მთავარი
ლოცვანი
ფსალმუნნი
ახალი აღთქმა
ძველი აღთქმა
დაუჯდომლები
პარაკლისები
განმარტებები
სხვადასხვა თემები
წიგნის შესახებ
მთავარი
ლოცვანი
ფსალმუნნი
ახალი აღთქმა
ძველი აღთქმა
დაუჯდომლები
პარაკლისები
განმარტებები
სხვადასხვა თემები
წიგნის შესახებ
მღვდელმან: კურთხეულ არს ღმერთი ჩუენი, ყოვლადვე, აწ და მარადის და უკუნითი უკუნისამდე.
მკითხველმან: ამინ. დიდება შენდა, ღმერთო ჩვენო, დიდება შენდა.
მეუფეო ზეცათაო, ნუგეშინისმცემელო, სულო ჭეშმარიტებისაო, რომელი ყოველგან ხარ და ყოველსავე აღავსებ მადლითა შენითა, საუნჯეო კეთილთაო, მომნიჭებელო ცხოვრებისაო, მოვედ და დაემკვიდრე ჩვენს შორის და წმიდა მყვენ ჩვენ ყოვლისაგან ბიწისა და აცხოვნენ, სახიერო, სულნი ჩვენნი.
წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.
უფალო შეგვიწყალენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.
მღვდელმან: რამეთუ შენი არს სუფევაჲ, ძალი და დიდებაჲ აწ და მარადის და უკუნითი უკუნისამდე.
მგალობელთა: ამინ.
უფალო შეგვიწყალენ (12–ჯერ).
უფალო, შეისმინე ლოცვისა ჩემისაი, ყურად-იღე ვედრებაი ჩემი ჭეშმარიტებითა შენითა, შეისმინე ჩემი სიმართლითა შენითა; და ნუ შეხუალ საშჯელსა მონისა შენისა თანა, რამეთუ არა განმართლდეს შენ წინაშე ყოველი ცხოველი, რამეთუ დევნა მტერმან სული ჩემი და დაამდაბლა ქუეყანად ცხორებაი ჩემი, დამსუა მე ბნელსა შინა, ვითარცა მკუდარი საუკუნოი. და მოეწყინა ჩემთანა სულსა ჩემსა, და ჩემ შორის შემიძრწუნდა გული ჩემი. მოვიხსენე დღეთა პირველთაი, და ვიწურთიდ ყოველთა მიმართ საქმეთა შენთა და ქმნულსა ხელთა შენთასა ვზრახევდ. განვიპყრენ შენდამი ხელნი ჩემნი, და სული ჩემი, ვითარცა ქუეყანაი ურწყული შენდამი. მსთუად შეისმინე ჩემი, უფალო, რამეთუ მოაკლდა სულსა ჩემსა; ნუ გარე-მიიქცევ პირსა შენსა ჩემგან, და ვემსგავსო მათ, რომელნი შთავლენან მღვიმესა. მასმინე მე განთიად წყალობაი შენი, რამეთუ მე შენ გესავ; მაუწყე მე, უფალო, გზაი, რომელსაცა ვიდოდი, რამეთუ შენდამი აღვიღე სული ჩემი. მიხსენ მე მტერთა ჩემთაგან, უფალო, რამეთუ შენ შეგევედრე. მასწავე მე, რაითა ვყო ნებაი შენი, რამეთუ შენ ხარ ღმერთი ჩემი; სული შენი სახიერი მიძღოდეს მე ქუეყანასა წრფელსა. სახელისა შენისათვის, უფალო, მაცხოვნო მე და სიმართლითა შენითა გამოიყვანო ჭირისაგან სული ჩემი. და წყალობითა შენითა მოსრნე მტერნი ჩემნი და წარსწყმიდნე ყოველნი მაჭირვებელნი სულისა ჩემისანი, რამეთუ მე მონაი შენი ვარ.
