მთავარი
ლოცვანი
ფსალმუნნი
ახალი აღთქმა
ძველი აღთქმა
დაუჯდომლები
პარაკლისები
განმარტებები
სხვადასხვა თემები
წიგნის შესახებ
მთავარი
ლოცვანი
ფსალმუნნი
ახალი აღთქმა
ძველი აღთქმა
დაუჯდომლები
პარაკლისები
განმარტებები
სხვადასხვა თემები
წიგნის შესახებ
მღვდელმან: კურთხეულ არს ღმერთი ჩუენი, ყოვლადვე, აწ და მარადის და უკუნითი უკუნისამდე.
მკითხველმან: ამინ. დიდება შენდა, ღმერთო ჩვენო, დიდება შენდა.
მეუფეო ზეცათაო, ნუგეშინისმცემელო, სულო ჭეშმარიტებისაო, რომელი ყოველგან ხარ და ყოველსავე აღავსებ მადლითა შენითა, საუნჯეო კეთილთაო, მომნიჭებელო ცხოვრებისაო, მოვედ და დაემკვიდრე ჩვენს შორის და წმიდა მყვენ ჩვენ ყოვლისაგან ბიწისა და აცხოვნენ, სახიერო, სულნი ჩვენნი.
წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.
უფალო შეგვიწყალენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.
მღვდელმან: რამეთუ შენი არს სუფევაჲ, ძალი და დიდებაჲ აწ და მარადის და უკუნითი უკუნისამდე.
მგალობელთა: ამინ.
უფალო შეგვიწყალენ (12–ჯერ).
1. უფალო, შეისმინე ლოცვისა ჩემისაი, ყურად-იღე ვედრებაი ჩემი ჭეშმარიტებითა შენითა, შეისმინე ჩემი სიმართლითა შენითა;
2. და ნუ შეხუალ სასჯელსა მონისა შენისა თანა, რამეთუ არა განმართლდეს შენ წინაშე ყოველი ცხოველი.
3. რამეთუ დევნა მტერმან სული ჩემი და დაამდაბლა ქუეყანად ცხოურებაი ჩემი, დამსუა მე ბნელსა შინა, ვითარცა მკუდარი საუკუნოი.
4. და მოეწყინა ჩემ თანა სულსა ჩემსა, და ჩემ შორის შემიძრწუნდა გული ჩემი.
5. მოვიხსენე დღეთა პირველთაი და ვიწურთიდ ყოველთა მიმართ საქმეთა შენთა და ქმნულსა ხელთა შენთასა ვზრახევდ.
6. განვიპყრენ შენდამი ხელნი ჩემნი, და სული ჩემი ვითარცა ქუეყანაი ურწყული შენდამი.
7. მსთუად შეისმინე ჩემი, უფალო, რამეთუ მოაკლდა სულსა ჩემსა, ნუ გარე-მიიქცევ პირსა შენსა ჩემგან, და ვემსგავსო მათ, რომელნი შთავლენან მღვიმესა.
8. მასმინე მე განთიად წყალობაი შენი, რამეთუ მე შენ გესავ; მაუწყე მე, უფალო, გზაი, რომელსაცა ვიდოდი, რამეთუ შენდამი აღვიღე სული ჩემი.
9. მიხსენ მე მტერთა ჩემთაგან, უფალო, რამეთუ შენ შეგევედრე.
10. მასწავე მე, რაითა ვყო ნებაი შენი, რამეთუ შენ ხარ ღმერთი ჩემი, სული შენი სახიერი მიძღოდენ მე ქუეყანასა წრფელსა.
11. სახელისა შენისათვის, უფალო, მაცხოვნო მე და სიმართლითა შენითა გამოიყვანო ჭირისაგან სული ჩემი.
12. და წყალობითა შენითა მოსრნე მტერნი ჩემნი და წარსწყმიდნე ყოველნი მაჭირვებელნი სულისა ჩემისანი, რამეთუ მე მონაი შენი ვარ.
ყოვლადძლიერო და ურცხვენელო შუამდგომელო ჩუენო, ყოვლადმოწყალეო ღმრთისმშობელო, სახიერო განმგებელო ქრისტეანეთაო, ნუ უგულებელს-ყოფ ვედრებათა ჩუენთა, არამედ განამტკიცე ეკლესიაი მართლმადიდებელთაი, და დაიცევ მამული ჩუენი მტერისა საფრხისაგან და კეთილდღეობაი მოანიჭე, რომელნი მართლმორწმუნებითა ცხოვნდებიან მას შინა, რამეთუ შენ ხარ, რომელმან ჰშევ ღმერთი ხორცითა, მხოლოო კურთხეულო.
დიდება მამასა და ძესა და წმიდასა სულსა.
ყოვლადძლიერო და ურცხვენელო შუამდგომელო ჩუენო, ყოვლადმოწყალეო ღმრთისმშობელო, სახიერო განმგებელო ქრისტეანეთაო, ნუ უგულებელს-ყოფ ვედრებათა ჩუენთა, არამედ განამტკიცე ეკლესიაი მართლმადიდებელთაი, და დაიცევ მამული ჩუენი მტერისა საფრხისაგან და კეთილდღეობაი მოანიჭე, რომელნი მართლმორწმუნებითა ცხოვნდებიან მას შინა, რამეთუ შენ ხარ, რომელმან ჰშევ ღმერთი ხორცითა, მხოლოო კურთხეულო.
აწ და მარადის და უკუნითი უკუნისამდე, ამინ.
არასადა დავსდუმნეთ, ღმრთსმშობელო, ძლიერებათა შენთა ქებად, უღირსნი ესე მონანი შენნი. რამეთუ არათუმცა შენ გვფარევდი ოხითა შენითა, ვინმცა სადა გვიხსნნა ჩუენ ესოდენთა ჭირთაგან; ანუ ვინმცა დაგვიცვნა ჩუენ აქამომდე ფლობილად? არასადა განგეშორნეთ ჩუენ, დედუფალო კურთხეულო, რამეთუ შენ იხსნი სულთა ჩუენთა ყოველთა განსაცდელთაგან.
ფსალმუნი 50
1. მიწყალე მე, ღმერთო, დიდითა წყალობითა შენითა და მრავლითა მოწყალებითა შენითა ახოცე უშჯულოებაი ჩემი.
2. უფროის განმბანე მე უშჯულოებისა ჩემისაგან და ცოდვათა ჩემთაგან განმწმიდე მე.
