სავედრებელი პარაკლისი
ღირსისა მამისა ჩუენისა თეოდოსი დიდისა

 

 მღვდელმან: კურთხეულ არს ღმერთი ჩუენი, ყოვლადვე, აწ და მარადის და უკუნითი უკუნისამდე.

 

 მკითხველმან: ამინ. დიდება შენდა, ღმერთო ჩვენო, დიდება შენდა.

 

 მეუფეო ზეცათაო, ნუგეშინისმცემელო, სულო ჭეშმარიტებისაო, რომელი ყოველგან ხარ და ყოველსავე აღავსებ მადლითა შენითა, საუნჯეო კეთილთაო, მომნიჭებელო ცხოვრებისაო, მოვედ და დაემკვიდრე ჩვენს შორის და წმიდა მყვენ ჩვენ ყოვლისაგან ბიწისა და აცხოვნენ, სახიერო, სულნი ჩვენნი.

 

 წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).

 

 დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 

 ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.

 

 უფალო შეგვიწყალენ (3-გზის).

 

 დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 

 მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.

 

 მღვდელმან: რამეთუ შენი არს სუფევაჲ, ძალი და დიდებაჲ აწ და მარადის და უკუნითი უკუნისამდე.

 

 მგალობელთა: ამინ.

 

 უფალო შეგვიწყალენ (12–ჯერ).

 

 

უფალო, შეისმინე ლოცვისა ჩემისაი, ყურად-იღე ვედრებაი ჩემი ჭეშმარიტებითა შენითა, შეისმინე ჩემი სიმართლითა შენითა; და ნუ შეხუალ საშჯელსა მონისა შენისა თანა, რამეთუ არა განმართლდეს შენ წინაშე ყოველი ცხოველი, რამეთუ დევნა მტერმან სული ჩემი და დაამდაბლა ქუეყანად ცხორებაი ჩემი, დამსუა მე ბნელსა შინა, ვითარცა მკუდარი საუკუნოი. და მოეწყინა ჩემთანა სულსა ჩემსა, და ჩემ შორის შემიძრწუნდა გული ჩემი. მოვიხსენე დღეთა პირველთაი, და ვიწურთიდ ყოველთა მიმართ საქმეთა შენთა და ქმნულსა ხელთა შენთასა ვზრახევდ. განვიპყრენ შენდამი ხელნი ჩემნი, და სული ჩემი, ვითარცა ქუეყანაი ურწყული შენდამი. მსთუად შეისმინე ჩემი, უფალო, რამეთუ მოაკლდა სულსა ჩემსა; ნუ გარე-მიიქცევ პირსა შენსა ჩემგან, და ვემსგავსო მათ, რომელნი შთავლენან მღვიმესა. მასმინე მე განთიად წყალობაი შენი, რამეთუ მე შენ გესავ; მაუწყე მე, უფალო, გზაი, რომელსაცა ვიდოდი, რამეთუ შენდამი აღვიღე სული ჩემი. მიხსენ მე მტერთა ჩემთაგან, უფალო, რამეთუ შენ შეგევედრე. მასწავე მე, რაითა ვყო ნებაი შენი, რამეთუ შენ ხარ ღმერთი ჩემი; სული შენი სახიერი მიძღოდეს მე ქუეყანასა წრფელსა. სახელისა შენისათვის, უფალო, მაცხოვნო მე და სიმართლითა შენითა გამოიყვანო ჭირისაგან სული ჩემი. და წყალობითა შენითა მოსრნე მტერნი ჩემნი და წარსწყმიდნე ყოველნი მაჭირვებელნი სულისა ჩემისანი, რამეთუ მე მონაი შენი ვარ.

 

 

 

 

 

 

 

ტროპარი

 

  ცრემლთა მდინარითა უდაბნოი უქმი მოიმუშაკე და სიღრმით სულისათ სულთქუმითა ასეულნი შრომანი ნაყოფიერ-ჰყვენ და იქმენ მნათობ და განმანათლებელ სოფლისა საკვირველებათა მიერ, მამაო წმიდაო თეოდოსი, ევედრე ქრისტესა ღმერთსა შეწყალებად სულთა ჩუენთათვის.

 

 დიდება მამასა და ძესა და წმიდასა სულსა.

 

  გიხაროდენ, გამორჩეულო და მადლისა საღმრთოისა სამკვიდრებელო ბრძენო თეოდოსი, წესისა უბიწოისა და შჯულისა მოძღუარო, და სულთა წინამძღუარო; ყოვლად ბრწყინვალეო მნათობო უდაბნოისაო, საუნჯეო მარგალიტისა დამმარხველო და აგარაკო მტვირთველო საფასისაო, რომელმან უპოვარებითა განამდიდრე სოფელი და დაიმკვიდრე სასუფეველი ზეცისაი, ღმერთსა ევედრე აწ მონიჭებად სულთა ჩუენთა დიდი წყალობაი.

 

 აწ და მარადის და უკუნითი უკუნისამდე, ამინ.

 

 არასადა დავსდუმნეთ, ღმრთისმშობელო, ძლიერებათა შენთა ქებად, უღირსნი ესე მონანი შენნი. რამეთუ არათუმცა შენ გვფარევდი ოხითა შენითა, ვინმცა სადა გვიხსნნა ჩუენ ესოდენთა ჭირთაგან; ანუ ვინმცა დაგვიცვნა ჩუენ აქამომდე ფლობილად? არასადა განგეშორნეთ ჩუენ, დედოფალო კურთხეულო, რამეთუ შენ იხსნი სულთა ჩუენთა ყოველთა განსაცდელთაგან.

 

 

ფსალმუნი 50

 

1. მიწყალე მე, ღმერთო, დიდითა წყალობითა შენითა და მრავლითა მოწყალებითა შენითა ახოცე უშჯულოებაი ჩემი. 

 

2. უფროის განმბანე მე უშჯულოებისა ჩემისაგან და ცოდვათა ჩემთაგან განმწმიდე მე. 

 

3. რამეთუ უშჯულოებაი ჩემი მე უწყი, და ცოდვაი ჩემი წინაშე ჩემსა არს მარადის. 

 

4. შენ მხოლოსა შეგცოდე და ბოროტი შენ წინაშე ვყავ; რაითა განმართლდე სიტყუათაგან შენთა და სძლო შჯასა შენსა. 

 

5. რამეთუ ესერა უშჯულოებათა შინა მიუდგა და ცოდვათა შინა მშვა მე დედამან ჩემმან. 

 

6. რამეთუ ესერა ჭეშმარიტებაი შეიყუარე, უჩინონი და დაფარულნი სიბრძნისა შენისანი გამომიცხადენ მე. 

 

7. მასხურო მე უსუპითა და განვწმიდნე მე, განმბანო მე და უფროის თოვლისა განვსპეტაკნე. 

 

8. მასმინო მე გალობაი და სიხარული, და იხარებდენ ძუალნი დამდაბლებულნი. 

 

9. გარე-მიაქციე პირი შენი ცოდვათა ჩემთაგან და ყოველნი უშჯულოებანი ჩემნი ახოცენ. 

 

10. გული წმიდაი დაჰბადე ჩემ თანა, ღმერთო, და სული წრფელი განმიახლე გუამსა ჩემსა. 

