასხურო მე უსუპითა და განვწმიდნე მე, განმბანო მე და უფროის თოვლისა განვსპეტაკნე. 

 

8. მასმინო მე გალობაი და სიხარული, და იხარებდენ ძუალნი დამდაბლებულნი. 

 

9. გარე-მიაქციე პირი შენი ცოდვათა ჩემთაგან და ყოველნი უშჯულოებანი ჩემნი ახოცენ. 

 

10. გული წმიდაი დაჰბადე ჩემ თანა, ღმერთო, და სული წრფელი განმიახლე გუამსა ჩემსა. 

 

11. ნუ განმაგდებ მე პირისა შენისაგან და სულსა წმიდასა შენსა ნუ მიმიღებ ჩემგან. 

 

12. მომეც მე სიხარული მაცხოვარებისა შენისაი და სულითა მთავრობისათა დამამტკიცე მე. 

 

13. ვასწავლნე უშჯულოთა გზანი შენნი და უღმრთონი შენდა მოიქცენ. 

 

14. მიხსენ მე სისხლთაგან, ღმერთო, ღმერთო ცხორებისა ჩემისაო, იხარებდეს ენაი ჩემი სიმართლესა შენსა. 

 

15. უფალო, ბაგენი ჩემნი აღახუნე, და პირი ჩემი უთხრობდეს ქებულებასა შენსა. 

 

16. რამეთუ უკეთუმცა გენება, მსხუერპლი შე-მცა-მეწირა, არამედ საკუერთხი არა გთნდეს. 

 

17. მსხუერპლი ღმრთისა არს სული შემუსრვილი, გული შემუსრვილი და დამდაბლებული ღმერთმან არა შეურაცხ-ჰყოს. 

 

18. კეთილი უყავ, უფალო, ნებითა შენითა სიონსა და აღეშენნენ ზღუდენი იერუსალემისანი. 

 

19. მაშინ გთნდეს მსხუერპლი სიმართლისაი, შესაწირავი და ყოვლად-დასაწუელი; მაშინ შეიწირნენ საკურთხეველსა შენსა ზედა ზუარაკნი.

 

 

გალობაი 1, უგალობდითსა

 

ძლისპირი: ქუეყანასა მწყურნებსა, ვითარცა ხმელსა, განვიდა და შრომათაგან ეგვიპტისათა განერა ერი ისრაელთაი, და ღაღადებდა: მხსნელსა ჩუენსა და უფალსა უგალობდეთ.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

ქებით შეგამკობთ შენ, ჰოი, მეფეო წმიდაო და რჩეულო, და გევედრებით: მიითუალე სავედრებელი ესე გალობაი, შეწირული შენდა და გვითხოვე ღმრთისაგან შენდობაი ცოდვათაი.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

შეიყუარე რაი ღმერთი, წმიდაო თეოდოსი, ღმერთმანცა შეგიყუარა, გვირგვინოსან-გყო და გადიდა, ვითარცა საწუთროსა ამას შინა, ეგრეთცა საუკუნოდ ცათა შინა.

დიდებაი მამასა და ძესა და წმიდასა სულსა

მსგავსად მზის თუალისა გამოჰბრწყინდი, პატიოსანო მეფეო, და განანათლენ ყოველნი ცის კიდენი საღმრთოითა მით ნათლითა და ეკლესიაი დაიცევ მწვალებელთაგან.

აწ და მარადის და უკუნითი უკუნისამდე, ამინ.

ბჭეო აღმოსავალისა საღმრთოისაო, განმიხვენ მე კარნი სინანულისანი და ბჭეთაგან სიკუდიდ-შემოსილისა ცოდვისათა, შუამდგომელობითა შენითა მიხსენ მე, ყოვლადწმიდაო ქალწულო.

 

 

გალობა 3, განძლიერდასა

 

ძლისპირი: განმაძლიერებელ მექმენ მე, დამბადებელო ცისაო და ქუეყანისაო წყალთა ზედა. დამამტკიცე მე, ქრისტე, ეკლესიისა კლდესა ზედა, რამეთუ არა ვინ არს წმიდაი შენებრ, კაცთ-მოყუარე.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

რაჟამს იყო ურვასა შინა უმწყემსოებისასა ერი იგი ჰრომისაი, მოვიდა მათდა კაცი ღმრთისაი, და განსწავლიდა, რაითა მწყემსისა კეთილისა მოცემაი ევედრონ ღმერთსა.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

იწყეს რაი მარხვად და ლოცვად მორწმუნეთა, ერთობითა ხმობდენ ქრისტეის მიმართ: მოჰხედე, მხსნელო, ვენახსა ამას შენსა, რომელი დაასხი ხელითა პირველ მეფისა კოსტანტინეისა.

დიდებაი მამასა და ძესა და წმიდასა სულსა

ესმა რაი უფალსა ხმაი მორწმუნეთა თვისთა ვედრებისაი, მოსცა მათ სარწმუნოი და გონიერი თეოდოსი მართალი, სათნოდ მეფედ და წინამძღურად, ვითარცა დავით ისრაელთა.

აწ და მარადის და უკუნითი უკუნისამდე, ამინ.

მოქალაქობისაგან წმიდისა განვვარდი, ყოვლადწმიდაო, და ვებაძუე პირუტყვთა და ყოვლითურთ დასჯილ ვიქმენ, მშობელო მსაჯულისაო, ყოვლისაგან დასჯისა მიხსენ და მაცხოვნე მე.

 

 

 

 

 

მრჩობლი კვერექსი

 

 დიაკონმან: შეგჳწყალენ ჩვენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა გევედრებით ღმრთივ–დაცულისა ერისა ჩუენისა და მეუფებისა მისისათჳს (მთავრობისა და მხედრობისა) მისისათჳს.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა გევედრებით უწმიდესისა და უნეტარესისა, სრულიად საქართველოს კათოლიკოს–პატრიარქისა და მცეთა–თბილისის მთავარეპისკოპოსისა და ბიჭვინთისა და ცხუმ–აფხაზეთის მიტროპოლიტისა, დიდისა მეუფისა, მამისა ჩუენისა ილიასათჳს, და ყოვლადუსამღვდელოესისა... (აქა მოიხსენეთ ადგილობრიბი მღვდელმთავარი), და ყოველთა ქრისტეს მიერ ძმათა ჩუენთათვის.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა ვევედრნეთ უფალსა ღმერთსა ჩუენსა, რაითა შეიწყალნეს... (აქა მოიხსენეთ სახელდებით ისინი, ვისთვისაც ევედრებით ღმერთს).