3. რამეთუ უშჯულოებაი ჩემი მე უწყი, და ცოდვაი ჩემი წინაშე ჩემსა არს მარადის.
4. შენ მხოლოსა შეგცოდე და ბოროტი შენ წინაშე ვყავ; რაითა განმართლდე სიტყუათაგან შენთა და სძლო შჯასა შენსა.
5. რამეთუ ესერა უშჯულოებათა შინა მიუდგა და ცოდვათა შინა მშვა მე დედამან ჩემმან.
6. რამეთუ ესერა ჭეშმარიტებაი შეიყუარე, უჩინონი და დაფარულნი სიბრძნისა შენისანი გამომიცხადენ მე.
7. მასხურო მე უსუპითა და განვწმიდნე მე, განმბანო მე და უფროის თოვლისა განვსპეტაკნე.
8. მასმინო მე გალობაი და სიხარული, და იხარებდენ ძუალნი დამდაბლებულნი.
9. გარე-მიაქციე პირი შენი ცოდვათა ჩემთაგან და ყოველნი უშჯულოებანი ჩემნი ახოცენ.
10. გული წმიდაი დაჰბადე ჩემ თანა, ღმერთო, და სული წრფელი განმიახლე გუამსა ჩემსა.
11. ნუ განმაგდებ მე პირისა შენისაგან და სულსა წმიდასა შენსა ნუ მიმიღებ ჩემგან.
12. მომეც მე სიხარული მაცხოვარებისა შენისაი და სულითა მთავრობისათა დამამტკიცე მე.
13. ვასწავლნე უშჯულოთა გზანი შენნი და უღმრთონი შენდა მოიქცენ.
14. მიხსენ მე სისხლთაგან, ღმერთო, ღმერთო ცხორებისა ჩემისაო, იხარებდეს ენაი ჩემი სიმართლესა შენსა.
15. უფალო, ბაგენი ჩემნი აღახუნე, და პირი ჩემი უთხრობდეს ქებულებასა შენსა.
16. რამეთუ უკეთუმცა გენება, მსხუერპლი შე-მცა-მეწირა, არამედ საკუერთხი არა გთნდეს.
17. მსხუერპლი ღმრთისა არს სული შემუსრვილი, გული შემუსრვილი და დამდაბლებული ღმერთმან არა შეურაცხ-ჰყოს.
18. კეთილი უყავ, უფალო, ნებითა შენითა სიონსა და აღეშენნენ ზღუდენი იერუსალემისანი.
19. მაშინ გთნდეს მსხუერპლი სიმართლისაი, შესაწირავი და ყოვლად-დასაწუელი; მაშინ შეიწირნენ საკურთხეველსა შენსა ზედა ზუარაკნი.
გალობაი 1, უგალობდითსა
ძლისპირი: ეტლთა მფლობელი ფარაო დაანთქა საკვირველთმოქმედმან კუერთხმან მოსეისმან, რომელმან გამოსახა სახეი ჯუარისაი და განუპო ზღუაი მეწამული და ისრაელი იხსნა განმავალი, მეტყუელი გალობასა უფლისასა: რამეთუ დიდებით დიდებულ არს.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
უგალობთ გამოუთქუმელსა დედობრივსა მოწყალებასა შენსა ჩუენდა მომართ, დედოფალო, და გევედრებით: გარდამოგვივლინე მადლმოსილი შეწევნაი შენი, ჰოი, ყოვლადწმიდაო დედაო მარიამ, და იქმენ განმგებელ ცხორებისა ჩუენისა.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
ჭეშმარიტად ხარი შენ მიურულებელი მცველი და იღუმენი წილხვედრისა შენისა – ათონისა, და კეთილად განმგებელი დიდსა მას ლავრასა შინა მოსაგრეთა, რომელთაცა მიჰმადლე ეკონომისად წოდებული ხატი შენი წინდად მოწყალებისა და ცხორებისა.
დიდებაი მამასა და ძესა და წმიდასა სულსა
ვითარცა მხსნელ ექმნებოდი განსაცდელთა მიერ გარე-შეცვულთა, და ნუგეშინისცემდი შეიწრებულთა და გლახაკთა, ეგრეთვე აწ შეისმინე ვედრებაი ჩუენი, დედოფალო, და წმიდასა მას ხატსა შენსა შევრდომილნი გვიხსენ ყოველთა ძვირთა და ვნებათაგან.
აწ და მარადის და უკუნითი უკუნისამდე, ამინ.
დიდებულნი ითქუნეს შენთვის თესლითი თესლადმდე, ქალწულო, რომელმან შეიწყნარე სიტყუაი ღმრთისაი წიაღსა შენსა და დაადგერ უხრწნელად, ღმრთისმშობელო მარიამ, ამისთვის ყოველნი გადიდებთ, რომელნი შემდგომად ღმრთისა იპოვე მხსნელად ჩუენდა.
გალობა 3, განძლიერდასა
ძლისპირი: შენ, დამამყარებელო კამარათა ცისათაო, უფალო, და აღმაშენებელო ეკლესიათაო, დამამტკიცენ ჩუენ სიყუარულსა შენსა, თაო ყოვლისა სიხარულისაო, და განმაძლიერებელო მორწმუნეთაო, მხოლოო, კაცთ-მოყუარე.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
დაემკვიდრდა რაი ბერი ათანასე ათონსა, აღაგო სენაკები და ეკლესიაი სახელსა ზედა შენსა, ქალწულო მარიამ, და იწყეს რაი მოსაგრეთა მისლვად და განმრავლებად, შეიმოსა დიდი სქემაი, და შეჰმატა რაი სატრაპეზოი, კეთილად განაგებდა სამწყსოსა თვისსა.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
მიიწია რაი საშინელი სიყმილი მთასა მას, უბიწოო, გევედრებოდა ღირსი ათანასე გარე-წარქცევასა განსაცდელთასა, და განივლტოდენ რაი ყოველნი ძმანი ლავრისანი ათონითგან, იგიცა წარემართა განგებულებითა საღმრთოითა.
დიდებაი მამასა და ძესა და წმიდასა სულსა
ეჰა, სახიერებასა შენსა, დედოფალო, რამეთუ წინა შეემთხვიე ათანასეს გზასა ზედა, და უბრძანე რაი უკუქცევაი, აღუთქვი მეურვეობაი სავანისა, აწცა გამოზარდე სული ჩუენი პურითა გულისხმის-ყოფისაითა და გვასწავე გზაი კეთილად მსახურებისაი.