 

11. ნუ განმაგდებ მე პირისა შენისაგან და სულსა წმიდასა შენსა ნუ მიმიღებ ჩემგან. 

 

12. მომეც მე სიხარული მაცხოვარებისა შენისაი და სულითა მთავრობისათა დამამტკიცე მე. 

 

13. ვასწავლნე უშჯულოთა გზანი შენნი და უღმრთონი შენდა მოიქცენ. 

 

14. მიხსენ მე სისხლთაგან, ღმერთო, ღმერთო ცხორებისა ჩემისაო, იხარებდეს ენაი ჩემი სიმართლესა შენსა. 

 

15. უფალო, ბაგენი ჩემნი აღახუნე, და პირი ჩემი უთხრობდეს ქებულებასა შენსა. 

 

16. რამეთუ უკეთუმცა გენება, მსხუერპლი შე-მცა-მეწირა, არამედ საკუერთხი არა გთნდეს. 

 

17. მსხუერპლი ღმრთისა არს სული შემუსრვილი, გული შემუსრვილი და დამდაბლებული ღმერთმან არა შეურაცხ-ჰყოს. 

 

18. კეთილი უყავ, უფალო, ნებითა შენითა სიონსა და აღეშენნენ ზღუდენი იერუსალემისანი. 

 

19. მაშინ გთნდეს მსხუერპლი სიმართლისაი, შესაწირავი და ყოვლად-დასაწუელი; მაშინ შეიწირნენ საკურთხეველსა შენსა ზედა ზუარაკნი.

 

 

გალობაი 1, უგალობდითსა

 

ძლისპირი: ღელვათა დაანთქა პირველად ფარაო ეტლებითურთ და აღჭურვილით ძლიერად სპარაზენით სიტყუამან მამისამან, რომელი განხორციელდა ჩუენ ცოდვილთათვის, რომელსა უგალობთ: ღმერთო დიდებულო, დიდებულ-ხარ.

ღირსო მამაო თეოდოსი დიდო, ევედრე ღმერთსა ჩუენთვის

დიდად იღუაწე შენ საწუთროსა ამას ცხოვრებასა, ღმერთშემოსილო მამაო, და მარხვითა და მღვიძარებითა სახეი ექმენ რაი შენთა მოწაფეთა, აწ იხარებ უხორცოთა თანა და დიდების-მეტყუელებ და უგალობ ღმერთსა.

ღირსო მამაო თეოდოსი დიდო, ევედრე ღმერთსა ჩუენთვის

ჯეროვნად და სამართლად გიგალობს შენ უდაბნოი თანა-მკვიდრითურთ თვისით, ვითარცა მთავარსა თვისსა და წინამძღუარსა მუნ მოღუაწეთა მამათასა, რომელთა თანა აწ ჩუენცა შეგასხამთ გალობასა და ვადიდებთ ღმერთსა, განმაძლიერებელსა შენსა.

დიდებაი მამასა და ძესა და სულსა წმიდასა

წესად მონაზონთა და კანონად მოთმინებისა გამოუჩნდი შენ, ღირსო, უდაბნოსა მყოფთა მოღუაწეთა, და მოქმედ სასწაულთა ურიცხუთა, ამისთვის ვაქებთ საქმეთა შენთა საკვირველთა და სამართლად უგალობთ ღმერთსა, განმადიდებელსა შენსა.

აწ და მარადის, და უკუნითი უკუნისამდე, ამინ.

უზეშთაეს ხარ შენ, ყოვლადწმიდაო ღმრთისმშობელო, ყოველთა დაბადებულთა, ხილულთა და უხილავთა, რამეთუ შემოქმედი მათი მუცლისა შენისაგან განხორციელდა, ვითარცა ინება ცხორებისათვის სულთა ჩუენთაისა..

 

 

გალობა 3, განძლიერდასა

 

ძლისპირი: აღყუავილნა შროშნის სახედ მოსლვითა შენითა, ქრისტე, რომელ არს ბერწი წარმართთა ეკლესიაი და იქმნა შვილ-მრავალ, რომელსა შინა განაძლიერენ გულნი ჩუენნი.

ღირსო მამაო თეოდოსი დიდო, ევედრე ღმერთსა ჩუენთვის

ძირთაგან პატიოსანთა და კეთილად მორწმუნეთა მშობელთასა აღმოსცენდი რა კაბადუკიასა, განგსწავლეს სულიერად და სიჩჩოითგან აღეგზა გულსა შენსა სიყუარული ყოვლისა შემოქმედისაი.

ღირსო მამაო თეოდოსი დიდო, ევედრე ღმერთსა ჩუენთვის

სიყრმითგანვე გაქუნდა რაი სარწმუნოებაი მაღალი, გენება განშორებაი სოფლისაგან და საქმეთაგან მისთა, რაითა განიწმიდო გონებაი თვისი და ყო იგი სამკვიდრებელ ღმრთისა.

დიდებაი მამასა და ძესა და სულსა წმიდასა

იქმენ რაი სავანეი სულისა წმიდისაი, თქვი: უფალო, მიძეღუ მე გზათა შენთა, რაითა ვიდოდი მე ჭეშმარიტებითა შენითა, აწ ჩუენცა მოგვანიჭე მღვიძარებაი სულისაი და აღგვძარ გალობად ღმრთისა.

აწ და მარადის, და უკუნითი უკუნისამდე, ამინ.

გუნდნი იგი ზეცისანი განაკვირნა შობამან შენმან, ყოვლად უბიწოო, და გულნი კაცთანი შეაძრწუნნა, ამისთვისცა ღმრთისმშობლად აღგიარებთ შენ და გევედრებით კეთილად წარმართებასა ცხორებისასა.

 

 

 

 

 

მრჩობლი კვერექსი

 

 დიაკონმან: შეგჳწყალენ ჩვენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა გევედრებით ღმრთივ–დაცულისა ერისა ჩუენისა და მეუფებისა მისისათჳს (მთავრობისა და მხედრობისა) მისისათჳს.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა გევედრებით უწმიდესისა და უნეტარესისა, სრულიად საქართველოს კათოლიკოს–პატრიარქისა და მცეთა–თბილისის მთავარეპისკოპოსისა და ბიჭვინთისა და ცხუმ–აფხაზეთის მიტროპოლიტისა, დიდისა მეუფისა, მამისა ჩუენისა ილიასათჳს, და ყოვლადუსამღვდელოესისა... (აქა მოიხსენეთ ადგილობრიბი მღვდელმთავარი), და ყოველთა ქრისტეს მიერ ძმათა ჩუენთათვის.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა ვევედრნეთ უფალსა ღმერთსა ჩუენსა, რაითა შეიწყალნეს... (აქა მოიხსენეთ სახელდებით ისინი, ვისთვისაც ევედრებით ღმერთს).

 

 მგალობელთა: უფალო, შეგჳწყალენ (3-გზის).

 

 დიაკონმან: განამრავლე, უფალო, ჟამნი და წელნი ცხოვრებისა მათისანი, და იხსნენ იგინი, უფალო, ყოვლისაგან ჭირისა, რისხვისა და იწროებისა, და ყოვლისაგან წყლულებისა სულისა და ხორცთასა, და მიუტევენ მათ ყოველნი შეცოდებანი მათნი, ნებსითნი და უნებლიეთნი.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა გევედრებით ყოველთა ძმათა და ყოველთა ქრისტიანეთათჳს.