 

 მგალობელთა: უფალო, შეგჳწყალენ (3-გზის).

 

 დიაკონმან: განამრავლე, უფალო, ჟამნი და წელნი ცხოვრებისა მათისანი, და იხსნენ იგინი, უფალო, ყოვლისაგან ჭირისა, რისხვისა და იწროებისა, და ყოვლისაგან წყლულებისა სულისა და ხორცთასა, და მიუტევენ მათ ყოველნი შეცოდებანი მათნი, ნებსითნი და უნებლიეთნი.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა გევედრებით ყოველთა ძმათა და ყოველთა ქრისტიანეთათჳს.

 

 მგალობელთა: უფალო, შეგჳწყალენ (3-გზის).

 

 მღვდელმან: რამეთუ მოწყალე და კაცთმოყვარე ღმერთი ხარ, და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის და უკუნითი უკუნისამდე.

 

 მგალობელთა: ამინ.

 

კვერექსის ნაცვლად ერისკაცი იტყვის – უფალო, შეგვიწყალენ 40-გზის. დიდებაი… აწდა…

 

წარდგომა, ხმა 4

 

  იხარებს ერი მორწმუნეი წმიდასა ხსენებასა შენსა და ეკლესიასა შინა აქებს სათნოებათა შენთა და სიმდაბლესა, წმიდაო თეოდოსი, რამეთუ სახე ექმენ შემდგომთა მათ მეფეთა, და რომელნი გემსგავსნეს, შენ თანა იშუებენ ედემსა შინა, აწ ჩუენთვისცა ევედრე ღმერთსა, მოცემად სინანული და მოტევებაი ცოდვათაი.

 

 

გალობა 4, მესმასა

 

ძლისპირი: მესმა, უფალო, განგებაი საიდუმლოთა შენთა გამოუთქუმელთაი, განვიცადენ საქმენი შენნი და აღვიარე მე ღმრთეებაი შენი.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

არა ხვიდოდი მდიდართა თანა, და არცა იქცეოდი უღირსთა თანა, თეოდოსი, არამედ დამდაბლდი და აღგამაღლა ქრისტემან საყდართა ზედა ქალაქსა სამეუფოსა.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

ვითარცა სამოელ წინაისწარმეტყუელმან სცხო დავითს მწყემსობასა შინა, ეგრეთცა გცხო სულმან წმიდამან საღმრთოი გულისხმისყოფაი, გარდასცვალა გული შენი და მეფედ-გყო მრავალთა ერთა ზედა.

დიდებაი მამასა და ძესა და წმიდასა სულსა

საყდართა სამეუფოთა ღირს იქმენ რაი დაჯდომად, თეოდოსი, მფარველ ექმენ მართლმადიდებელთა, და განაქარვებდი მწვალებელთა და კერპთმსახურთა კადნიერებასა.

აწ და მარადის და უკუნითი უკუნისამდე, ამინ.

ცისკროვან-ჰყავ სული ჩემი, დაბნელებული შეცოდებათა სიმრავლითა, რომელმან ჰშევ მზეი სიმართლისაი, მარადის ქალწულო, და ძლევაი მოჰმადლე მართლმადიდებელთა ერთა.

 

 

გალობა 5, ღამითგანსა

 

ძლისპირი: განგუანათლენ ჩუენ ნათლითა შენითა, უფალო, და მკლავითა მაღლითა მორწმუნეთა მშვიდობაი შენი ზეცით მომეც ჩუენ, კაცთ-მოყვარე.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

მხნეი იყავ, მეფეო თეოდოსი, და ახოვნად ბრძოდი რაი ურიცხუთა მტერთა, ჟამსა მას კონსტანტინეპოლეს წარსლვაი ებრძანა ზეგარდამო გრიგოლი ღმრთისმეტყუელსა, რაითა იხსნას მკვიდრნი მისნი წვალებათაგან.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

ბარბაროზთა ზედა განგიმარჯვა რაი უფალმან, დიდებითა შეხვედ სამეუფოსა მას ქალაქსა, და განდევნე რაი მწვალებელნი, სიყუარულითა შეიტკბე მათ მიერ დევნული ღირსი გრიგოლი და წარუძეღ სამოციქულოსა მას ტაძარსა.

დიდებაი მამასა და ძესა და წმიდასა სულსა

შებრძანდა რაი საკურთხეველსა ღირსი იგი მღდელთმთავარი, განბრწყინდა გარემოი საკვირველად და განცვიფრებულმან ხმა-ყავ: aჰა ესერა, მამაო საწადელო, ჩემ მიერ მოგცემს შენ ღმერთი კონსტანტინეპოლის საყდარსა.

აწ და მარადის და უკუნითი უკუნისამდე, ამინ.

განსწმიდე სული ჩემი, ღმრთისმშობელო ქალწულო, შეგინებული სიტკბოებითა ხორციელითა, ზაკუვათა მიერ გუელისაითა და მიხსენ სნეულებისგან ხორცთაისა.

 

 

გალობა 6, ღაღადყავსა

 

ძლისპირი: ვედრებასა ჩემსა განვჰფენ უფლისა მიმართ და მას აუვარებ ბრალთა ჩემთა მარადის, რამეთუ ბოროტითა აღივსო სული ჩემი და სიმტკიცე ჩემი ჯოჯოხეთად მიიწია, და იონაისებრ ვღაღადებ: აღმომიყუანე მე, ღმერთო ჩემო, უფსკრულისაგან ცოდვისა.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

ვითარცა ებანი ღმრთისმეტყუელი, ჰქუხდა რაი ღმრთისა დიდებასა გრიგოლი, არქიებისკოპოსი კონსტანტინეპოლისაი, აღგძრა შენ შეკრებად ასერგასთა მათ მამათა, ქრისტეის მოყუარეო მეფეო, და ქმენ იგი თავ და განმაჩინებელ მსოფლიოისა მის კრებისა.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

მწვალებლობანი შეაჩვენეს და ჭეშმარიტი სარწმუნოებაი დაამტკიცეს რაი ნიკიისა კრებასა მამათა, მრავალნი კანონნი განსაზღვრეს და სულიწმიდისა მიმართ მოციქულთა სწავლებაი შთაწერეს განჩინებათა შინა.