აწ და მარადის და უკუნითი უკუნისამდე, ამინ.
დაემკვიდრე საშოსა ქალწულისასა და გამოუჩნდი კაცთა ხორციელად, ვითარცა სათნო იყავ, და გამოაჩინე იგი ჭეშმარიტად ღმრთისმშობელად, და შემწედ ყოველთა მორწმუნეთა, მხოლოო კაცთ-მოყუარე.
მრჩობლი კვერექსი
დიაკონმან: შეგჳწყალენ ჩვენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით ღმრთივ–დაცულისა ერისა ჩუენისა და მეუფებისა მისისათჳს (მთავრობისა და მხედრობისა) მისისათჳს.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით უწმიდესისა და უნეტარესისა, სრულიად საქართველოს კათოლიკოს–პატრიარქისა და მცეთა–თბილისის მთავარეპისკოპოსისა და ბიჭვინთისა და ცხუმ–აფხაზეთის მიტროპოლიტისა, დიდისა მეუფისა, მამისა ჩუენისა ილიასათჳს, და ყოვლადუსამღვდელოესისა... (აქა მოიხსენეთ ადგილობრიბი მღვდელმთავარი), და ყოველთა ქრისტეს მიერ ძმათა ჩუენთათვის.
მგალობელთა: უფალო, შეგჳწყალენ (3-გზის).
დიაკონმან: მერმეცა ვევედრნეთ უფალსა ღმერთსა ჩუენსა, რაითა შეიწყალნეს... (აქა მოიხსენეთ სახელდებით ისინი, ვისთვისაც ევედრებით ღმერთს).
მგალობელთა: უფალო, შეგჳწყალენ (3-გზის).
დიაკონმან: განამრავლე, უფალო, ჟამნი და წელნი ცხოვრებისა მათისანი, და იხსნენ იგინი, უფალო, ყოვლისაგან ჭირისა, რისხვისა და იწროებისა, და ყოვლისაგან წყლულებისა სულისა და ხორცთასა, და მიუტევენ მათ ყოველნი შეცოდებანი მათნი, ნებსითნი და უნებლიეთნი.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით ყოველთა ძმათა და ყოველთა ქრისტიანეთათჳს.
მგალობელთა: უფალო, შეგჳწყალენ (3-გზის).
მღვდელმან: რამეთუ მოწყალე და კაცთმოყვარე ღმერთი ხარ, და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის და უკუნითი უკუნისამდე.
მგალობელთა: ამინ.
წარდგომა
მსმენელნი შენმიერისა აღთქუმისანი, ჰოი, დედათა შორის კურთხეულო, სარწმუნოებითა თაყუანის-ვჰსცემთ ეკონომისად წოდებულსა ხატსა შენსა, და გევედრებით: მოიხილე განსაცდელთა ჩუენთა ზედა, და დახსნენ ყოველნი მწუხარებანი ჩუენნი, რომელთა დაგვიძს ყოველი სასოებაი შენ ზედა.
გალობა 4, მესმასა
ძლისპირი: შენ ხარ, ქრისტე, ღმერთი ჩემი, შენ ხარ ძალი ჩემი, შენ ხარ უფალი ჩემი და სიქადული ცხორებისა ჩემისაი, რომელმან არა დააცარიელენ წიაღნი მამისანი და გამოუჩნდი სიმდაბლესა ჩემსა, ამისთვისცა წინაისწარმეტყუელისა ამბაკუმის თანა ვიტყოდით: ძალსა შენსა დიდებაი, კაცთ-მოყუარე.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
ჰგონებდა რაი ათანასე მზაკუვარებასა ბოროტისასა, არქუ მას, რაითა კუერთხი სცეს კლდესა, და აღმოადინა რაი წყაროი სიტყვითა შენითა, რწმენა, ვითარმედ ხარი შენ ყოვლადწმიდაი დედაი ღმრთისაი, და ეწადა რაი შევრდომაი შენდა, უბიწოო, უჩინო-იქმენ მეყსა შინა.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
დიდებულებამან აღთქუმისა შენისამან სიხარულითა აღავსო რაი ღირსი ათანასე, უფროის განკვირდა, იხილა რაი ბეღელი სავსეი საზრდელითა, და უკუნ-იქცენ სხუანიცა ძმანი, მცნობნი გამოცხადებისა შენისა, აწ ჩუენცა აღგვიხილე დაბნელებულნი თუალნი სულისანი, რაითა ვაქებდეთ სახიერებასა გულმოწყალებისა შენისასა.
დიდებაი მამასა და ძესა და წმიდასა სულსა
ვითარ აღუთქვი ღირსსა მას, დედოფალო, თვით მოენიჭე განმგებლად ლავრასა მისსა, და იწროებათა და ჭირთა შინა მრავალგზის უჩვენე ძალი შეწევნისა შენისაი, აწ აღხოცე მჭმუნვარებაი ჩუენი, ჰოი, მიმადლებულო ქალწულო კურთხეულო, რომელნი შენ მიერ ვსასოებთ ნუგეშინისცემასა და დიდსა წყალობასა.
აწ და მარადის, და უკუნითი უკუნისამდე, ამინ.
განაქარვე ყუედრებაი დედისა ევაისი, რაჟამს ღმერთი, დამბადებელი შენი მუცლად იღე უზეშთაეს კაცთა ბუნებისაი, და გვიშევ ჩუენ გამოუთქმელად, უბიწოო დედაო ქრისტეის მაცხოვრისაო, მეოხ-გუეყავ მვედრებელთა შენთა.
გალობა 5, ღამითგანსა
ძლისპირი: რაისათვის განმიშორენ პირისაგან შენისა, ნათელო წარუვალო, და დამფარა მე ბნელმან წყუდიადისამან განუნათლებელმან, არამედ მომხედენ და ნათელსა მცნებათა შენთასა წარჰმართე სლვაი ჩემი, გევედრები.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
სასწაულთა შენთა მქადაგებელ იქმნა ღირსი იგი, და გამოსახა რაი წმიდაი ხატი შენი, ვითარცა ნიში უხილავად მუნ მყოფობისა შენისაი, ყოველნი შეუვრდებოდენ და გევედრებოდენ შეწევნასა, ვითარცა ყოვლად ტკბილსა და მოწყალესა ქრისტეს დედასა.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
სათნო იჩინე რაი მმართებლობაი დიდისა ლავრისაი, ჰოი, დედოფალო, თავს-იდევ ყოველი ზრუნვაი მისთვის, ვითარცა მეურვემან, და ზეთი, იფქლი და სანოვაგეი მრავალგზის განუმრავლენ მკვიდრთა მისთა, აწ ჩუენცა შეგვეწიე, უბიწოო, და უხუად განგვიმრავლე ნაყოფი ცხორებისაი.