 

 მგალობელთა: უფალო, შეგჳწყალენ (3-გზის).

 

 მღვდელმან: რამეთუ მოწყალე და კაცთმოყვარე ღმერთი ხარ, და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის და უკუნითი უკუნისამდე.

 

 მგალობელთა: ამინ.

 

კვერექსის ნაცვლად ერისკაცი იტყვის – უფალო, შეგვიწყალენ 40-გზის. დიდებაი… აწდა…

 

წარდგომა, ხმა 8

 

  მოღუაწებითა სული შენი შეამკვე ღმრთივშუენიერად, წმიდაო თეოდოსი, და იქმენ რაი ახოვანი მხედარი ქრისტეის ღმრთისა, მრავალნი საცხოვარნი სამწყსოისა მისისანი განარინნე მგელთაგან მტაცებელთა, და მწყსიდი რაი, ვითარცა წმიდაი პეტრეი, აღაშენე სავანეი დიდი და მას შინა შესწირნე სულნი მრავალნი ღმრთისა, მას ევედრე, ცოდუათა მოტევებისა მონიჭებად სურვილით პატივისმცემელთა წმიდისა ხსენებისა შენისათა.

დიდებაი მამასა და ძესა და სულსა წმიდასა, აწ და მარადის, და უკუნითი უკუნისამდე, ამინ.

სასოებაო ყოვლადქებულო და ურცხვენელო ზღუდეო ჩუენო და საფარველო, ყოვლადწმიდაო ღმრთისმშობელო, ანგელოსთა თანა ევედრე ძესა შენსა და ღმერთსა, ღმრთივკურთხეულო, რაითა სოფელსა მშვიდობაი მოჰმადლოს და სულთა ჩუენთა დიდი წყალობაი.

 

 

გალობა 4, მესმასა

 

ძლისპირი: მოხვედ ჩუენდა ქალწულისაგან, არა ანგელოზი, არამედ თვით უფალი, განხორციელებული ღმერთი, და მიხსნენ ჩუენ ყოვლითურთ, რომელნი ვღაღადებთ: დიდებაი ძალსა შენსა.

ღირსო მამაო თეოდოსი დიდო, ევედრე ღმერთსა ჩუენთვის

აღიღე შენ მხართა შენთა ჯუარი იგი ქრისტეისი, რომელსაცა ესვიდი, ღირსო, და მიისწრაფდი საფლავად მისა, ვითარცა ირემი წყაროდ მიმართ, ყოვლადსაგალობელო მამაო თეოდოსი.

ღირსო მამაო თეოდოსი დიდო, ევედრე ღმერთსა ჩუენთვის

ასურასტანსა მიწევნულმან ინებე, რაითა მოიღო ლოცვაი წმიდისა სვიმეონ მესვეტისაი, და განძლიერდე ფიცხელსა მას გზასა ზედა მონაზონებისასა.

დიდებაი მამასა და ძესა და სულსა წმიდასა

გიხილა რაი წმიდამან, ღაღადყო: kეთილად მოხუედ, კაცო ღმრთისაო თეოდოსი, და გაკურთხევდა რაი ამბორისყოფითა, სიხარულითა წარემართე წმიდასა ქალაქსა იერუსალეიმსა.

აწ და მარადის, და უკუნითი უკუნისამდე, ამინ.

გიცნობთ შენ მყუდროდ ნავთსაყუდელად, დედოფალო, და ზღუდედ სიმტკიცისა დაურღუეველად, ღმრთისმშობელო, და მეოხად მიგავლენთ ძისა შენისა და ღმრთისა ჩუენ ყოველთაისა.

 

 

გალობა 5, ღამითგანსა

 

ძლისპირი: შუამდგომელ იქმენ ღმრთისა და კაცთა, ქრისტე, ღმერთო ჩუენო, და შენ მიერ განვერენით ბნელისაგან ღამისა წყუდიადისა, და ღირს ვიქმნენით ნათელსა მამისა შენისასა.

ღირსო მამაო თეოდოსი დიდო, ევედრე ღმერთსა ჩუენთვის

უწინარეს თაყუანის-ეც ღმრთისშემწყნარებელსა საფლავსა, და მოილოცნე რაი წმიდანი ადგილნი, პოვე მამაი ლონგინოზ მახლობლად დავითის გოდოლისა, და განგსწავლა მან მონაზონებასა შინა.

ღირსო მამაო თეოდოსი დიდო, ევედრე ღმერთსა ჩუენთვის

გაზრახა რაი მოძღუარმან შენმან დამკვიდრებაი სავანესა მას, kათისმად წოდებულსა, ლოცვითა და მარხვითა ხორცსა შენსა განკაფავდი, ღირსო, და ფრიად განითქვი სათნოებითა და სიწმიდითა.

დიდებაი მამასა და ძესა და სულსა წმიდასა

ეწადათ რაი წინამძღვრად დადგინებაი შენი ძმათა, იუდეისა უდაბნოსა მიისწარფე და დამკვიდრდი მღვიმესა მას, რომელსაცა შინა ღამეი ერთი დაყვეს მოგვთა მათ, ბეთლემით გამოსრულთა.

აწ და მარადის, და უკუნითი უკუნისამდე, ამინ.

ევედრე ძესა შენსა და ღმერთსა ჩუენსა, ყოვლად უბიწოო, რაითა მოგუანიჭოს ჩუენ ხსნაი ეშმაკისა მახეთაგან და ერსა ჩუენსა მოჰმადლოს გამოხსნაი უღლისაგან მტერთაისა.

 

 

გალობა 6, ღაღადყავსა

 

ძლისპირი: ღელვამან ცოდვისამან მომიცვა მე, და მრავალთა მოწყალებათა შენთა მოვევლტი, აღმომიყვანე, სახიერ, დანთქმისაგან, ღმერთო ჩემო, გევედრები.

ღირსო მამაო თეოდოსი დიდო, ევედრე ღმერთსა ჩუენთვის

მარადის დადგრომილ იყავ რაი ლოცვასა შინა ტირილითა, მარხვითა დასცემდი ხორცთა თვისთა, და ღუაწლითა შენითა და მადლითა უფლისაითა მიიწიე საზომსა მას სიწმიდისასა.

ღირსო მამაო თეოდოსი დიდო, ევედრე ღმერთსა ჩუენთვის

ოცდაათსა წელსა პური არა მიიღე, ნეტარო, და შრომითა და მოღუაწებითა სათნო ეყოფოდი ღმერთსა, მას ევედრე აწ ჩუენთვისცა, რაითა მოგვანიჭოს გულისხმის-ყოფაი კეთილისა და ბოროტისა.

დიდებაი მამასა და ძესა და სულსა წმიდასა

ვითარცა არა დაიფარვის ქალაქი, დაშენებული მთასა ზედა, ეგრეთცა განცხადნა საქმენი შენნი, აღმატებული ძალსა კაცობრივსა, და მრავალნი მოვიდოდეს შენდა, რაითა განსწავლო სიტყუასა მოციქულთა და მოძღუართასა, და წარუმართო ღმრთისა მიმართ.

აწ და მარადის, და უკუნითი უკუნისამდე, ამინ.