რომელი დაემოწაფე სიტყუასა პავლესსა, უბიწოო, და დაემტკიცე სარწმუნოებასა ზედა პეტრესსა, ღმრთივ-წოდებულო, პირველ მოწამე იქმენ, და პირველ მოღვაწე შორის დედათა, აღხედ ცეცხლსა ზედა, და არა შეგეხო ალი მისი, მხეცნი და კურონი შენგან შეძრწუნდეს, სასწაულითა ჯუარისაითა. ქრისტესა ევედრე ყოვლად ქებულო, რაითა აცხოვნნეს სულნი ჩუენნი.
დიდება მამასა და ძესა და წმიდასა სულსა.
რომელი დაემოწაფე სიტყუასა პავლესსა, უბიწოო, და დაემტკიცე სარწმუნოებასა ზედა პეტრესსა, ღმრთივ-წოდებულო, პირველ მოწამე იქმენ, და პირველ მოღვაწე შორის დედათა, აღხედ ცეცხლსა ზედა, და არა შეგეხო ალი მისი, მხეცნი და კურონი შენგან შეძრწუნდეს, სასწაულითა ჯუარისაითა. ქრისტესა ევედრე ყოვლად ქებულო, რაითა აცხოვნნეს სულნი ჩუენნი.
აწ და მარადის და უკუნითი უკუნისამდე, ამინ.
არასადა დავსდუმნეთ, ღმრთსმშობელო, ძლიერებათა შენთა ქებად, უღირსნი ესე მონანი შენნი. რამეთუ არათუმცა შენ გვფარევდი ოხითა შენითა, ვინმცა სადა გვიხსნნა ჩუენ ესოდენთა ჭირთაგან; ანუ ვინმცა დაგვიცვნა ჩუენ აქამომდე ფლობილად? არასადა განგეშორნეთ ჩუენ, დედუფალო კურთხეულო, რამეთუ შენ იხსნი სულთა ჩუენთა ყოველთა განსაცდელთაგან.
ფსალმუნი 50
1. მიწყალე მე, ღმერთო, დიდითა წყალობითა შენითა და მრავლითა მოწყალებითა შენითა ახოცე უშჯულოებაი ჩემი.
2. უფროის განმბანე მე უშჯულოებისა ჩემისაგან და ცოდვათა ჩემთაგან განმწმიდე მე.
3. რამეთუ უშჯულოებაი ჩემი მე უწყი, და ცოდვაი ჩემი წინაშე ჩემსა არს მარადის.
4. შენ მხოლოსა შეგცოდე და ბოროტი შენ წინაშე ვყავ; რაითა განმართლდე სიტყუათაგან შენთა და სძლო შჯასა შენსა.
5. რამეთუ ესერა უშჯულოებათა შინა მიუდგა და ცოდვათა შინა მშვა მე დედამან ჩემმან.
6. რამეთუ ესერა ჭეშმარიტებაი შეიყუარე, უჩინონი და დაფარულნი სიბრძნისა შენისანი გამომიცხადენ მე.
7. მასხურო მე უსუპითა და განვწმიდნე მე, განმბანო მე და უფროის თოვლისა განვსპეტაკნე.
8. მასმინო მე გალობაი და სიხარული, და იხარებდენ ძუალნი დამდაბლებულნი.
9. გარე-მიაქციე პირი შენი ცოდვათა ჩემთაგან და ყოველნი უშჯულოებანი ჩემნი ახოცენ.
10. გული წმიდაი დაჰბადე ჩემ თანა, ღმერთო, და სული წრფელი განმიახლე გუამსა ჩემსა.
11. ნუ განმაგდებ მე პირისა შენისაგან და სულსა წმიდასა შენსა ნუ მიმიღებ ჩემგან.
12. მომეც მე სიხარული მაცხოვარებისა შენისაი და სულითა მთავრობისათა დამამტკიცე მე.
13. ვასწავლნე უშჯულოთა გზანი შენნი და უღმრთონი შენდა მოიქცენ.
14. მიხსენ მე სისხლთაგან, ღმერთო, ღმერთო ცხორებისა ჩემისაო, იხარებდეს ენაი ჩემი სიმართლესა შენსა.