დიდებაი მამასა და ძესა და წმიდასა სულსა
იხარებენ მამანი დიდისა ლავრისანი და ადიდებენ რაი უზომოთა მათ მოწყალებათა შენთაა, აწ ჩუენცა კეთილქებისა გალობითა შეგასხმამთ, ვითარცა ეკონომისას დიდისა ლავრისასა და ბრძენსა იღუმენსა წმიდისა მის ათონისა მთისასა.
აწ და მარადის და უკუნითი უკუნისამდე, ამინ.
კადნიერებაი დედობრივი ძისა შენისა თანა მოიგე, ქალწულო, ყოვლად უბიწოო, და შეწევნასა ჩუენსა ნუ დააცადებ მისა მიმართ, რაითა გვიხსნნეს ჩუენ ყოველთა ჭირთაგან და ვნებათაგან ზედა-დასხმულთა, და განსაცდელთაგან გარე მოდგომილთა.
გალობა 6, ღაღადყავსა
ძლისპირი: ვედრებასა ჩემსა განვჰფენ უფლისა მიმართ და მას აღუარებ ბრალთა ჩემთა მარადის, რამეთუ ბოროტითა აღივსო სული ჩემი და სიმტკიცეი ჩემი ჯოჯოხეთად მიიწია, და იონაისებრ ვღაღადებ: აღმომიყვანე მე, ღმერთო ჩემო.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
განითქუა რაი სამკურნალოი ეგე ძლიერებაი ცხოველისა მის წყაროისა, ჟამსა შეჭირვებისა მრავალი კაცი მიისწრაფდა ხუმევად მისა, და გევედრებოდენ რაი ლხინებასა, ყოვლადწმიდაო, შენცა არა ვის დაუტევებდი შეუწევნელად.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
აღმოსჩქეფდა რაი წყალი იგი მდინარედ მადლისა, აღაშენეს მცირეი ტაძარი სახელსა ზედა ცხოველსმყოფელისა წყაროისა, და ხატი შენი, აღმსახველი საკვირველისა მის გამოცხადებისა შენისაი, მუნვე დააბრძანეს, შესავედრებელად მწუხარეთა და სნეულთა.
დიდებაი მამასა და ძესა და წმიდასა სულსა
სადა იგი ღირს-იქმნა ნეტარი ათანასე საკვირველისა მის ხილვისა შენისა, ყოველნი მომლოცველნი დიდისა ლავრისანი მიევლტიან სასოებითა, რაითა სიყუარულითა შეუვრდენ ხატსა მას შენსა, ცხორებისა და ხსნისა მომცემელსა, და ჰმადლობდენ ღმერთსა.
აწ და მარადის და უკუნითი უკუნისამდე, ამინ.
ნუ დასცხრები ვედრებასა ჩუენთვის, ქალწულო, ყოვლადწმიდაო ღმრთისმშობელო მარიამ, რამეთუ სიმტკიცე ხარ ჩუენ მორწმუნეთაი და სასოებითა შენითა განვძლიერდებით და სარწმუნოებითა გადიდებთ და თაყუანის-გცემთ შენ და ძესა შენსა.
კონდაკი
ზესთამბრძოლისა ჩემისათვის, და მოღუაწისა უძლეველისა, ვითარცა შენ მიერ ხსნილნი განსაცდელთაგან, სამადლობელსა შევსწირავთ, ღმრთისმშობელო ქალწულო, შენდა მომართ მონანი შენნი, არამედ ვითარცა გაქუს ძლიერებაი უბრძოლველი, ყოველთაგან ვნებათა განმათავისუფლენ ჩუენ, რაითა გიგალობდეთ შენ, კურთხეულო: გიხაროდენ, სძალო უსძლოო!
იკოსი
სასოებითა შევრდომილნი წმიდასა ხატსა შენსა, ეკონომისად წოდებულსა, სიხარულითა ვჭურეტთ ღირსთა ათანასე ათონელსა და მიქაელ სინაიდელსა, წმიდასა იოანე ნათლისმცემელსა და სიმეონ ღმრთისმიმრქმელსა, რომელნი ორთა მთავარანგელოზთა თანა კრძალვითა თაყუანის-გცემენ საყდარსა ზედა ღმრთეებრივითა ყრმითა მჯდომარესა, და მუნვე ვხედავთ რაი პირველმოწამესა მას სტეფანესა, და დიდმოწამეთა გიორგისა და დემეტრესა, კეთილმსახურთა იმპერატორთა – ფოკასა და იოანე ციმისხისა თანა, ჩუენცა მათითა მობაძვითა გადიდებთ შენ, უზესთაესსა განმგებელსა ათონისასა და გევედრებით: გუექმენ ხელისამპყრობელად და ყოველთა იწროებათაგან გამომხსნელად: რომელნი გიგალობთ შენ, კურთხეულო: გიხაროდენ, სძალო უსძლოო!
დიაკონმან: სიბრძნით. მოხედენ.
მღდელმან: მშვიდობა ყოველთა.
მგალობელთა: და სულისაცა შენისა თანა.
დიაკონმან: წარდგომა ფსალმუნისაგან დავითისა: მოვიხსენო სახელი შენი ყოველსა შორის თესლსა და თესლსა..
მგალობელთა: მოვიხსენო სახელი შენი ყოველსა შორის თესლსა და თესლსა.
დიაკონმან: ისმინე, ასულო, და იხილე და მოყავ ყური შენი.
მგალობელთა: მოვიხსენო სახელი შენი ყოველსა შორის თესლსა და თესლსა.
დიაკონმან: მოვიხსენო სახელი შენი.
მგალობელთა: ყოველსა შორის თესლსა და თესლსა.
დიაკონმან: უფლისა მიმართ ვილოცოთ.
მგალობელთა: უფალო, შეგჳწყალენ.
მღდელმან: რამეთუ წმიდა ხარ შენ, ღმერთო ჩუენო, და რომელი წმიდათა შორის განისუენებ, და შენდა დიდებასა აღვავლენთ, მამისა, და ძისა და წმიდისა სულისა, აწ და მარადის, და უკუნითი უკუნისამდე,
მგალობელთა: ამინ.