უსძლოო, ქალწულებითა მუცლად-იღე და უთესლოდ გვიშევ რაი ჩუენ ზეცისა მეუფეი, დაადგერ ქალწულადვე და ჩუენ მოგვასწავე ღმრთეებაი მისი.

 

 

 

 

კონდაკი, ხმაი 8

 

 შენ, დანერგულმან ეზოთა შინა ღმრთისათა, სათნოებათა ღირსებაი აღაყვავილენ, და განამრავლენ შვილნი შენნი უდაბნოსა შინა, წვიმათა მიერ ცრემლთა შენთასა მორწყულნი, ბაკოვანთა საღმრთოთა არვეთ-მთავარო, ამისთვის გიღაღადებთ: გიხაროდენ მამაო თეოდოსი!

 

სხუაი კონდაკი

 

 შური საღმრთოი აღიღე იოვანე ნათლისმცემელისა და ელია ღმრთისა კაცისაი, ღირსო მამაო თეოდოსი, და მათებრ შენცა ამხილე მეფესა ურწმუნოსა სიტყვითა საღმრთოითა, და კადნიერად დაამტკიცე შჯული, რომელი გამოვალს სიონით, რაითა ვიცნათ ძეი ღმრთისაი, ორითა ბუნებითა ერთხატად.

 

 

 დიაკონმან: სიბრძნით. მოხედენ.

 

 მღდელმან: მშვიდობა ყოველთა.

 

 მგალობელთა: და სულისაცა შენისა თანა.

 

 დიაკონმან: წარდგომა ფსალმუნისაგან დავითისა, ხმაი 4: პატიოსან-არს წინაშე უფლისა სიკუდილი წმიდათა მისთა.

 

 მგალობელთა: პატიოსან-არს წინაშე უფლისა სიკუდილი წმიდათა მისთა.

 

 დიაკონმან:   რაი მივაგო უფალსა ყოვლისავეთვის, რომელი ესე მომაგო მე.

 

 მგალობელთა: პატიოსან-არს წინაშე უფლისა სიკუდილი წმიდათა მისთა.

 

 დიაკონმან: პატიოსან-არს წინაშე უფლისა

 

 მგალობელთა: სიკუდილი წმიდათა მისთა.

 

 მღდელმან: უფლისა მიმართ ვილოცოთ.

 

 მგალობელთა: უფალო, შეგჳწყალენ!

 

 მღდელმან: რამეთუ წმიდა ხარ შენ, ღმერთო ჩუენო, და რომელი წმიდათა შორის განისუენებ, და შენდა დიდებასა აღვავლენთ, მამისა, და ძისა და წმიდისა სულისა, აწ და მარადის, და უკუნითი უკუნისამდე,

 

 მგალობელთა: ამინ.

 

 დიაკონმან: ყოველი სული აქებდით უფალსა.

 

გუნდი: ყოველი სული აქებდით უფალსა.

 

 დიაკონმან: აქებდით ღმერთსა წმიდათა შორის მისთა, აქებდით მას სამყაროთა ძალისა მისისათა.

 

გუნდი: ყოველი სული აქებდით უფალსა.

 

 დიაკონმან: ყოველი სული

 

გუნდი: აქებდით უფალსა.

 

 დიაკონმან: ღირსყოფად ჩუენდა სმენად წმიდისა სახარებისა უფალსა ღმერთსა ჩუენსა ვევედრნეთ.

 

 მგალობელთა: უფალო, შეგჳწყალენ (3-გზის).

 

 დიაკონმან: სიბრძნით აღემართენით და ისმინეთ წმიდა სახარება.

 

 მღვდელმან: მშჳდობაჲ ყოველთა.

 

 მგალობელთა: და სულისაცა შენისა თანა.

 

 დიაკონმან: ლუკასაგან წმიდისა სახარებისა საკითხავი.

 

 მგალობელთა: დიდებაჲ შენდა, უფალო, დიდებაჲ შენდა.

 

 დიაკონმან: მოხედენ.

 

სახარება ლუკასი

 

  ჰრქუა უფალმა მოწაფეთა მისთა: ნეტარ ხართ გლახაკნი სულითა, რამეთუ თქუენი არს სასუფეველი ღმრთისაი. ნეტარ ხართ თქუენ, რომელთა გშიის აწ, რამეთუ განსძღეთ. ნეტარ ხართ, რომელნი სტირთ აწ, რამეთუ იცინოდეთ. ნეტარ ხართ, რაჟამს მოგიძულენ თქვენ კაცთა და ოდეს გამოგასხენ თქუენ და გაყუედრებდნენ და განხადონ სახელი თქუენი, ვითარცა ბოროტთა ძისათვის კაცისა. გიხაროდენ მას დღესა შინა და მხიარულ იყუენით, რამეთუ აჰა ესერა სასყიდელი თქუენი, მრავალ არს ცათა შინა.

 

 მგალობელთა: დიდებაჲ შენდა, უფალო, დიდებაჲ შენდა.

 

 მკითხველმან: დიდება მამასა და ძესა და წმიდასა სულსა.

 

 მეოხებითა ღირსისა მამისა ჩუენისა თეოდოსი დიდისაითა, მოწყალეო, აღხოცენ ცოდვათა ჩუენთა სიმრავლენი.

 

 აწ და მარადის და უკუნითი უკუნისამდე, ამინ. 

 

 მეოხებითა წმიდისა ღმრთისმშობელისათა, მოწყალეო, აღხოცენ ცოდვათა ჩემთა სიმრავლენი.

 

მიწყალე მე, ღმერთო, დიდითა წყალობითა შენითა, და მრავლითა მოწყალებითა შენითა აღხოცენ უსჯულოებაჲ ჩემი და შემიწყალე მე, ღმერთო.

 

 

  გერი: ხატ სიწმიდისა გამოსჩნდი, მამაო საწადელო, და სიტყუათა შენთა ელვითა და სულისა ბრწყინვალებითა განიოტებდი რაი არმურსა ცოდვისასა, საზრდელი უკუდავებისაი მიეც მორწმუნეთა, მართალი სარწმუნოებაი, რომლითაცა გამოჰზარდენ მრავალნი სულნი, ღმერთშემოსილო მამაო თეოდოსი, და სათნო ეყავ ღმერთსა, ევედრე მას, რაითა მოანიჭოს ერსა ჩუენსა მშვიდობაი, ქრისტეანეთა უვნებელობაი და მგალობელთა შენთა დიდი წყალობაი.