დიდებაი მამასა და ძესა და წმიდასა სულსა

ღმრთეებრივნი დოღმატნი სარწმუნოებისაი დაადგინეს რაი ღირსთა მათ მამათა, თანასწორად ცნეს პატივი ჰრომისა და კონსტანტინეპოლის ებისკოპოსთა, და შენცა დასვი ბეჭედი, წმიდაო მეფეო თეოდოსი, განჩინებასა მას კრებისასა.

აწ და მარადის და უკუნითი უკუნისამდე, ამინ.

განჰკურნე უკურნებელი და უძლური გული ჩემი, ღმრთისმშობელო, დაპყრობილი ვნებითა და სიბოროტითა, და შენმიერსა კურნებასა ღირს-მყავ და მაცხოვნე მე, მეოხებითა შენითა, ყოვლადწმიდაო ქალწულო.

 

 

 

 

კონდაკი, ხმაი 8

 

 ვითარცა ეკლესიასტეი იყავ რაი სიბრძნითა სავსეი, გონებასა შენსა განწმედდი საღმრთოითა ცნობითა და განჩინებათა მიერ შენთა დაუყვენ რაი პირნი მწვალებელთა, მით დაუმტკიცე მართალი სარწმუნოებაი ეკლესიათა, და ქრისტეის მადიდებელნი შეჰკრიბენ მას შინა.

 

 

 დიაკონმან: სიბრძნით. მოხედენ.

 

 მღდელმან: მშვიდობა ყოველთა.

 

 მგალობელთა: და სულისაცა შენისა თანა.

 

 დიაკონმან: წარდგომა ფსალმუნისაგან დავითისა, ხმაი 4: და აღვამაღლო რჩეული ერისაგან ჩემისა.

 

 მგალობელთა: და აღვამაღლო რჩეული ერისაგან ჩემისა.

 

 დიაკონმან:   ამისთვის გცხო შენ ღმერთმან, ღმერთმან ჩუენმან.

 

 მგალობელთა: და აღვამაღლო რჩეული ერისაგან ჩემისა.

 

 დიაკონმან: და აღვამაღლო რჩეული

 

 მგალობელთა: ერისაგან ჩემისა.

 

 მღდელმან: უფლისა მიმართ ვილოცოთ.

 

 მგალობელთა: უფალო, შეგჳწყალენ!

 

 მღდელმან: რამეთუ წმიდა ხარ შენ, ღმერთო ჩუენო, და რომელი წმიდათა შორის განისუენებ, და შენდა დიდებასა აღვავლენთ, მამისა, და ძისა და წმიდისა სულისა, აწ და მარადის, და უკუნითი უკუნისამდე,

 

 მგალობელთა: ამინ.

 

 დიაკონმან: ყოველი სული აქებდით უფალსა.

 

გუნდი: ყოველი სული აქებდით უფალსა.

 

 დიაკონმან: აქებდით ღმერთსა წმიდათა შორის მისთა, აქებდით მას სამყაროთა ძალისა მისისათა.

 

გუნდი: ყოველი სული აქებდით უფალსა.

 

 დიაკონმან: ყოველი სული

 

გუნდი: აქებდით უფალსა.

 

 დიაკონმან: ღირსყოფად ჩუენდა სმენად წმიდისა სახარებისა უფალსა ღმერთსა ჩუენსა ვევედრნეთ.

 

 მგალობელთა: უფალო, შეგჳწყალენ (3-გზის).

 

 დიაკონმან: სიბრძნით აღემართენით და ისმინეთ წმიდა სახარება.

 

 მღვდელმან: მშჳდობაჲ ყოველთა.

 

 მგალობელთა: და სულისაცა შენისა თანა.

 

 დიაკონმან: იოანესაგან წმიდისა სახარებისა საკითხავი.

 

 მგალობელთა: დიდებაჲ შენდა, უფალო, დიდებაჲ შენდა.

 

 დიაკონმან: მოხედენ.

 

სახარება იოანესი (თავი 10: 9-17)

 

  ჰრქუა უფალმან მოსრულთა მათ მისა მიმართ ჰურიათა, მე ვარ კარი: ჩემ მიერ თუ ვინმე შევიდეს, ცხონდეს; შევიდეს და გამოვიდეს და საძოვარი ჰპოვოს. ხოლო მპარავი იგი არა მოვიდეს, არამედ რაითა იპაროს, და დაკლას და წარწყმიდოს. ხოლო მე მოვედ, რაითა ცხორებაი აქუნდეს და უმეტესი აქუნდეს. მე ვარ მწყემსი კეთილი: მწყემსმან კეთილმან სული თვისი დადვის ცხოვართათვის. ხოლო სასყიდელით დადგინებულმან და რომელი არა არნ მწყემსი, რომლისა არა არიედ ცხოვარნი თვისნი, იხილის-რაი მგელი მომავალი, დაუტევნის ცხოვარნი და ივლტინ, და მგელმან წარიტაცნის იგინი და განაბნინის ცხოვარნი. ხოლო სასყიდლით დადგინებული იგი ივლტინ, რამეთუ სასყიდლით დადგინებულ არნ, და არარაი სჭირნ მას ცხოვართათვის. მე ვარ მწყემსი კეთილი და ვიცნი ჩემნი იგი, და მიციან ჩემთა მათ. ვითარცა მიცის მე მამამან, ვიცი მეცა მამაი და სულსა ჩემსა დავსდებ ცხოვართათვის. და სხუანიცა ცხოვარნი მიდგან, რომელნი არა არიან ამის ეზოისაგანნი; იგინიცა ჯერ-არიან მოყუანებად ჩემდა, და ხმისა ჩემისაი ისმინონ და იყვნენ ერთ სამწყსო და ერთ მწყემს.

 

 მგალობელთა: დიდებაჲ შენდა, უფალო, დიდებაჲ შენდა.

 

 მკითხველმან: დიდება მამასა და ძესა და წმიდასა სულსა.

 

 მეოხებითა წმიდისა ღმრთივგვირგვინოსანისა მეფისა თეოდოსი დიდისაითა, მოწყალეო, აღხოცენ ცოდვათა ჩუენთა სიმრავლენი.