დიაკონმან: ყოველი სული აქებდით უფალსა.
მგალობელთა: ყოველი სული აქებდით უფალსა.
დიაკონმან: აქებდით ღმერთსა წმიდათა შორის მისთა, აქებდით მას სამყაროთა ძალისა მისისათა.
მგალობელთა: ყოველი სული აქებდით უფალსა.
დიაკონმან: ყოველი სული.
მგალობელთა: აქებდით უფალსა.
დიაკონმან: ღირსყოფად ჩუენდა სმენად წმიდისა სახარებისა უფალსა ღმერთსა ჩუენსა ვევედრნეთ.
მგალობელთა: უფალო, შეგჳწყალენ (3-გზის).
დიაკონმან: სიბრძნით აღემართენით და ისმინეთ წმიდა სახარება.
მღვდელმან: მშჳდობაჲ ყოველთა.
მგალობელთა: და სულისაცა შენისა თანა.
დიაკონმან: ლუკასაგან წმიდისა სახარებისა საკითხავი.
მგალობელთა: დიდებაჲ შენდა, უფალო, დიდებაჲ შენდა.
დიაკონმან: მოხედენ.
სახარება ლუკასი
მათ დღეთა შინა აღდგა მარიამ და წარვიდა მთად კერძო მსწრაფლ ქალაქად იუდაისა. და შევიდა სახლსა ზაქარიაისსა და მოიკითხა ელისაბედ. და იყო ვითარცა ესმა ელისაბედს მოკითხვაი მარიამისი, ჰკრთებოდა ყრმაი იგი მუცელსა მისსა და აღივსო სულითა წმიდითა ელისაბედ და ხმა-ყო ხმითა დიდითა და თქუა: კურთხეულ ხარ შენ დედათა შორის და კურთხეულ არს ნაყოფი მუცლისა შენისაი. და ვინაი ჩემდა ესე, რაითა მოვიდეს დედაი უფლისა ჩემისაი ჩემდა. რამეთუ აჰა ესერა ვითარცა იყო ხმაი მოკითხვისა შენისაი ყურთა მომართ ჩემთა, ჰკრთებოდა ყრმაი ესე სიხარულით მუცელსა ჩემსა. და ნეტარ არს, რომელსა ჰრწმენეს, რამეთუ იყოს აღსრულებაი თქმულთა მათ მისა მიმართ უფლისა მიერ. და თქუა მარიამ: ადიდებს სული ჩემი უფალსა, და განიხარა სულმან ჩემმან ღმრთისა მიმართ, მაცხოვრისა ჩემისა, რამეთუ მოხედნა სიმდაბლესა ზედა მხევლისა თვისისასა, რამეთუ აჰა ესერა ამიერითგან მნატრიდენ მე ყოველნი ნათესავნი, რამეთუ ყო ჩემ თანა დიდებული ძლიერმან, და წმიდა არს სახელი მისი. და დაადგრა მარიამ ელისაბედის თანა სამ თუე, და წარვიდა სახით თვისა.
მგალობელთა: დიდებაჲ შენდა, უფალო, დიდებაჲ შენდა.
მკითხველმან: დიდება მამასა და ძესა და წმიდასა სულსა.
მოწყალებითა შენითა, მრავალმოწყალეო ღმერთო, აღხოცე ცოდვათა ჩუენთა სიმრავლენი.
აწ და მარადის და უკუნითი უკუნისამდე, ამინ.
მეოხებითა წმიდისა ღმრთისმშობელისათა, მოწყალეო, აღხოცენ ცოდვათა ჩემთა სიმრავლენი.
მიწყალე მე, ღმერთო, დიდითა წყალობითა შენითა, და მრავლითა მოწყალებითა შენითა აღხოცენ უსჯულოებაჲ ჩემი და შემიწყალე მე, ღმერთო.
გერი: იხარებდ, ქუეყანაო ქართველთაო, და დღესასწაულობდ საზეპურო ერო, რამეთუ წყალობითა მოგხედნათ ღმრთისა დედამან და მოგანიჭათ საკჳრველთმოქმედი ხატი თჳსი, შემწედ ჭირთა შინა, ნუგეშად მწუხარებათა, მკურნალად სნეულებათა და გამომჴსნელად ვნებათაგან.
ლოცვა მღვდლისა მიერ სათქუმელი
მღდელმან: აცხოვნე, ღმერთო, ერი შენი, და აკურთხე სამკვიდრებელი შენი, მოხედენ სოფელსა შენსა წყალობითა და მოწყალებითა, აღამაღლე რქაი ქრისტეანეთა მართლმადიდებელთაი, და გარდამოავლინენ ჩუენ ზედა მდიდარნი წყალობანი შენნი, მეოხებითა ყოვლადწმიდისა დედოფლისა ჩუენისა ღმრთისმშობელისა, და მარადის ქალწულისა მარიამისაითა; ძლიერებითა პატიოსნისა და ცხოველსმყოფელისა ჯუარისაითა; მეოხებითა პატიოსანთა უხორცოთა ზეცისა ძალთაითა; პატიოსნისა, დიდებულისა, წინაისწარმეტყუელისა, წინამორბედისა და ნათლისმცემელისა იოვანეისითა, წმიდისა დიდისა წინაისწარმეტყუელისა ელია თეზბიტელისა და მართლისა ენუქისითა; წმიდათა დიდებულთა, და ყოვლად–ქებულთა მოციქულთა თავთა, პეტრეისა და პავლეისითა; წმიდისა მოციქულისა თომასი და საქართველოს განმანათლებელთა მოციქულთა: ანდრია პირველწოდებულისა, სვიმონ კანანელისა, ბართლომესი, თადეოზისა და მატათაისითა; ღირსისა დედისა ჩუენისა, მოციქულთა სწორისა ქალწულისა ნინო ქართველთ განმანათლებელისა და წმიდათა მოციქულთა სწორთა: მეფისა მირიანისა და დედოფლისა ნანაისითა; წმიდათა შორის მამათა ჩუენთა, და მსოფლიოთა დიდთა მოძღუართა და მღდელმთავართა: ბასილი დიდისა, გრიგოლი ღმრთისმეტყუელისა, და იოვანე ოქროპირისაითა; წმიდათა შორის მამისა ჩუენისა ნიკოლოზ მირონ–ლუკიის მთავარეპისკოპოსისა და