 

 

ლოცვა მღვდლისა მიერ სათქუმელი

 

 აცხოვნე, ღმერთო, ერი შენი, და აკურთხე სამკვიდრებელი შენი, მოხედენ სოფელსა შენსა წყალობითა და მოწყალებითა, აღამაღლე რქაი ქრისტეანეთა მართლმადიდებელთაი, და გარდამოავლინენ ჩუენ ზედა მდიდარნი წყალობანი შენნი, მეოხებითა ყოვლადწმიდისა დედოფლისა ჩუენისა ღმრთისმშობელისა, და მარადის ქალწულისა მარიამისაითა; ძლიერებითა პატიოსნისა და ცხოველსმყოფელისა ჯუარისაითა; მეოხებითა პატიოსანთა უხორცოთა ზეცისა ძალთაითა; პატიოსნისა, დიდებულისა, წინაისწარმეტყუელისა, წინამორბედისა და ნათლისმცემელისა იოვანეისითა, წმიდისა დიდისა წინაისწარმეტყუელისა ელია თეზბიტელისა და მართლისა ენუქისითა; წმიდათა დიდებულთა, და ყოვლად–ქებულთა მოციქულთა თავთა, პეტრეისა და პავლეისითა; წმიდისა მოციქულისა თომასი და საქართველოს განმანათლებელთა მოციქულთა: ანდრია პირველწოდებულისა, სვიმონ კანანელისა, ბართლომესი, თადეოზისა და მატათაისითა; ღირსისა დედისა ჩუენისა, მოციქულთა სწორისა ქალწულისა ნინო ქართველთ განმანათლებელისა და წმიდათა მოციქულთა სწორთა: მეფისა მირიანისა და დედოფლისა ნანაისითა; წმიდათა შორის მამათა ჩუენთა, და მსოფლიოთა დიდთა მოძღუართა და მღდელმთავართა: ბასილი დიდისა, გრიგოლი ღმრთისმეტყუელისა, და იოვანე ოქროპირისაითა; წმიდათა შორის მამისა ჩუენისა ნიკოლოზ მირონ–ლუკიის მთავარეპისკოპოსისა და საკვირველთმოქმედისაითა; წმიდისა დიდებულისა და ღუაწლისა–მძლისა მოწამისა, ძლევა–შემოსილისა გიორგისა და წმიდათა დიდთა ქალწულ–მოწამეთა ბარბარეისა და მარინეისითა; წმიდათა მამამთავართა ჩუენთა: პეტრე, სამუელ, სარმიან, მამაი, არსენ, მელქისედეკ, იოანე–ოქროპირ, ნიკოლოზ, ევდიმოზ, იოსებ, კირიონ, და ამბროსისაითა; ღირსისა მამისა ჩუენისა იოვანე ზედაზნელისა და ათორმეტთა მისთა მოწაფეთა, მეორედ განმანათლებელთა საქართველოს ეკლესიისა და მარადის მფარველთა მისთა და წმიდისა მღდელმოწამისა ნეოფიტე ურბნელისაითა; ღმრთივ–განბრძნობილთა ნეტართა მამათა ჩუენთა: ილარიონ ქართველისა, სერაპიონ ზარზმელისა, გრიგოლ ხანძთელისა და საბა იშხნელისაითა; ღირსთა მამათა ჩუენთა ათონელთა: იოვანე და გაბრიელ ქართველთა, იოვანე თორნიკ–ყოფილისა და ეფთვიმე და გიორგი მთაწმინდელთაითა; წმიდათა დიდებულთა და ღუაწლისა–მძლეთა მოწამეთა ჩუენთა: რაჟდენისა, ევსტათი მცხეთელისა, ჰაბო ტფილელისა, მიქაელ–გობრონისა, თევდორე მღდლისა, ქრისტეფორე გურულისა, ნიკოლოზ დვალისა, კოზმანისა, არგვეთისა მთავართა დავით და კონსტანტინეისა და კონსტანტინე მთავრისაითა; წმიდისა მთავარ–მოწამისა ბიძინასა და წმიდათა დიდებულთა მოწამეთა: შალვა და ელიზბარ ქსნის ერისთავთაითა; წმიდისა მოწამისა შალვა ახალციხელისა და წმიდათა ათთა–ბევრთა მოწამეთა, ტფილისს ხუარაზმელთაგან მოწყუედილთაითა; წმიდათა მოწამეთა ექვსი ათასთა გარეჯელთა ბერთა და მრავალთა წმინდათა მამათა და დედათა, აჭარაში თურქთაგან წამებულთაითა; წმიდათა ღუაწლისამძლეთა მეფეთა და დედოფალთა: მირდატ, აშოტ, არჩილ, დემეტრე, ლუარსაბ, შუშანიკ და ქეთევანისაითა და წმიდათა კეთილ–მორწმუნეთა და დიდთა მეფეთა ჩუენთა: ვახტანგ გორგასალისა, დავით აღმაშენებელისა, დემეტრე–დამიანეისა, თამარისა და სოლომონისაითა; წმიდისა ილია მართლისა, ექვთიმე ღმრთისკაცისა და ექვთიმე აღმსაარებლისაითა; წმიდათა აღმსარებელთა მამათა ჩუენთა, იოვანეისი და გიორგი–იოანე ბეთანიელთა და ღირსისა მამისა ჩუენისა არქიმანდრიტისა გაბრიელისა, აღმსაარებელისა და სალოსისაითა; წმიდათა და მართალთა მშობელთა ღმრთისაითა იოაკიმ და ანნაისითა (და წმიდისა სახელი, რომლისა არს ტაძარი და დღის წმიდანი მოიხსენიოს), და წმიდისა დიდისა მღდელმთავრისა, შანხაისა და სან–ფრანცისკოს მთავარეპისკოპოსისა იოანესი, განმანათლებლისა და საკვირველმოქმედისაითა, და ყოველთა წმიდათა შენთაითა გევედრებით შენ, მრავალ–მოწყალეო ღმერთო, შეისმინე ჩუენ ცოდვილთა ვედრებაი, და შეგვიწყალენ ჩუენ.

 

 მგალობელთა: უფალო, შეგჳწყალენ (12-გზის).

 

 მღდელმან: წყალობითა და მოწყალებითა და კაცთმოყუარებითა მხოლოდშობილისა ძისა შენისაჲთა, რომლისა თანა კურთხეულ ხარ, თანა ყოვლადწმიდით, სახიერით, და ცხოველსმყოფელით სულით შენითურთ, აწ და მარადის და უკუნითი უკუნისამდე.

 

 მგალობელთა: ამინ.

 

 

გალობა 7, კურთხეულარსა

 

  ძლისპირი: ბრძანებამან უშჯულოისა მძლავრისამან უფროისად მოტყინარე აღაგზნა სახუმილი ყრმათათვის და ღმერთმან ყოველთამან ასხურა ცუარი ზეცით სამთა მათ მგალობელთა, რომელ-იგი არს კურთხეულ უკუნისამდე.

ღირსო მამაო თეოდოსი დიდო, ევედრე ღმერთსა ჩუენთვის

ასწავებდი რაი ძმათა შენთა მარადღე ხსენებასა სიკუდილისასა, რაითა იგლოვდენ ცოდვათათვის, აღიშენე საფლავი, ყოვლად ნეტარო თეოდოსი, გარნა პირველ შენსა განაახლა მოწაფემან შენმან ბასილ, გუამისა თვისისა მას შინა დადებითა.

ღირსო მამაო თეოდოსი დიდო, ევედრე ღმერთსა ჩუენთვის

აღასრულებდი რაი ურიცხვთა ნიშ-სასწაულთა და კურნებათა, მრავალნი უდაბნოისა მოყუარენი მოივლტოდენ შენდა, ღირსო, და უკვირდა მათ სასოებაი შენი ღმრთისა მიმართ, რომელმან არა უგულებელს-ყვნის მონანი მისნი, და აქებდენ ძალსა მისსა.