15. უფალო, ბაგენი ჩემნი აღახუნე, და პირი ჩემი უთხრობდეს ქებულებასა შენსა.
16. რამეთუ უკეთუმცა გენება, მსხუერპლი შე-მცა-მეწირა, არამედ საკუერთხი არა გთნდეს.
17. მსხუერპლი ღმრთისა არს სული შემუსრვილი, გული შემუსრვილი და დამდაბლებული ღმერთმან არა შეურაცხ-ჰყოს.
18. კეთილი უყავ, უფალო, ნებითა შენითა სიონსა და აღეშენნენ ზღუდენი იერუსალემისანი.
19. მაშინ გთნდეს მსხუერპლი სიმართლისაი, შესაწირავი და ყოვლად-დასაწუელი; მაშინ შეიწირნენ საკურთხეველსა შენსა ზედა ზუარაკნი.
გალობაი 1, უგალობდითსა
ძლისპირი: უგალობდეთ უფალსა, რომელმან განიყვანა ერი თვისი ზღუასა მას მეწამულსა, მას მხოლოსა, რომელიცა დიდებულ არს.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
შეიწირე გალობაი ესე შენდა აღვლენილი, პირველმოწამეო თეკლა, და გვითხოე ქრისტეს სარწმუნოებასა შინა განმტკიცებაი.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
სიტყუათა შენთა მიერ, სულიერთა, ყოვლად სანატრელო პავლე, ხარებულ იქმნა თეკლა ქალწული და დაეწინდა ქრისტესა.
დიდებაი მამასა და ძესა და წმიდასა სულსა
მოუძლურდა ზუაობაი მძლავრისა ამპარტავანისაი, რამეთუ იძლია თეკლას მიერ, ძალითა ქრისტეს სარწმუნოებისათა.
აწ და მარადის და უკუნითი უკუნისამდე, ამინ.
ტევანი ეგე ცხორებაშემოსილი, რომელი აღმოუდინებ ყოველსა სოფელსა სიტკბოებასა ცხორებისასა, გშუა ქალწულმან, ქრისტე.
გალობა 3, განძლიერდასა
ძლისპირი: შენ ხარ დამამტკიცებელი მვედრებელთა შენთაი, ქრისტე, შენ ხარ ნათელი დაბნელებულთაი და გადიდებს სული ჩემი.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
ჰოი, სიყუარული უაღრესი ბუნებათაი, ყოვლად პატიოსანო თეკლა, რომლითა შეკრულ-იქმენ პავლეს მიერ ქრისტესთვის.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
ვერ შემძლებელ-იქმნა მიდრეკად გონებისა შენისა, წმიდაო მოწამეო, საშუებელი ქუეყანისაი და სამკაული სძლობისაი.
დიდებაი მამასა და ძესა და წმიდასა სულსა
უზესთაეს იქმენი, ვნებათა ხორციელთა, ნეტარო თეკლა, რამეთუ ლიქნამან დედისა შენისამან ვერცაღა მოგაუძლურა.
აწ და მარადის და უკუნითი უკუნისამდე, ამინ.
აღმართებაი იქმენ შენ პირველისა დედისა ევაისი, რომელმან უშევ სოფელსა დასაბამი ცხორებისა ღმრთისმშობელი.
გვიხსენ განსაცდელთაგან მონანი შენნი, ყოვლადწმიდაო ღმრთისმშობელო ქალწულო, რამეთუ ჩვენ ყოველნი, შემდგომად ღმრთისა, შენდა მოვილტვით, ვითარცა უძლეველისა ზღუდისა და შუამდგომელისა.
მოიხილე ჩუენ ზედა, ყოვლადქებულო ღმრთისმშობელო, და ხორცთა ჩუენთა წყლულებანი ბოროტნი განჰკურნენ, და სულისა ჩუენისა სნეულებანი.