 

 აწ და მარადის და უკუნითი უკუნისამდე, ამინ. 

 

 მეოხებითა წმიდისა ღმრთისმშობელისათა, მოწყალეო, აღხოცენ ცოდვათა ჩემთა სიმრავლენი.

 

მიწყალე მე, ღმერთო, დიდითა წყალობითა შენითა, და მრავლითა მოწყალებითა შენითა აღხოცენ უსჯულოებაჲ ჩემი და შემიწყალე მე, ღმერთო.

 

 

  გერი: მოიღე რაი პატივი და ნიჭი მეფობისაი, სიბრძნითა, კეთილმოქმედებითა და მხნეობითა განამტკიცებდი მართლმადიდებელთა და დაამხობდი რაი მტერთა მათთა, აწ ჩუენცა გვითხოვე ქრისტეის მიერ შეურყეველად დაცვაი ეკლესიათაი, და მოცემად ჯუარითა ძლევაი ერსა ჩუენსა, სიმტკიცეი მორწმუნეთა და ამაღლებაი რქისა მათისაი მწვალებელთა ზედა, მშვიდობაი სოფლისათვის და წყალობაი სულთა ჩუენთა.

 

 

ლოცვა მღვდლისა მიერ სათქუმელი

 

 აცხოვნე, ღმერთო, ერი შენი, და აკურთხე სამკვიდრებელი შენი, მოხედენ სოფელსა შენსა წყალობითა და მოწყალებითა, აღამაღლე რქაი ქრისტეანეთა მართლმადიდებელთაი, და გარდამოავლინენ ჩუენ ზედა მდიდარნი წყალობანი შენნი, მეოხებითა ყოვლადწმიდისა დედოფლისა ჩუენისა ღმრთისმშობელისა, და მარადის ქალწულისა მარიამისაითა; ძლიერებითა პატიოსნისა და ცხოველსმყოფელისა ჯუარისაითა; მეოხებითა პატიოსანთა უხორცოთა ზეცისა ძალთაითა; პატიოსნისა, დიდებულისა, წინაისწარმეტყუელისა, წინამორბედისა და ნათლისმცემელისა იოვანეისითა, წმიდისა დიდისა წინაისწარმეტყუელისა ელია თეზბიტელისა და მართლისა ენუქისითა; წმიდათა დიდებულთა, და ყოვლად–ქებულთა მოციქულთა თავთა, პეტრეისა და პავლეისითა; წმიდისა მოციქულისა თომასი და საქართველოს განმანათლებელთა მოციქულთა: ანდრია პირველწოდებულისა, სვიმონ კანანელისა, ბართლომესი, თადეოზისა და მატათაისითა; ღირსისა დედისა ჩუენისა, მოციქულთა სწორისა ქალწულისა ნინო ქართველთ განმანათლებელისა და წმიდათა მოციქულთა სწორთა: მეფისა მირიანისა და დედოფლისა ნანაისითა; წმიდათა შორის მამათა ჩუენთა, და მსოფლიოთა დიდთა მოძღუართა და მღდელმთავართა: ბასილი დიდისა, გრიგოლი ღმრთისმეტყუელისა, და იოვანე ოქროპირისაითა; წმიდათა შორის მამისა ჩუენისა ნიკოლოზ მირონ–ლუკიის მთავარეპისკოპოსისა და საკვირველთმოქმედისაითა; წმიდისა დიდებულისა და ღუაწლისა–მძლისა მოწამისა, ძლევა–შემოსილისა გიორგისა და წმიდათა დიდთა ქალწულ–მოწამეთა ბარბარეისა და მარინეისითა; წმიდათა მამამთავართა ჩუენთა: პეტრე, სამუელ, სარმიან, მამაი, არსენ, მელქისედეკ, იოანე–ოქროპირ, ნიკოლოზ, ევდიმოზ, იოსებ, კირიონ, და ამბროსისაითა; ღირსისა მამისა ჩუენისა იოვანე ზედაზნელისა და ათორმეტთა მისთა მოწაფეთა, მეორედ განმანათლებელთა საქართველოს ეკლესიისა და მარადის მფარველთა მისთა და წმიდისა მღდელმოწამისა ნეოფიტე ურბნელისაითა; ღმრთივ–განბრძნობილთა ნეტართა მამათა ჩუენთა: ილარიონ ქართველისა, სერაპიონ ზარზმელისა, გრიგოლ ხანძთელისა და საბა იშხნელისაითა; ღირსთა მამათა ჩუენთა ათონელთა: იოვანე და გაბრიელ ქართველთა, იოვანე თორნიკ–ყოფილისა და ეფთვიმე და გიორგი მთაწმინდელთაითა; წმიდათა დიდებულთა და ღუაწლისა–მძლეთა მოწამეთა ჩუენთა: რაჟდენისა, ევსტათი მცხეთელისა, ჰაბო ტფილელისა, მიქაელ–გობრონისა, თევდორე მღდლისა, ქრისტეფორე გურულისა, ნიკოლოზ დვალისა, კოზმანისა, არგვეთისა მთავართა დავით და კონსტანტინეისა და კონსტანტინე მთავრისაითა; წმიდისა მთავარ–მოწამისა ბიძინასა და წმიდათა დიდებულთა მოწამეთა: შალვა და ელიზბარ ქსნის ერისთავთაითა; წმიდისა მოწამისა შალვა ახალციხელისა და წმიდათა ათთა–ბევრთა მოწამეთა, ტფილისს ხუარაზმელთაგან მოწყუედილთაითა; წმიდათა მოწამეთა ექვსი ათასთა გარეჯელთა ბერთა და მრავალთა წმინდათა მამათა და დედათა, აჭარაში თურქთაგან წამებულთაითა; წმიდათა ღუაწლისამძლეთა მეფეთა და დედოფალთა: მირდატ, აშოტ, არჩილ, დემეტრე, ლუარსაბ, შუშანიკ და ქეთევანისაითა და წმიდათა კეთილ–მორწმუნეთა და დიდთა მეფეთა ჩუენთა: ვახტანგ გორგასალისა, დავით აღმაშენებელისა, დემეტრე–დამიანეისა, თამარისა და სოლომონისაითა; წმიდისა ილია მართლისა, ექვთიმე ღმრთისკაცისა და ექვთიმე აღმსაარებლისაითა; წმიდათა აღმსარებელთა მამათა ჩუენთა, იოვანეისი და გიორგი–იოანე ბეთანიელთა და ღირსისა მამისა ჩუენისა არქიმანდრიტისა გაბრიელისა, აღმსაარებელისა და სალოსისაითა; წმიდათა და მართალთა მშობელთა ღმრთისაითა იოაკიმ და ანნაისითა (და წმიდისა სახელი, რომლისა არს ტაძარი და დღის წმიდანი მოიხსენიოს), და წმიდისა დიდისა მღდელმთავრისა, შანხაისა და სან–ფრანცისკოს მთავარეპისკოპოსისა იოანესი, განმანათლებლისა და საკვირველმოქმედისაითა, და ყოველთა წმიდათა შენთაითა გევედრებით შენ, მრავალ–მოწყალეო ღმერთო, შეისმინე ჩუენ ცოდვილთა ვედრებაი, და შეგვიწყალენ ჩუენ.