დიდებაი მამასა და ძესა და სულსა წმიდასა

ოდეს განმრავლდა რიცხვი მოწაფეთა შენთაი, წმიდაო ბერო, განხვედ სენაკსა, და ვერა იტევდა რაი ქუაბი იგი ძმათა, ეწადათ შენებაი მონასტრისაი, და საღმრთოითა მინიშნებითა აღუშენე ღმრთისმშობლისა ტაძარი და სავანეი ცხორებისათვის სულთაისა.

აწ და მარადის, და უკუნითი უკუნისამდე, ამინ.

წმიდათა უწმიდესად აღგიარებთ შენ, მხოლოო ღმრთისმშობელო, რომელმან შევ უცვალებელად, ქალწულო უსძლოო და დედაო უბიწოო, რამეთუ საღმრთოითა შობითა უხრწნელებაი აღმოგვიცენე ყოველთა.

 

 

გალობა 8, აკურთხევდითსა

 

  ძლისპირი: სახუმილი იგი ცეცხლისაი ბაბილონს პირველად განიზოგა ღმრთისა მიერ, რამეთუ ქალდეველნი ალისა მისისაგან შეიწუნეს, ხოლო ყრმანი შეცურეულნი იტყოდეს: აკურთხევდით ყოველნი საქმენი უფლისანი უფალსა.

ღირსო მამაო თეოდოსი დიდო, ევედრე ღმერთსა ჩუენთვის

გამოგირჩია რაი პატრიარქმან არქიმანდრიტად ყოველთა ზოგადცხორებულთა სავანეთა მახლობლად ქრისტეს საფლავისა, მრავალნი ღირსნი მამანი, იღუმენნი და ებისკოპოსნი გამოზარდენ გულისხმისყოფითა საღმრთოითა.

ღირსო მამაო თეოდოსი დიდო, ევედრე ღმერთსა ჩუენთვის

ფრიად იღუწიდი სნეულთათვის, ღირსო, და აღაშენე რაი მრავალნი სახლნი ერისკაცთათვის და მონაზონთა, თავშესაფარნი დააფუძნე მწირთათვის და ეშმაკთაგან შეპყრობილთა ბერთა, და ზრუნვითა შენითა განკურნვილნი იხარებდენ და მადლობდენ ღმერთსა.

დიდებაი მამასა და ძესა და სულსა წმიდასა

ჟამსა მას მწვალებელისა მეფისასა გამოსჩნდი რაი მცველად ქრისტეს სარწმუნოებისა, შეკრიბნე წინამძღუარნი აღდგომისა ეკლესიასა შინა იერუსალეიმსა, და ეპისტოლითა არწმუნებდით მეფესა, მწვალებლობათაგან განკრძალვასა წმიდისა ეკლესიისასა.

აწ და მარადის, და უკუნითი უკუნისამდე, ამინ

შენ თანასწორი მამისაი სიტყუაი მხოლოი უთესლოდ მუცლად იღე, ქალწულო, და შევ გამოუთქმელად ღმერთი და კაცი მიუწვდომელი, წმიდაო დედოფალო, ამისთვისცა აღგიარებთ შენ მიზეზად ცხორებისა ჩუენისა და გევედრებით ხსნასა ყოვლისაგან საცთურისა.

 

 

გალობა 9, ადიდებდითსა

 

  ძლისპირი: დაუსაბამოისაგან მამისა ძე ღმრთისაი გამოჩნდა, ქალწულისაგან მხსნელად ჩუენდა განხორციელდა, განგუანათლებს დაბნელებულთა და შემოჰკრებს ერთად განბნეულთა, რაითა სარწმუნოებითა ვადიდებდეთ მშობელსა მისსა.

ღირსო მამაო თეოდოსი დიდო, ევედრე ღმერთსა ჩუენთვის

უქადაგენ რაი ამბიონითგან კრებულსა ოთხნი კრებანი, და ყოველნი მგმობნი მისნი გარდაეც კრულებასა, ბრძანა ექსორიაი შენი მეფემან მწვალებელმან, წმიდაო თეოდოსი, გარნა ეწია რისხუაი ღმრთისაი, და განიდევნა სული მისი ბაგეთა მათგან, მგმობართა მისთა.

ღირსო მამაო თეოდოსი დიდო, ევედრე ღმერთსა ჩუენთვის

ექმნა რაი კურთხევაი ქრისტეს მიერ ხელითა შენითა, ღირსო, განმრავლდა მარცვალი იფქლისაი საკვირველად, და აღავსო ბეღელი მონასტრისაი დაუთესველისაგან იფქლისა, ხოლო ჯურღუმულსა მას შინა წყლისასა გამოუჩნდი ყრმასა, და განარინე იგი დარჩობასა.

დიდებაი მამასა და ძესა და სულსა წმიდასა

წინაითვე გემცნო რაი ჟამი განსლვისა შენისაი, მამაო, მოწაფეთა შენთა დაუტევე მშვიდობაი, და სული შენი ლოცვითა შეჰვედრე რაი ღმერთსა, ანგელოზთა მისთა აღგიყვანეს სასუფეველსა, და წმიდაი ნეშტი შენი პატივითა დაკრძალეს სავანესა შინა შენსა.

აწ და მარადის, და უკუნითი უკუნისამდე, ამინ.

უსძლოისაგან დედისა უმამოდ ძეი ღმრთისაი გამოჩნდა, რომელი პირველ მამისაგან იშვა უდედოდ, აღსასრულსა ჟამთასა კაც იქმნა და იშვა მაცხოვრად სოფლისა, რაითა ღმერთ-ყოს კაცებაი და განააახლოს სახიერებითა.

 

 

 მგალობელთა: ღირს-არს ჭეშმარიტად, რათა გადიდებდეთ, შენ ღვთისმშობელო, რომელი მარადის სანატრელ იქმენ, ყოვლად-უბიწოდ და დედად ღვთისა ჩვენისა. უპატიოსნესსა ქერუბინთასა, და აღმატებით უზესთაესსა სერაბინთასა, განუხრწნელად მშობელსა სიტყვისა ღვთისასა, მხოლოსა ღვთისმშობელსა გალობით გადიდებდეთ. ("ღირს - არს" - ის ნაცვლად საკითხავი საგალობლები)

 

მღდელმან აკმიოს:

 

 მკითხველმან: ალი ღმრთისა მიმართ ლოცვითა და მხურვალითა სიყუარულითა აღაგზენ, ბრძენო მამაო თევდოსი, და ზეცისა იგი ცეცხლი მოიღე რაი სათნოებითა, ღმრთისა მადლითა უწყებულ იქმენ ტაძრისა და სავანისა აღშენებისა, რომელსა შინა ღმრთისმსახურებითა შურებოდი, და გამოჩნდი რაი, ვითარცა დიდი მნათობი მონაზონთა კრებულისა, აწ ჩუენცა სასოებაი დაგვიძს სიწმიდესა შენსა ზედა, და გევედრებით შეწევნასა, რაითა ცოდვათა შინა დანთქმისაგან აღმოგვიტაცოს უფალმან და ძალი, სიბრძნეი, და ერთსულოვნებაი მოჰმადლოს ერსა ჩუენსა.