მრჩობლი კვერექსი
დიაკონმან: შეგჳწყალენ ჩვენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით ღმრთივ–დაცულისა ერისა ჩუენისა და მეუფებისა მისისათჳს (მთავრობისა და მხედრობისა) მისისათჳს.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით უწმიდესისა და უნეტარესისა, სრულიად საქართველოს კათოლიკოს–პატრიარქისა და მცეთა–თბილისის მთავარეპისკოპოსისა და ბიჭვინთისა და ცხუმ–აფხაზეთის მიტროპოლიტისა, დიდისა მეუფისა, მამისა ჩუენისა ილიასათჳს, და ყოვლადუსამღვდელოესისა... (აქა მოიხსენეთ ადგილობრიბი მღვდელმთავარი), და ყოველთა ქრისტეს მიერ ძმათა ჩუენთათვის.
მგალობელთა: უფალო, შეგჳწყალენ (3-გზის).
დიაკონმან: მერმეცა ვევედრნეთ უფალსა ღმერთსა ჩუენსა, რაითა შეიწყალნეს... (აქა მოიხსენეთ სახელდებით ისინი, ვისთვისაც ევედრებით ღმერთს).
მგალობელთა: უფალო, შეგჳწყალენ (3-გზის).
დიაკონმან: განამრავლე, უფალო, ჟამნი და წელნი ცხოვრებისა მათისანი, და იხსნენ იგინი, უფალო, ყოვლისაგან ჭირისა, რისხვისა და იწროებისა, და ყოვლისაგან წყლულებისა სულისა და ხორცთასა, და მიუტევენ მათ ყოველნი შეცოდებანი მათნი, ნებსითნი და უნებლიეთნი.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით ყოველთა ძმათა და ყოველთა ქრისტიანეთათჳს.
მგალობელთა: უფალო, შეგჳწყალენ (3-გზის).
მღვდელმან: რამეთუ მოწყალე და კაცთმოყვარე ღმერთი ხარ, და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის და უკუნითი უკუნისამდე.
მგალობელთა: ამინ.
კვერექსის ნაცვლად ერისკაცი იტყვის – უფალო, შეგვიწყალენ 40-გზის. დიდებაი… აწდა…
წარდგომა, ხმაი 8
სათნოებათა მიერ მდედრობაი სიმხნედ შესცვალე სურვილითა უკუე ქრისტესითა, და ვითარცა მნათობი ჰნათობ მრჩობლად სოფელსა, აღმომაბრწყინვებელი შარავანდედთა სულისათა, პირველმოწამეო, ყოვლად ქებულო თეკლა, ევედრე ქრისტესა ღმერთსა ცოდვათა მოტევებისა მონიჭებად სურვილით პატივისმცემელთა ხსენებისა შენისათა.
გალობა 4, მესმასა
ძლისპირი: მესმა, უფალო, განგებაი საიდუმლოთა შენთა გამოუთქუმელთაი, განვიცადენ საქმენი შენნი და აღვიარე მე ღმრთეებაი შენი.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
დაწინდებულ-იყავ, თეკლა, თამვირისა მიერ, და ვითარცა ქალწული უბიწოი, მოციქულმან პავლე მიგათხოვა შენ ზეცისა სიძესა.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
სრულ იქმენ ტრფიალებითა სარწმუნოებისაითა პავლეს სიტყვითა და სიტყუანი თამვირისანი, ვითარცა ამაონი შეურაცხ-ყვენ.
დიდებაი მამასა და ძესა და წმიდასა სულსა
სიწმიდისმოყუარე იყავ და მოძულე გემოთა ქუეყანისათა მონაგებთა, და მეოტ-ექმენ ნათესავთა და დაწინდებულსა.
აწ და მარადის და უკუნითი უკუნისამდე, ამინ.
ღმრთისმშობლად გიცნობთ შენ, ყოვლადწმიდაო, ყოველნი, რომელნიცა ესე გავნათლდით, რამეთუ მზე სიმართლისაი ჰშევ მარადის, ქალწულო.