 

 მგალობელთა: უფალო, შეგჳწყალენ (12-გზის).

 

 მღდელმან: წყალობითა და მოწყალებითა და კაცთმოყუარებითა მხოლოდშობილისა ძისა შენისაჲთა, რომლისა თანა კურთხეულ ხარ, თანა ყოვლადწმიდით, სახიერით, და ცხოველსმყოფელით სულით შენითურთ, აწ და მარადის და უკუნითი უკუნისამდე.

 

 მგალობელთა: ამინ.

 

 

გალობა 7, კურთხეულარსა

 

  ძლისპირი: ყრმანი ებრაელნი სახუმილსა შინა ვიდოდეს ცეცხლსა ზედა კადნიერებით შეცურეულნი ღაღადებდეს და იტყოდეს: კურთხეულ ხარ შენ, უფალო ღმერთო, უკუნისამდე.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

ღმრთისა შიშმან უშიშ გყო რაი სულთა მიმართ ბოროტთა, სული ძლიერებისაი დაადგრა შენთანა, ჰოი, მეფეო საკვირველო, და განაქარვებდი უხილავთა და ხილულთა მტერთა მრავალ-საფრხეთა.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

ქრისტემან მიგცა რაი მწყემსად სამწყსოთა თვისთა, ყოველთა აღაორძინებდი სულიერითა და ხორციელითა კეთილითა, აწ ჩუენცა წარგვიმართე გზასა მართალსა და დაგვიფარე ყოვლისაგან ჭირისა.

დიდებაი მამასა და ძესა და წმიდასა სულსა

იყავ რაი მართლ-განგებითა მსაჯული, ობოლთა მწყალობელი, შემწეი დაწუნებულთაი და მსაჯული ქურივთაი, ვითარცა ტკბილი და მოწყალეი მამაი, კეთილად განაგებდი ქუეყანასა შენსა.

აწ და მარადის და უკუნითი უკუნისამდე, ამინ.

ნებითა ჩემითა შეცოდებული და დამონებული ჩუეულებისაგან უჯეროისა, მოწყალებისა მომართ შენისა მოვივლტი განწირული, და გევედრები: მაცხოვნე მე, ყოვლადწმიდაო.

 

 

გალობა 8, აკურთხევდითსა

 

  ძლისპირი: შვიდწილ აღაგზნა სახუმილი მძლავრმან ქალდეველმან ყრმათათვის, გულისწყრომითა და რისხვითა, და ძალითა მაღლისაითა იხილნა უვნებელად დაცულნი ცეცხლისაგან განუხრწნელად, და დამბადებელისა მიმართ და მხსნელისა ღაღად-ყო: აკურთხევდით ყრმანი, და მღდელნი უგალობდით, ერნი უფროისად ამაღლებდით მას უკუნისამდე.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

ფრიადი სიმხნეი მოგანიჭა რაი ღმერთმან, ჰოი, ჰოი, წმიდაო ღმრთივგვირგვინოსანო მეფეო თეოდოსი, დახსნიდი ძალსა მტერისასა, და იცავდი რაი ერსა შენსა ზედა-დასხმისაგან მათისა, აწ ჩუენცა გვითხოვე ქრისტეის მიერ ხსნაი განსაცდელთაგან, და ძლევაი ურიცხუთა მტერთა და წინააღმდგომთა მისთა ზედა.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

ეჰა, სასწაული ღმრთეებრივისა მადლისაი, დაგამორჩილნა რაი მდინარენი, სამებისათვის მოღუაწეო, საკვირველთმოქმედო მეფეო, რამეთუ მიუწერე შენ ნილოსსა და მოუწოდე, რაითა მორწყოს ქუეყანაი წყურიელი, აწ ჩუენცა მეოხად მოგიგებთ ღმრთისა მიმართ, რაითა გვიხსნას სიყმილისაგან ხორცთაისა და სული ჩუენი გამოზარდოს პურითა გულისხმის-ყოფისაითა.

დიდებაი მამასა და ძესა და წმიდასა სულსა

ღმერთმან მხოლომან აღამაღლა მეფობაი შენი, და ვითარცა დავით ესროდი რაი სიტყვისა შურდულითა მწვალებელთა, ჭეშმარიტი სარწმუნოებაი განავრცე ყოველსა ქუეყანასა, აწ ჩუენცა ვესავთ შეწევნასა შენსა ღმრთისა მიმართ, რაითა წარმოავლინოს ჩუენდა ბრძენნი განმგებელნი და ღირსნი მამანი, მასწავლელნი საღმრთოისა სიტყვისა.

აწ და მარადის და უკუნითი უკუნისამდე, ამინ.

ღმრთისმშობელო, ყოვლად საგალობელო, შენ ყოველნი ძალგიძს, პირველ საუკუნისა ძისა შენისა თანა, ევედრე უკუე მას, ვითარცა მოწყალეი დედაი, რაითა ამაო ჰყვოს საშინელნი მზაკუვარებანი მათნი, რომელნი უკეთურთა იღუწიან სავნებელად ჩუენდა, და გვიხსნას სასჯელთაგან საუკუნეთა.