საკვირველთმოქმედისაითა; წმიდისა დიდებულისა და ღუაწლისა–მძლისა მოწამისა, ძლევა–შემოსილისა გიორგისა და წმიდათა დიდთა ქალწულ–მოწამეთა ბარბარეისა და მარინეისითა; წმიდათა მამამთავართა ჩუენთა: პეტრე, სამუელ, სარმიან, მამაი, არსენ, მელქისედეკ, იოანე–ოქროპირ, ნიკოლოზ, ევდიმოზ, იოსებ, კირიონ, და ამბროსისაითა; ღირსისა მამისა ჩუენისა იოვანე ზედაზნელისა და ათორმეტთა მისთა მოწაფეთა, მეორედ განმანათლებელთა საქართველოს ეკლესიისა და მარადის მფარველთა მისთა და წმიდისა მღდელმოწამისა ნეოფიტე ურბნელისაითა; ღმრთივ–განბრძნობილთა ნეტართა მამათა ჩუენთა: ილარიონ ქართველისა, სერაპიონ ზარზმელისა, გრიგოლ ხანძთელისა და საბა იშხნელისაითა; ღირსთა მამათა ჩუენთა ათონელთა: იოვანე და გაბრიელ ქართველთა, იოვანე თორნიკ–ყოფილისა და ეფთვიმე და გიორგი მთაწმინდელთაითა; წმიდათა დიდებულთა და ღუაწლისა–მძლეთა მოწამეთა ჩუენთა: რაჟდენისა, ევსტათი მცხეთელისა, ჰაბო ტფილელისა, მიქაელ–გობრონისა, თევდორე მღდლისა, ქრისტეფორე გურულისა, ნიკოლოზ დვალისა, კოზმანისა, არგვეთისა მთავართა დავით და კონსტანტინეისა და კონსტანტინე მთავრისაითა; წმიდისა მთავარ–მოწამისა ბიძინასა და წმიდათა დიდებულთა მოწამეთა: შალვა და ელიზბარ ქსნის ერისთავთაითა; წმიდისა მოწამისა შალვა ახალციხელისა და წმიდათა ათთა–ბევრთა მოწამეთა, ტფილისს ხუარაზმელთაგან მოწყუედილთაითა; წმიდათა მოწამეთა ექვსი ათასთა გარეჯელთა ბერთა და მრავალთა წმინდათა მამათა და დედათა, აჭარაში თურქთაგან წამებულთაითა; წმიდათა ღუაწლისამძლეთა მეფეთა და დედოფალთა: მირდატ, აშოტ, არჩილ, დემეტრე, ლუარსაბ, შუშანიკ და ქეთევანისაითა და წმიდათა კეთილ–მორწმუნეთა და დიდთა მეფეთა ჩუენთა: ვახტანგ გორგასალისა, დავით აღმაშენებელისა, დემეტრე–დამიანეისა, თამარისა და სოლომონისაითა; წმიდისა ილია მართლისა, ექვთიმე ღმრთისკაცისა და ექვთიმე აღმსაარებლისაითა; წმიდათა აღმსარებელთა მამათა ჩუენთა, იოვანეისი და გიორგი–იოანე ბეთანიელთა და ღირსისა მამისა ჩუენისა არქიმანდრიტისა გაბრიელისა, აღმსაარებელისა და სალოსისაითა; წმიდათა და მართალთა მშობელთა ღმრთისაითა იოაკიმ და ანნაისითა (და წმიდისა სახელი, რომლისა არს ტაძარი და დღის წმიდანი მოიხსენიოს), და წმიდისა დიდისა მღდელმთავრისა, შანხაისა და სან–ფრანცისკოს მთავარეპისკოპოსისა იოანესი, განმანათლებლისა და საკვირველმოქმედისაითა, და ყოველთა წმიდათა შენთაითა გევედრებით შენ, მრავალ–მოწყალეო ღმერთო, შეისმინე ჩუენ ცოდვილთა ვედრებაი, და შეგვიწყალენ ჩუენ.
მგალობელთა: უფალო, შეგჳწყალენ (12-გზის).
მღდელმან: წყალობითა და მოწყალებითა და კაცთმოყუარებითა მხოლოდშობილისა ძისა შენისაჲთა, რომლისა თანა კურთხეულ ხარ, თანა ყოვლადწმიდით, სახიერით, და ცხოველსმყოფელით სულით შენითურთ, აწ და მარადის და უკუნითი უკუნისამდე.
მგალობელთა: ამინ.
გალობა 7, კურთხეულარსა
ძლისპირი: ყრმანი ებრაელნი სახუმილსა შინა ვიდოდეს, ცეცხლსა ზედა კადნიერებით შეცურეულნი ღაღადებდეს და იტყოდეს: კურთხეულ ხარ შენ, უფალო ღმერთო, უკუნისამდე.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
საღმრთოი მადლი ხატისა შენისაი მოუკლებელად იქმოდა რაი შეწევნათა და სასწაულთა, განამრავლეს პირნი მისნი, და აწცა მათ მიერ შეეწევი ჭირთა და განსაცდელთა მიერ გარე-შეცვულთა.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
ვითარ მოწესენი დიდი ლავრისანი განშუენდებიან მადლითა ხატისა შენისაითა, ეგრეთცა მდინარესა საკვირველებათასა აღმოაცენებ წმიდათა პირთა მიერ მისთა და გარდამოავლინებ ცუართა მადლისა შენისათა.
დიდებაი მამასა და ძესა და წმიდასა სულსა
სურვილითა თაყუანის-ვჰსცემთ ხატსა შენსა, ჰოი, სასოო ჩუენო ღმრთისმშობელო, და გევედრებით, რაითა გვექმნე მომზღუდველ სენთაგან და ნუგეშინისმცემელ ჟამსა მას იწროებისასა.
აწ და მარადის და უკუნითი უკუნისამდე, ამინ.
ნათელსა უფლისასა ვიდოდით, მოვედით უგალობდეთ ქალაქსა სულიერსა სამეუფოსა, უბიწოსა ქალწულსა, ჭეშმარიტად ღმრთისმშობელსა, ვითარცა არს სასოი და მეოხი სულთა ჩუენთა, უკუნითი უკუნისამდე.