იყავ რაი ზოგადცხოვნებულთა სავანეთა წინამძღოლი და მფარველი მკვიდრთა მისთა, სწავლანი ბოროტთა მწვალებელთანი განაქიქენ და დასთრგუნე რაი მართლსწავლითა, სახეი კეთილისაი ექმენ მონაზონთა, და უფალსა ევედრებოდი განძლიერებასა მათსა, აწ ჩუენთვისცა ევედრე მას, სანატრელო, რაითა ურიცხუთა მწვალებელთა და ღმრთისმგმობთა მზაკუვარებათაგან გვიხსნას ოხითა შენითა და ეკლესიაი ჩუენი დაიცვას შეუძრველად.

სახელი შენი, ღირსო მამაო, არს მოცემისაებრ ღმრთისა, და ვითარცა იყავ შენ მკურნალი, და გამომზრდელი სიყმილითა განკაფულთა და წყურიელთა; შემმოსელი შიშუელთა და აღმადგინებელი დაცემულთა, აწ ჩუენცა შეგვეწიე მისა მიმართ, რაითა მოგუმადლოს ყოველივეი, რაიცა სარგებელ არს სულთა და ხორცთათვის ჩუენთა: მართალი სარწმუნოებაი, სასოებაი შეუორგულებელი, სიყუარული წრფელი, მორჩილებაი და სიმდაბლეი, და ახოვანებაი ჭირთა და განსაცდელთა შინა.

ჟამსა მას ქუეყნიერისა ცხორებისასა იყავ რაი მლოცველი და ყოვლად ძლიერი მფარველი დავრდომილთა და სნეულთა, სიმრავლეი სათნოებათა შენთაი და ძალი ურიცხუთა სასწაულთაი ვერა დაფარა საფლავმან მიწისამან, იქმნა რაი სნეულთა და უძლურთათვის, ვითარცა საუნჯეი მადლისაი, და ყოველი მისდა შევრდომილი აღმოივსებს რაი სულთა და ხორცთა კურნებასა, აწ ჩუენცა წარმწყმედელთა გზათაგან განგვარინე და დაგვიფარე ყოველთა სენთა, ჭირთა და ურვათაგან.

შენ გადიდებენ ზეცისა გუნდნი, ღმრთისა დედაო, უბიწოო, რამეთუ უზეშთაეს ხარ ქერობინთა საყდართაი, რომელმან ზედა მჯდომარეი იტვირთე, და უაღრესი შორის ყოველთა დაბადებულთასა, გნატრით აწ მკვიდრნი ქუეყანისანი და გევედრებით: ნუ განგვაშორებ საფარველსა თვისსა, არამედ შეგვეწიე და აღგვავსე მღვიძარებითა საღმრთოითა, რაითა ყოველნი ვიქმოდეთ სამართალსა, და მადლსა და დიდებასა შევსწირვიდეთ ღმერთსა:

 

 

 წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).

 

 დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 

 ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.

 

 უფალო შეგვიწყალენ (3-გზის).

 

 დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 

 მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.

 

 მღვდელმან: რამეთუ შენი არს სუფევა, ძალი და დაიდება, მამისა და ძისა და წმიდისა სულისა, აწ და მარადის და უკუნითი უკუნისამდე.

 

 მგალობელთა: ამინ.

 

 მკითხველმან: მიწყალენ ჩუენ, უფალო, შემიწყალენ ჩვენ, რამეთუ ყოველსავე სიტყვის-მიცემისაგან უღონო ვართ, გარნა ამას ვედრებასა შენ, მეუფისა სახიერისა, ცოდვილნი ესე შევსწირავთ. მიწყალენ ჩუენ, უფალო, შეგვიწყალენ ჩუენ.

 

 დიდება მამასა და ძესა და წმიდასა სულსა.

 

 უფალო, შემიწყალენ ჩუენ, რამეთუ შენ გესავთ, ნუ განმირისხდები ჩუენ ფრიად, და ნუცა მოიხსენებ უსჯულოებათა ჩუენთა, არამედ მოიხილე ჩუენზედა წყალობით, ვითარცა სახიერ ხარ, და გვიხსენ ჩუენ სამართლად რისხვისაგან შენისა, რამეთუ შენ ხარ ღმერთი ჩუენი, და ჩუენ ვართ ერნი შენნი, ყოველნივე ქმნულნი ხელითა შენთანი ვართ და სახელი შენი წოდებულ არს ჩუენზედა, და შემიწყალენ ჩუენ.

 

 აწ და მარადის, და უკუნითი უკუნისამდე, ამინ.

 

 მოწყალების კარი განგვიღე, კურთხეულო ღმრთისმშობელო, რათა, რომელნი ესე შენ გესავთ, არა დავეცნეთ, არამედ განვერნეთ წინააღმდგომთა მტერთაგან, რამეთუ შენ ხარ ცხოვრება ნათესავისა ქრისტიანეთასა.

 

 

მცირე მრჩობლი კვერექსი

 

 დიაკონმან: შეგჳწყალენ ჩუენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.

 

 მგალობელთა: უფალო, შეგჳწყალენ (3-გზის).

 

 დიაკონმან: მერმეცა გევედრებით, მოწყალებისა, სიცოცხლისა, მშჳდობისა, სიმრთელისა, დღეგრძელობისა, მყუდროებისა, განათლებისა, ცხორებისა, შეწევნისა, შენდობისა და ცოდვათა  მოტევებისათჳს ყოველთა შვილთა ჩუენისა ეკლესიისა, რაჲთა დაიცვას უფალმან ღმერთმან ჩუენმან სამეუფოჲ ქალაქი ესე ჩუენი და წმიდაჲ ესე მონასტერი (ანუ ეკლესია) და ყოველი  სოფელი  სიყმილისაგან, სრჳსა, ძრჳსა, მახჳლისა, ზედა მოსლჳსაგან უცხო თესლთასა და ყოვლისაგან ბოროტისა;  რაჲთა მოწყალე გუექმნეს ჩუენ ღმერთი კეთილად დგომისათჳს სახიერებითა და კაცთმოყუარებითა თჳსითა, და გარე წარაქციოს რისხვაჲ, მარადის ჩუენ ზედა მომავალი, და გჳჴსნეს ჩუენ სამართლად ჩუენ ზედა მოწევნულისა რისხვისაგან, და შეგჳწყალნეს ჩუენ.

 

 მგალობელთა: უფალო, შეგჳწყალენ (12-გზის).

 

 მღდელმან: შეისმინე ჩუენი, ღმერთო, მაცხოვარო ჩუენო, სასოო ყოველთა კიდეთა ქუეყანისათაო, და რომელნი არიან ზღუათა შინა შორს და ცასა შინა, და მლხინებელ, და მოწყალე ექმენ შეცოდებათა ჩუენთა, და შეგჳწყალენ ჩუენ, რამეთუ მოწყალე და კაცთმოყუარე ღმერთი ხარ და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის, და უკუნითი უკუნისამდე.

 

 მგალობელთა: ამინ.

 

 დიაკონმან: მუხლმოდრეკით უფლისა მიმართ ვილოცოთ.

 

 მგალობელთა: უფალო, შეგჳწყალენ. 