 

 

გალობა 9, ადიდებდითსა

 

  ძლისპირი: განკვირდეს ზესკნელს ცანი, და კიდენი ქუეყანისანი შეძრწუნებულ იქმნნეს, რაჟამს ღმერთი შენ მიერ კაცთა გამოუბრწყინდა და საშოი შენი უმაღლეის ცათა საყდართა გამოაჩინა. ამისთვის, ღმრთისმშობელო, ანგელოზნი და კაცნი, ვითარცა ღირს ხარ, გადიდებენ შენ.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

ვითარცა პირველ მოსე ზღუაი განაპო და დაანთქა ერი იგი ფარაოისი, ეგრეთვე შენ წარმართულნი ტაძარნი და საკერპონი დაარღვიე და პყრობილ-ყავ ჯადოქარნი და დახსნენ მანქანებანი მათნი, აწცა ძალითა ქრისტეისითა მტერთა ჩუენთა მზაკუვარებანი განაქარვე და დახსენ წინა-აღდგომაი მათი.

წმიდაო კეთილმსახურო მეფეო თეოდოსი, ევედრე ღმერთსა ჩუენთვის

ქრისტეის მხსნელისა იქმენ ერთგულ-მოწაფეი, ჰოი, ღმერთშემოსილო თეოდოსი, და სოფელსა შინა ჰქადაგე რაი ერთღმრთეებაი სამებით დიდებული, სწავლისა შენისაებრ აღვიარებთ ჩუენცა, და გევედრებით: რაითა ცოდვანი ჩუენნი მოგვიტევოს უფალმა და განანათლოს გულნი და გონებანი ჩუენნი.

დიდებაი მამასა და ძესა და წმიდასა სულსა

დაღათუ გაქუნდა სიმაღლეი ქუეყნიერი, ქრისტემოყუარეო მეფეო თეოდოსი, გარე წარჰხედ საწუთოისა საცთურთა, და სულითა დამდაბლებული ჰმსახურებდი ღმერთსა, მას ევედრე, აწ მომადლებისათვის ჩუენდა სინანულისა, რაითა საწუთოიცა ცხორებაი ჩუენი კეთილად განვვლოთ და განვერნეთ საუკუნეთა მათ სატანჯველთა.

აწ და მარადის და უკუნითი უკუნისამდე, ამინ.

ყოველთა შემოქმედი და უფალი, მიდგომილმან შევ უკუე, ქალწულო, და აჰა, მდგომარეი ხარ მარჯვენით მამისა, ვითარცა დედოფალი, წმიდაო, და აწ მეცა შემეწიე წინაშე მისა, რაითა ნაწილისაგან მარცხენისა მიხსნნეს მე, დღესა მას შინა სასჯელისასა და აღმრაცხოს მარჯვენითთა ცხოვართა თანა.

 

 

 მგალობელთა: ღირს-არს ჭეშმარიტად, რათა გადიდებდეთ, შენ ღვთისმშობელო, რომელი მარადის სანატრელ იქმენ, ყოვლად-უბიწოდ და დედად ღვთისა ჩვენისა. უპატიოსნესსა ქერუბინთასა, და აღმატებით უზესთაესსა სერაბინთასა, განუხრწნელად მშობელსა სიტყვისა ღვთისასა, მხოლოსა ღვთისმშობელსა გალობით გადიდებდეთ. ("ღირს - არს" - ის ნაცვლად საკითხავი საგალობლები)

 

მღდელმან აკმიოს:

 

 მკითხველმან: ვითარცა ნაძვი ლიბანისაი, აღმაღლდა სახელი შენი, ჰოი, მეფეო ქრისტესო შედგომილო, და ვითარცა დანიელ პირველ ლომთა დაუყვნა რაი პირნი ჯურღმულსა შინა, ეგრეთვე არა შეიწყნარებდი შენცა ღუარძლსა მას წვალებისასა, და აღავსებდი რაი ეკლესიათა მადლითა, წმიდათა შორის შეგრაცხა და გვიწესს სამწყსოსა თვისსა, რაითა მარადის გაქებდეთ შენ, წმიდაო თეოდოსი, ვითარცა ჭეშმარიტებისა მცველსა და და გევედრებოდეთ ლხინებასა.

ქმნულნი შენნი, დიდო მეფეო თეოდოსი, არცა-ღა დაინთქა სიღრმესა დავიწყებისასა, რამეთუ ძუელნი მატიანენი გვაუწყებენ, თუ ვითარ ვიდოდი გზასა მას ჭეშმარიტებისასა, და კეთილმსახურებითა თვისითა განამტკიცებდი რაი მორწმუნეობასა ერისასა, აწ იშვებ სასუფეველსა და განიცდი რაი სამებისა დიდებასა, ზეცით გარდამო მოგუხედენ, საწადელო მეფეო, და დაგვამტკიცე მართლ-სარწმუნოებასა ზედა.

ქრისტემან მოგცა მადლი სასწაულთაცა საქმედ და პატივ გცა რაი საწუთროსა ამას შინა, შემდგომად სიკუდილისა ამაღლდი წინაშე მისა, და გვირგვინოსან-გყო რაი დიდებითა და პატივითა, აწ გაქუს კადნიერებაი წინაშე მისა, დაგვიცვას უბიწოდ წვალებისაგან, რაითა წრფელითა გულითა ღაღადვჰყოთ: არა გეცრუვნეთ შენ, სიწმიდით მშობელო ჩუენო კათოლიკე ეკლესიაო, და არცა განგცეთ შენ, სიქადულო ჩუენო, მართლმადიდებლობაო, და ვაქებდეთ ღმერთსა.

ვაი, ერსა ზედა ჩუენსა მოწევნულსა ურვასა, რამეთუ დავმდაბლდით, და შევმცირდით და განვიბნინენით ყოველსა ქუეყანასა, გარნა მოქენე ვართ შეწევნისა შენისა ღმრთისა მიმართ, რაითა გარე წარაქციოს ურიცხუნი მტერნი და მაჭირვებელნი ჩუენნი, რომელნი ბოროტად შეთქუმულ-არიან ერსა ჩუენსა ზედა, და აღგვიდგინოს მამული ჩუენი პირველსავე დიდებასა, რაითა არა სთქუან ყოველთა, სადა არს ღმერთი იგი მათი, რომელთა მიმართ აქუთ სასოებაი.