გალობა 8, აკურთხევდითსა
ძლისპირი: მთასა ზედა მოსეს თანა-მზრახვალმან მაყულოვანი სახედ გამოაჩინა, ქალწულისაგან შობილსა უვნებელად ყოველნი ვაკურთხევთ და აღვამაღლებთ მას უკუნისამდე.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
ყოვლად პატიოსანი ხატი შენი ბრწყინავს რაი სასწაულთა მიერ, მშვიდობით განგვარინებს სოფლისა ღელვათაგან, და უშურველად აღმოგვიცენებს მადლთა შენთა და წყალობათა.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
ვითარცა ხარი შენ წყაროი კეთილთა დაუსრულებელთა, ეგრეთცა ხატსა შენსა აქუს ძალი და მადლი შეწევნისაი და მის მიერ ახარებ მწუხარეთა და ნუგეშინისცემ უპოვართა და გლახაკთა.
დიდებაი მამასა და ძესა და წმიდასა სულსა
საკვირველთმოქმედსა ხატსა შენსა შევრდომილნი, დედოფალო, შენდა შევსწირავთ ვედრებასა, რაითა განწმიდო გონებაი ჩუენი ზრახუათაგან ამაოთა და განგვამტკიცო მართლ-სარწმუნოებასა შინა.
აწ და მარადის და უკუნითი უკუნისამდე, ამინ.
რომელმან ანგელოზისაგან სიტყუაი შეიწყნარა, და ღმერთი მხოლოი გვიშვა, და ნათელი გამოუბრწყინვა სოფელსა, ყოველნი ვაკურთხევთ და აღვამაღლებთ მას უკუნისამდე.
გალობა 9, ადიდებდითსა
ძლისპირი: განკვირდეს ზესკნელს ცანი, და კიდენი ქუეყანისანი განკვირვებულ იქმნნეს, რაჟამს ღმერთი შენ მიერ კაცთა გამოუბრწყინდა და წიაღი შენი უმაღლეს ცათა საყდართა გამოაჩინა. ამისთვის, ღმრთისმშობელო, ანგელოზნი და კაცნი, ვითარცა ღირს ხარ, გადიდებენ შენ.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
ღმრთივშუენიერი ხატი ეგე შენი, დედოფალო, ზღუდედ დაურღვეველად აქუთ მოქენეთა მათ შეწევნისა შენისათა, რამეთუ ყოველთა ვედრებისა მათისაებრ მიჰმადლებ კეთილთა სათხოვართა, აწცა მოიხილე განსაცდელსა ჩუენსა ზედა, ჰოი, სძალო ღმრთისაო მარიამ, და გვიხსენ ყოველთაგან ჭირთა და სავნებელთა.
ყოვლადწმიდაო ღმრთისმშობელო, დაგვიცვენ და დაგვიფარენ ჩუენ.
ნათლისა მომფენელ ლამპრად გჭურეტთ შენ, ჰოი, დედაო უბიწოო და უქორწინებელო, რამეთუ დაუშრეტელთა სხივთა მიერ მადლისა შენისათა განსდევნი წყუდიადსა მას უსჯულოებისა და უმეცრებისასა, და სათნოებათა ნათლისა მიმართ განგვსწავლი ყოველთა შევრდომილთა წმიდისა ხატისა მიმართ შენისათა.
დიდებაი მამასა და ძესა და წმიდასა სულსა
ვუწყით რაი ღმრთივ-ბრწყინვალენი ნიშ-სასწაულნი, აღსრულებულნი ხატისა მიერ შენისა, ვიხარებთ და გევედრებით: ჰოი, ყოვლად წმიდაო სანატრელო დედოფალო, ისწრაფე აწ ხსნად ჩუენდა ცოდვათა და სულთა ვნებისაგან, და განგვათავისუფლე საუკუნეთაგან სატანჯველთა.
აწ და მარადის და უკუნითი უკუნისამდე, ამინ.
წინაითვე გქადაგებდეს, უბიწოო, წინაისწარმეტყუელნი გამოგსახვიდეს კიდობნად, კუერთხად, ტაკუკად და ბჭედ დახშულად, და მთად გამოუკუეთელად, და კიბედ ზეცისად აღმართებულად, და წყაროდ დაბეჭდულად, სულმცირედ ღრუბელად და მშობელად ევმანუელისა.
მგალობელთა: ღირს-არს ჭეშმარიტად, რათა გადიდებდეთ, შენ ღვთისმშობელო, რომელი მარადის სანატრელ იქმენ, ყოვლად-უბიწოდ და დედად ღვთისა ჩვენისა. უპატიოსნესსა ქერუბინთასა, და აღმატებით უზესთაესსა სერაბინთასა, განუხრწნელად მშობელსა სიტყვისა ღვთისასა, მხოლოსა ღვთისმშობელსა გალობით გადიდებდეთ. ("ღირს - არს" - ის ნაცვლად საკითხავი საგალობლები)
მღვდელმან აკმიოს.
მკითხველმან: ვითარცა ხარი შენ მეოხი უბრძოლველი და მწეი ჭირვეულთაი, ეგრეთცა წმიდასა ხატსა ამას, ეკონომისად წოდებულსა, აქუს ძალი და მადლი შეწევნისაი ძისა მიერ შენისა, ღმრთისმშობელო მარიამ, და შეუვრდებით რაი საფარველსა მისსა, შევსწირავთ შენდა ვედრებასა, რაითა შეეწიო სულიერთა და ხორციელთა უძლურებათა ჩუენთა, და ცხორებაი ჩუენი წარმართო კეთილად.
დაღათუ წმიდაი ხატი ეგე შენი მიჰმადლე ლავრასა მას წინდად მოწყალებისა და გამოხსნისა, აწ ჩუენცა სასოებაი გვაქუს შენდამი მსგავსად მკვიდრთა მისთა, და გევედრებით, რაითა ცხორებისა ღელვათაგან დამაშურალთა და ვნებათა და განსაცდელთა შინა დანთქმულთა უშურველად აღგვიპყრა ხელი წყალობისა შენისაი და დაგვიფარო დაგლახაკებისაგან და წარწყმედისა.
ვითარცა ხარ შენ მცველი და შუამდგომელი ყოველთა მოსავთა შენთა, აწ ჩუენცა ხელთა შენთა შევვედრებთ ყოველსა ცხორებასა ჩუენსა, ყოვლადწმიდაო ღმრთისმშობელო მარიამ, რაითა განაგო იგი ნებისაებრ შენისა, და გვიხსნნე ჩუენ საცთურისაგან მტერისა ბოროტისა.