გალობა 5, ღამითგანსა
ძლისპირი: აღმსთობილნი შენ გიგალობთ, უფალო, გუაცხოვნენ ჩუენ, ვითარცა სახიერ, რამეთუ სხუაი ღმერთი არა ვიცით.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
მოიღვაწე ღუაწლი ძლიერი, თეკლა სანატრელო, და სიხარულითა ღირს იქმენ მოსაგებელსა.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
წარიტყვენა ვეშაპი, ამპარტავანი უკეთურებითა, და ქალწულმან ისწავა მორჩილებაი ქრისტეს ვნებათაი.
დიდებაი მამასა და ძესა და წმიდასა სულსა
პავლე კრულისა მიერ შეიკარ საკრველითა სიყუარულისაითა, თეკლა, და აღვსებულ-იყავ შენ სარწმუნოებითა.
აწ და მარადის და უკუნითი უკუნისამდე, ამინ.
მარიამ ღმრთისმშობელო, უსძლოო, ამაო-ჰყვენ სასოებანი მტერთანი და მგალობელნი შენნი მხიარულ-ჰყვენ.
გალობა 6, ღაღადყავსა
ძლისპირი: ვედრებასა ჩემსა განვჰფენ უფლისა მიმართ და მას აღუვარებ ბრალთა ჩემთა მარადის, რამეთუ ბოროტითა აივსო სული ჩემი და სიმტკიცე ჩემი ჯოჯოხეთად მიიწია და იონაისებრ ვღაღადებ: აღმომიყვანე მე, ღმერთო ჩემო.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
უძლური იგი ბუნებაი დედობრივი, ძალითა მხსნელისაითა განძლიერდა და სამკაული სძლობისაი განიძარცვა რაი სიყუარულისათვის ქრისტეს ღმრთისა, მირბიოდა წმიდაი თეკლა მოძღურისა თვისისა პავლესად.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
სულითა შეიტკბნე კრულებანი სულიერისა მოძღურისანი საპყრობილესა შინა, და ირწყვებოდი შენ სიტყვითა მისითა საღმრთოითა ნერგისაებრ სამოთხისა და მოართვი ნაყოფი ღმრთისა, მეოხ გვეყავ წინაშე მისა, რაითა გვიხსნნეს ყოვლისაგან საცთურისა.
დიდებაი მამასა და ძესა და წმიდასა სულსა
ნებსით თვისით შესცვალე რაი სასძლოი იგი სარეცელი საპყრობილედ, ევედრებოდი უფალსა განძლიერებასა წინა-აღმდგომთა მისთა მიმართ და ეშმაკისა, აწ გულსაცა შინა ჩუენსა აღანთე საღმრთოი ცეცხლი მოშურნეობისაი და გვიხსენ ჭირთაგან.
აწ და მარადის და უკუნითი უკუნისამდე, ამინ.
ვითარცა რაი ვარდი, და ვითარცა უწმიდესი შროშანი, ვითარცა სუნნელი სუნნელთაი, ყრმააო, შემოქმედმან შუენიერთაგან ღელეთა სოფლისათა გამოგირჩია შენ, და დაემკვიდრა წიაღსა შინა შენსა, და იშუა, და კეთილ-სუნნელებითა ყოველნი აღავსნა.
გვიხსენ განსაცდელთაგან მონანი შენნი, ყოვლადწმიდაო ღმრთისმშობელო ქალწულო, რამეთუ ჩვენ ყოველნი, შემდგომად ღმრთისა, შენდა მოვილტვით, ვითარცა უძლეველისა ზღუდისა და შუამდგომელისა.
მოიხილე ჩუენ ზედა, ყოვლადქებულო ღმრთისმშობელო, და ხორცთა ჩუენთა წყლულებანი ბოროტნი განჰკურნენ, და სულისა ჩუენისა სნეულებანი.
კვერექსის ნაცვლად ერისკაცი იტყვის: – უფალო, შეგვიწყალენ 12-გზის. დიდებაი… აწდა…
კონდაკი, ხმაი 8
ქალწულებისა სიკეთითა განბრწყინდი, და წამებისა გვირგვინითა შეიმკუე, და მოციქულებაი გერწმუნა, ქალწულო, ვითარცა დიდებულსა პავლეს, და ცეცხლისა ალი ცვარად გარდააქციე, და კუროსა გულის-წყრომაი ლოცვითა შენითა დააცხრუე, ვითარცა პირველ მოწამემან.