მტკიცესა მას შენსა შეწევნასა შევრდომილნი, დიდებულო მეფეო თეოდოსი, შეგვაწყნარე მფარველსა ერისა ჩუენისასა, ყოვლადწმიდასა ქალწულსა ღმრთისმშობელსა, რაითა შეგვეწიოს ყოველსავე ჭირსა და საცთურსა შინა და აღგვავსოს მღვიძარებითა საღმრთოითა, რაითა ყოველნი ვიქმოდეთ სამართალსა და წმიდა არსითა და ალილუიათი უგალობდეთ სამებასა განუყოფელსა და შეურყვნელსა:

 

 

 წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).

 

 დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 

 ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.

 

 უფალო შეგვიწყალენ (3-გზის).

 

 დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 

 მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.

 

 მღვდელმან: რამეთუ შენი არს სუფევა, ძალი და დაიდება, მამისა და ძისა და წმიდისა სულისა, აწ და მარადის და უკუნითი უკუნისამდე.

 

 მგალობელთა: ამინ.

 

 მკითხველმან: მიწყალენ ჩუენ, უფალო, შემიწყალენ ჩვენ, რამეთუ ყოველსავე სიტყვის-მიცემისაგან უღონო ვართ, გარნა ამას ვედრებასა შენ, მეუფისა სახიერისა, ცოდვილნი ესე შევსწირავთ. მიწყალენ ჩუენ, უფალო, შეგვიწყალენ ჩუენ.

 

 დიდება მამასა და ძესა და წმიდასა სულსა.

 

 უფალო, შემიწყალენ ჩუენ, რამეთუ შენ გესავთ, ნუ განმირისხდები ჩუენ ფრიად, და ნუცა მოიხსენებ უსჯულოებათა ჩუენთა, არამედ მოიხილე ჩუენზედა წყალობით, ვითარცა სახიერ ხარ, და გვიხსენ ჩუენ სამართლად რისხვისაგან შენისა, რამეთუ შენ ხარ ღმერთი ჩუენი, და ჩუენ ვართ ერნი შენნი, ყოველნივე ქმნულნი ხელითა შენთანი ვართ და სახელი შენი წოდებულ არს ჩუენზედა, და შემიწყალენ ჩუენ.

 

 აწ და მარადის, და უკუნითი უკუნისამდე, ამინ.

 

 მოწყალების კარი განგვიღე, კურთხეულო ღმრთისმშობელო, რათა, რომელნი ესე შენ გესავთ, არა დავეცნეთ, არამედ განვერნეთ წინააღმდგომთა მტერთაგან, რამეთუ შენ ხარ ცხოვრება ნათესავისა ქრისტიანეთასა.

 

 

მცირე მრჩობლი კვერექსი

 

 დიაკონმან: შეგჳწყალენ ჩუენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა გევედრებით, მოწყალებისა, სიცოცხლისა, მშჳდობისა, სიმრთელისა, დღეგრძელობისა, მყუდროებისა, განათლებისა, ცხორებისა, შეწევნისა, შენდობისა და ცოდვათა  მოტევებისათჳს ყოველთა შვილთა ჩუენისა ეკლესიისა, რაჲთა დაიცვას უფალმან ღმერთმან ჩუენმან სამეუფოჲ ქალაქი ესე ჩუენი და წმიდაჲ ესე მონასტერი (ანუ ეკლესია) და ყოველი  სოფელი  სიყმილისაგან, სრჳსა, ძრჳსა, მახჳლისა, ზედა მოსლჳსაგან უცხო თესლთასა და ყოვლისაგან ბოროტისა;  რაჲთა მოწყალე გუექმნეს ჩუენ ღმერთი კეთილად დგომისათჳს სახიერებითა და კაცთმოყუარებითა თჳსითა, და გარე წარაქციოს რისხვაჲ, მარადის ჩუენ ზედა მომავალი, და გჳჴსნეს ჩუენ სამართლად ჩუენ ზედა მოწევნულისა რისხვისაგან, და შეგჳწყალნეს ჩუენ.

 

 მგალობელთა: უფალო, შეგჳწყალენ (12-გზის).

 

 მღდელმან: შეისმინე ჩუენი, ღმერთო, მაცხოვარო ჩუენო, სასოო ყოველთა კიდეთა ქუეყანისათაო, და რომელნი არიან ზღუათა შინა შორს და ცასა შინა, და მლხინებელ, და მოწყალე ექმენ შეცოდებათა ჩუენთა, და შეგჳწყალენ ჩუენ, რამეთუ მოწყალე და კაცთმოყუარე ღმერთი ხარ და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის, და უკუნითი უკუნისამდე.

 

 მგალობელთა: ამინ.

 

 დიაკონმან: მუხლმოდრეკით უფლისა მიმართ ვილოცოთ.

 

 მგალობელთა: უფალო, შეგჳწყალენ. 

 

 კვერექსის ნაცვლად ერისკაცი იტყვის – უფალო, შეგვიწყალენ 3-გზის. დიდებაი… აწდა…

 

სავედრებელი ლოცვა

 

  ჰოი, წმიდაო კეთილმსახურო მეფეო თეოდოსი, დიდო მნათობო ეკლესიისაო და სიბრძნითა განმგებელო სამეფოისა შენისაო, წარმართულთა ცდომათა აღმომფხურელო და დამამტკიცებელო მართლისა სარწმუნოებისაო, მეფეთა სიმტკიცეო, მთავართა დიდებაო, უძლურთა ძლიერებაო, გლახაკთა მწყალობელო, ობოლთა გამომზრდელო და მსაჯულო ქურივთაო, სიტყვიერთა სულთა შემწირველო ზეცისა მამისაო და დიდო მეოხო ჩუენო და ურცხვენელო შესავედრებელო წინაშე მაცხოვრისა და ყოვლადწმიდისა დედისა მისისაო!