 

 კვერექსის ნაცვლად ერისკაცი იტყვის – უფალო, შეგვიწყალენ 3-გზის. დიდებაი… აწდა…

 

სავედრებელი ლოცვა

 

  ჰოი, მოწესეთა სამკაულო და ქალაქ-მყოფელო უდაბნოისაო, ღირსო მამაო ჩუენო თეოდოსი, ეკლესიისა სიმტკიცეო და სუეტო შეურყეველო კეთილად მსახურებისაო, მონაზონთა ღმრთივსულიერო კანონო და სიქადულო პალესტინისაო; პატიოსანთა ღმრთისმსახურთა ზესთამბრძოლო და ჭირთა შინა ურცხვენელო ხელის აღმპყრობელო ქრისტეანეთაო; მრავალთა სასწაულთა მომქმედო და ღმრთისა მიმართ მეოხო და შესავედრებელო ყოველთა უპოვართა, განწირულთა და სარწმუნოებითა შენდამი შევრდომილთაო!

ჰოი, ყოვლადბრწყინვალეო ვარსკულავო უდაბნოისაო და მნათობო იერუსალეიმისაო, ღმერთშემოსილო მამაო თეოდოსი! მსგავსად მზისა განბრწყინდა რაი ძალნი იგი სასწაულთანი, შენ მიერ აღსრულებულნი უდაბნოსა შინა, მხცოვანებასა შინა აღმაღლდი ხორცთაგან ღმრთისა სასურველისა შენისა, და არა ხოლო მკვიდრ ხარ შენ ზეცისაი, არამედ გაქუს კადნიერებაი ღმრთისა მიმართ, რაითა არა წარგვწყმიდოს ცოდვათათვის ჩუენთა, არამედ მოგვცეს ჟამი სინანულისაი და მოგუანიჭოს სიმხნეი, სიბრძნეი და ძალი დაცვად სჯულისა ჩუენისა და მამულისა, რაითა არა განმცემელ ვექმნნეთ სიქადულსა ჩუენსა მართლმადიდებლობასა, რომელ ქადაგეს წმიდათა მოციქულთა და გუასწავეს ღმერთშემოსილთა მამათა ჩუენთა. ყოვლადძლიერითა მადლითა ლოცვისა შენისაითა დაიცევ და მსახურებასა შინა განაძლიერე უწმიდესი და უნეტარესი, სრულიად საქართველოის კათალიკოს-პატრიარქი, მცხეთა-თბილისის მთავარეპისკოპოსი და ბიჭვინთისა და ცხუმ-აფხაზეთის მიტროპოლიტი მამაი ჩუენი ილია, ყოვლადსამღდელონი მიტროპოლიტნი, მთავარეპისკოპოსნი და ეპისკოპოსნი და ყოველნი სამღდელონი და სამონოზნო წესნი, ზიარნი ეკლესიისა ჩუენისანი, და ყოველნი მართლმორწმუნენი ქრისტეანენი.

ჰოი, მამათა შორის კეთილმსახურებითა განბრწყინვებულო, დიდო სასწაულთმოქმედო თეოდოსი! რომელმან მონაზონებისა შრომითა თავი თვისი განიწმიდე, და იქმენ მიმსგავსებულ უფალსა შენსა, სამოსელისა შენისა შეხებითა სენნი განჰკურნენ და სიყმილითა დახსნილი ერი გამოჰზარდე რაი საუნჯისაგან მოუკლებელისა, ზეცით მოიგე გვირგვინი ძლევისაი და აწ დაუდუმებელად უგალობ რაი წმიდასა სამებასა, შესწირე მას ლოცვანი ჩუენნი და გვითხოვე ხსნაი სიყმილისაგან, სრვისა, ძრვისა, ცეცხლისა, მახვილისა, განმხრწნელისაგან ქარისა, ზედა მოსლვისაგან უცხო თესლთაისა და ძმათა შორის ბრძოლისაგან, ტყვეობისაგან ეშმაკისა და უწმიდურთა სულთა ყოვლისა მოქმედებისაგან, უცნაურისა სენისა და სიკუდილისაგან, რაითა უბრკოლველად თანა-წარვხდეთ საცთურთა მათ საწუთოისათა, და ჟამსა მას აღსასრულისა ჩუენისასა განვერნეთ ბოროტთა მათ ჰაერის მცველთა, რაითა შენ მიერ ძღუანებულნი მივიწივნეთ ზეციერსა მას იერუსალეიმსა, და სასუფეველსა შინა მარადის შენთანა უგალობდეთ მამასა, ძესა და სულსა წმიდასა, აწ და მარადის, და უკუნითი უკუნისამდე,

 

 მგალობელთა: ამინ.

 

 დიაკონმან: სიბრძნით! ყოვლადწმიდაო ღმრთისმშობელო, გუაცხოვნენ ჩუენ.

 

 მგალობელთა: უპატიოსნესსა ქერუბიმთასა და აღმატებით უზე­სთაესსა სერაბინთასა, განუხრწნელად მშობელსა სიტყჳსა ღმრთისასა, მხოლოსა ღმრთისმშობელსა გალობით გადიდებდეთ.

 

 მღდელმან: დიდებაჲ შენდა, ღმერთო ჩუენო, დიდებაჲ შენდა.

 

 მგალობელთა: დიდებაჲ მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

 უფალო, შეგჳწყალენ (3-გზის).

 

 სახელითა უფლისათა, უწმიდესო და უნეტარესო მეუფეო გუაკურთხენ.

 

 მღვდელმან: უფალო იესუ ქრისტე, ძეო ღმრთისაო, ლოცვითა ყოვლად წმიდისა დედისა შენისათა, ღირსთა და ღმერთშემოსილთა მამათა ჩვენთათა და ყოველთა წმიდათა შენთათა, შეგვიწყალენ ჩვენ, ამინ.

 

 მგალობელთა: ამინ. უფალო, შეგჳწყალენ (3-გზის).

 

დიდებაი მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

უფალო, შეგვიწყალენ (3-გზის),

უფალო, იესუ ქრისტე, ძეო ღმრთისაო, ლოცვითა ყოვლადწმიდისა დედისა შენისაითა, და ყოველთა წმიდათაითა, შეგვიწყალენ ჩუენ, ამინ.

 

ხატისა მთხვევასა ზედა ვჰგალობთ ესრეთ:

 

სიბრძნითა სარწმუნოებისაითა და საქმითა მოღუაწებისაითა დიდებულად შეამკევ რაი ქრისტეის წმიდაი ეკლესიაი, გვიხმობს ქებად ღუაწლისა შენისა და სიწმიდისა, და აჰა, სასანთლედ მრავალმნათობიერად გამოგვიჩნდი რაი მორწმუნეთა, ღმერთშემოსილო, დიდო თეოდოსი, ვითარცა ხატი ღმრთისმოსავობისაი, ვიხარებთ სულითა და ვითხოვთ შენმიერსა შეწევნასა ღმრთისა მიმართ, რაითა გვიხსნნეს სულიერისა და ხორციელისა ვნებულებისაგან, და ღირს გვყოს სასუფეველსა თვისსა.

დედოფალო მარიამ, მოგუხედენ სარწმუნოებითა თაყუანისმცემელთა და სურვილით ამბორის-მყოფელთა, პატიოსანისა ხატისა წმიდისა თეოდოსი დიდისათა, და მადლი მიოველთა დღეთა ცხორებისა ჩუენისათა.

 

შეადგინა: თინათინ მჭედლიშვილმა