მტკიცესა მას ზედამხედველობასა შენსა და მფარველობასა შევრდომილნი გქადაგებთ შენ, ვითარცა ტკბილსა განსასუენებელსა დამაშვრალთა და ტვირთმძიმეთასა, და გევედრებით, მოწყალეო დედოფალო, წარგვიმართე გზასა კეთილსა და უცთომელსა, რაითა მარადის ვადიდებდეთ ღმერთსა, ყოვლისა შემოქმედსა:
წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.
უფალო შეგვიწყალენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.
მღვდელმან: რამეთუ შენი არს სუფევა, ძალი და დაიდება, მამისა და ძისა და წმიდისა სულისა, აწ და მარადის და უკუნითი უკუნისამდე.
მგალობელთა: ამინ.
მკითხველმან: მიწყალენ ჩუენ, უფალო, შემიწყალენ ჩვენ, რამეთუ ყოველსავე სიტყვის-მიცემისაგან უღონო ვართ, გარნა ამას ვედრებასა შენ, მეუფისა სახიერისა, ცოდვილნი ესე შევსწირავთ. მიწყალენ ჩუენ, უფალო, შეგვიწყალენ ჩუენ.
დიდება მამასა და ძესა და წმიდასა სულსა.
უფალო, შემიწყალენ ჩუენ, რამეთუ შენ გესავთ, ნუ განმირისხდები ჩუენ ფრიად, და ნუცა მოიხსენებ უსჯულოებათა ჩუენთა, არამედ მოიხილე ჩუენზედა წყალობით, ვითარცა სახიერ ხარ, და გვიხსენ ჩუენ სამართლად რისხვისაგან შენისა, რამეთუ შენ ხარ ღმერთი ჩუენი, და ჩუენ ვართ ერნი შენნი, ყოველნივე ქმნულნი ხელითა შენთანი ვართ და სახელი შენი წოდებულ არს ჩუენზედა, და შემიწყალენ ჩუენ.
აწ და მარადის, და უკუნითი უკუნისამდე, ამინ.
მოწყალების კარი განგვიღე, კურთხეულო ღმრთისმშობელო, რათა, რომელნი ესე შენ გესავთ, არა დავეცნეთ, არამედ განვერნეთ წინააღმდგომთა მტერთაგან, რამეთუ შენ ხარ ცხოვრება ნათესავისა ქრისტიანეთასა.
მცირე მრჩობლი კვერექსი
დიაკონმან: შეგჳწყალენ ჩუენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით, მოწყალებისა, სიცოცხლისა, მშჳდობისა, სიმრთელისა, დღეგრძელობისა, მყუდროებისა, განათლებისა, ცხორებისა, შეწევნისა, შენდობისა და ცოდვათა მოტევებისათჳს ყოველთა შვილთა ჩუენისა ეკლესიისა, რაჲთა დაიცვას უფალმან ღმერთმან ჩუენმან სამეუფოჲ ქალაქი ესე ჩუენი და წმიდაჲ ესე მონასტერი (ანუ ეკლესია) და ყოველი სოფელი სიყმილისაგან, სრჳსა, ძრჳსა, მახჳლისა, ზედა მოსლჳსაგან უცხო თესლთასა და ყოვლისაგან ბოროტისა; რაჲთა მოწყალე გუექმნეს ჩუენ ღმერთი კეთილად დგომისათჳს სახიერებითა და კაცთმოყუარებითა თჳსითა, და გარე წარაქციოს რისხვაჲ, მარადის ჩუენ ზედა მომავალი, და გჳჴსნეს ჩუენ სამართლად ჩუენ ზედა მოწევნულისა რისხვისაგან, და შეგჳწყალნეს ჩუენ.
მგალობელთა: უფალო, შეგჳწყალენ (12-გზის).
მღდელმან: შეისმინე ჩუენი, ღმერთო, მაცხოვარო ჩუენო, სასოო ყოველთა კიდეთა ქუეყანისათაო, და რომელნი არიან ზღუათა შინა შორს და ცასა შინა, და მლხინებელ, და მოწყალე ექმენ შეცოდებათა ჩუენთა, და შეგჳწყალენ ჩუენ, რამეთუ მოწყალე და კაცთმოყუარე ღმერთი ხარ და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის, და უკუნითი უკუნისამდე.
მგალობელთა: ამინ.
დიაკონმან: მუხლმოდრეკით უფლისა მიმართ ვილოცოთ.
მგალობელთა: უფალო, შეგჳწყალენ.
სავედრებელი ლოცვა
მგალობელთა: ამინ.
დიაკონმან: ყოვლადწმიდაო ღმრთისმშობელო, გუაცხოვნენ ჩუენ.
მგალობელთა: უპატიოსნესსა ქერუბიმთასა და აღმატებით უზესთაესსა სერაბინთასა, განუხრწნელად მშობელსა სიტყჳსა ღმრთისასა, მხოლოსა ღმრთისმშობელსა გალობით გადიდებდეთ.
მღდელმან: დიდებაჲ შენდა, ღმერთო ჩუენო, დიდებაჲ შენდა.
მგალობელთა: დიდებაჲ მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
უფალო, შეგჳწყალენ (3-გზის).
სახელითა უფლისათა, უწმიდესო და უნეტარესო მეუფეო გუაკურთხენ.
მღვდელმან: უფალო იესუ ქრისტე, ძეო ღმრთისაო, ლოცვითა ყოვლად წმიდისა დედისა შენისათა, ღირსთა და ღმერთშემოსილთა მამათა ჩვენთათა და ყოველთა წმიდათა შენთათა, შეგვიწყალენ ჩვენ, ამინ.
მგალობელთა: ამინ. უფალო, შეგჳწყალენ (3-გზის).
ყოვლისა ცხოვრებისა ჩუენისა შესავედრებელ ხარ, ჰოი, დედაო ღმრთისა მაღლისაო, და სურვილითა თაყუანის-ვჰსცემთ რაი ხატსა ამას სიწმიდისა შენისასა, ვედრებითა ვითხოვთ შენგან, ყოვლად უბიწოო, რაითა ხორცთა ჩუენთა ბოროტნი წყლულებანი განჰკურნო და მძაფრნი სნეულებანი სულისა ჩუენისაი.
დედოფალო, მოხედენ ვედრებასა ჩუენსა, და უვნებელად დაგვიფარე ყოვლისაგან იწროებისა, ურვისა და სიყმილისა.
შემდგენელი: თინათინ მჭედლიშვილი