ჰოი, მწყემსო კეთილო საღმრთოთა სამწყსოთაო, დიდო მეფეო თეოდოსი, ფრიადი სიბრძნეი მოგანიჭა რაი ქრისტემან ღმერთმან, ერჩდი ნებასა მისსა, და კეთილმსახურებითა თვისითა განამტკიცებდი რაი მორწმუნეობასა ერისასა, აწ ჩუენცა შეგვაწყნარე სახიერებასა მისსა, რაითა ეკლესიაი ჩუენი შეურყეველად დაიმარხოს ყოვლისაგან წუალებისა, და ერი ჩუენი, წილხვდომილი დედისა თვისისაი დაიცვას მტერისა საფრხისა და ძმათა შორის მტერობისგან, ხოლო ჩუენ მოგუმადლოს სიყუარული ღმრთისა და მოყუასისაი, და აღგვიდგინოს ცხებული ღმრთისაი, რომელიცა სარწმუნოებითა მტკიცითა მოჰკრძალავს სამზღუართა საქართუელოისათა, და აღამაღლებს და აღადგენს ღირსებასა და ძლიერებასა ჩუენსა ქუეყანით დავიწყებისაით, რაითა ვიყოთ ერთ სამწყსოი და უფალი იყოს მწყემს ჩუენდა. მრავალშემძლებელითა ძალითა შენითა დაიფარე და მსახურებასა შინა განაძლიერე დიდი მეუფეი ჩუენი, უწმიდესი და უნეტარესი, სრულიად საქართუელოს კათოლიკოს-პატრიარქი, მცხეთა-თბილისის მთავარეპისკოპოსი, და ბიჭვინთისა და ცხუმ-აფხაზეთის მიტროპოლიტი, მამაი ჩუენი ილია და ყოვლად-სამღდელონი მიტროპოლიტნი, მთავარ-ეპისკოპოსნი და ეპისკოპოსნი, წინამძღუარნი მონასტერთანი, მწყემსნი და მოძღუარნი, მოღუაწენი და აღმსარებელნი, მონაზონთა სიმრავლენი და ყოველნი ზიარნი მართლმადიდებელისა ეკლესიისანი; განანათლენ ქრისტეისმოყუარენი მთავრობანი და მხედრობანი; დაიცვენ კეთილისმყოფელნი ჩუენნი და ყოველნი მართლმადიდებელნი ქრისტეანენი.

ჰოი, სკიპტრისმპყრობელთა შორის უსაჩინოესო მეფეო თეოდოსი, მწყემსად ჭეშმარიტად დაგადგინა რაი სიტყუამან ჭეშმარიტებისამან, კიდეთა სოფლისათა განსთქვი სარწმუნოებაი მისი და გადიდა რაი ხორციელთა შორის, შემდგომად მიცვალებისაცა უხორცოთა თანა დაგამკვიდრა, და მოგანიჭა მადლი შეწევნისა და ეშმაკთა განსხმისაი, აწ ჩუენცა შეგვეწიე მისა მიმართ, რაითა აღმოგვიყვანოს სიღრმეთაგან ცოდვათასა და გვიხსნას სიყმილისაგან, სრვისა, ძრვისა, ცეცხლისა, განმხრწნელისა ქარისა, მახვილისა და ზედა დასხმისაგან მტერთაისა, უცნაურისა სიკუდილისა და ყოვლისაგან ბოროტისა, რაითა ვსცხონდეთ, და ღირს ვიქმნეთ სასუფეველსა ქრისტეის ღმრთისა ჩუენისაისა, რამეთუ მეუფებაი მისი კურთხეულ არს და დიდებულ, თანა დაუსაბამოთ მამით მისით და ყოვლად-წმიდით და ცხოველს-მყოფელით სულითურთ, აწ და მარადის და უკუნითი უკუნისამდე, ამინ.

 

 მგალობელთა: ამინ.

 

 დიაკონმან: სიბრძნით! ყოვლადწმიდაო ღმრთისმშობელო, გუაცხოვნენ ჩუენ.

 

 მგალობელთა: უპატიოსნესსა ქერუბიმთასა და აღმატებით უზე­სთაესსა სერაბინთასა, განუხრწნელად მშობელსა სიტყჳსა ღმრთისასა, მხოლოსა ღმრთისმშობელსა გალობით გადიდებდეთ.

 

 მღდელმან: დიდებაჲ შენდა, ღმერთო ჩუენო, დიდებაჲ შენდა.

 

 მგალობელთა: დიდებაჲ მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 უფალო, შეგჳწყალენ (3-გზის).

 

 სახელითა უფლისათა, უწმიდესო და უნეტარესო მეუფეო გუაკურთხენ.

 

 მღვდელმან: უფალო იესუ ქრისტე, ძეო ღმრთისაო, ლოცვითა ყოვლად წმიდისა დედისა შენისათა, ღირსთა და ღმერთშემოსილთა მამათა ჩვენთათა და ყოველთა წმიდათა შენთათა, შეგვიწყალენ ჩვენ, ამინ.

 

 მგალობელთა: ამინ. უფალო, შეგჳწყალენ (3-გზის).

 

დიდებაი მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

უფალო, შეგვიწყალენ (3-გზის),

უფალო, იესუ ქრისტე, ძეო ღმრთისაო, ლოცვითა ყოვლადწმიდისა დედისა შენისაითა, და ყოველთა წმიდათაითა, შეგვიწყალენ ჩუენ, ამინ.

 

ხატისა მთხვევასა ზედა ვჰგალობთ ესრეთ:

 

შეიწირე აწ ქებაი მადიდებელთა შენთაი, ქრისტეისმოყუარეო მეფეო, სანატრელო თეოდოსი, და ნუ მოიხსენებ ძვირთა ჩუენთა, არამედ შეგვეწიენ მხურვალითა შუამდგომელობითა წინაშე ღმრთისა, ვინაი ესე შეუვრდებით პატიოსანსა ხატსა შენსა, დაგვიცვას ხორციელთა სენთა და საეშმაკოთა ვნებათაგან, რაითა ჟამსა მას შინა განსჯისასა განვერნეთ საუკუნეთა მათგან მწარეთა სატანჯველთა და მარადის შენთანა ვადიდებდეთ მას ზეცათა იერუსალეიმსა შინა.

ყოველთა შეცოდებულთა სასოო და შემდგომად ღმრთისა შესავედრებელო და მფარველო ყოველთა ქრისტეანეთაო, უმეტესად კურთხეულო დედაო ქრისტეის ღმრთისა ჩუენისაო, მარადის ქალწულო მარიამ, მოხედენ ვედრებასა ჩუენსა და გვიხსენ ყოველთა ურვათა და ვნებათაგან.

 

შეადგინა: თინათინ მჭედლიშვილმა