სხუაი კონდაკი. ხმაი 2
გულისა შენისა ქრისტეს სიყუარულითა მომწყლველმან დამწინდველი იგი ჟამიერი მოიძაგე, ვითარცა არად შესარაცხი და ჯუარცმული ქრისტე გაქუნდა რაი, ვითარცა ზეციერი სიძე შენი, ცეცხლსაცა შინა კადნიერად შესრულმან, პირნი დაუხშე მხეცთაცა და მათგან განრინებული კუალად პავლესა ეძიებდი გულსმოდგინებითა, პირველმოწამეო თეკლა.
დიაკონმან: სიბრძნით. მოხედენ.
მღდელმან: მშვიდობა ყოველთა.
მგალობელთა: და სულისაცა შენისა თანა.
დიაკონმან: წარდგომა ფსალმუნისაგან დავითისა, ხმაი 4: საკვირველ არს ღმერთი წმიდათა შორის მისთა, ღმერთი ისრაელისა.
მგალობელთა: საკვირველ არს ღმერთი წმიდათა შორის მისთა, ღმერთი ისრაელისა.
დიაკონმან: უგალობდით უფალსა გალობითა ახლითა, ქება მისი ეკლესიასა შინა წმიდათასა.
მგალობელთა: საკვირველ არს ღმერთი წმიდათა შორის მისთა, ღმერთი ისრაელისა.
დიაკონმან: საკვირველ არს ღმერთი წმიდათა შორის მისთა,
მგალობელთა: ღმერთი ისრაელისა.
დიაკონმან: სიბრძნით.
მღდელმან: უფლისა მიმართ ვილოცოთ.
მგალობელთა: უფალო, შეგჳწყალენ!
მღდელმან: რამეთუ წმიდა ხარ შენ, ღმერთო ჩუენო, და რომელი წმიდათა შორის განისუენებ, და შენდა დიდებასა აღვავლენთ, მამისა, და ძისა და წმიდისა სულისა, აწ და მარადის, და უკუნითი უკუნისამდე,
მგალობელთა: ამინ.
დიაკონმან: ყოველი სული აქებდით უფალსა.
გუნდი: ყოველი სული აქებდით უფალსა.
დიაკონმან: აქებდით ღმერთსა წმიდათა შორის მისთა, აქებდით მას სამყაროთა ძალისა მისისათა.
გუნდი: ყოველი სული აქებდით უფალსა.
დიაკონმან: ყოველი სული
გუნდი: აქებდით უფალსა.
დიაკონმან: ღირსყოფად ჩუენდა სმენად წმიდისა სახარებისა უფალსა ღმერთსა ჩუენსა ვევედრნეთ.
მგალობელთა: უფალო, შეგჳწყალენ (3-გზის).
დიაკონმან: სიბრძნით აღემართენით და ისმინეთ წმიდა სახარება.
მღვდელმან: მშჳდობაჲ ყოველთა.
მგალობელთა: და სულისაცა შენისა თანა.
დიაკონმან: მათესაგან წმიდისა სახარებისა საკითხავი.
მგალობელთა: დიდებაჲ შენდა, უფალო, დიდებაჲ შენდა.
დიაკონმან: მოხედენ.
სახარება მათესი
თქუა უფალმან იგავი ესე: ემსგავსოს სასუფეველი ცათაი ათთა ქალწულთა, რომელთა აღიხუნეს ლამპარნი თვისნი და განვიდეს მიგებებად სიძისა. ხოლო ხუთნი მათგანნი იყვნეს ბრძენნი და ხუთნი – სულელნი. მიიხუნეს სულელთა მათ ლამპარნი მათნი და არა მიიღეს მათ თანა ზეთი. ხოლო ბრძენთა მათ მიიღეს მათ თანა ზეთი ჭურჭელთა მათთა ლამპართა მათთა თანა. და დაყოვნებასა მას სიძისასა მიერულა ყოველთა და დაიძინეს. ხოლო შუვა-ღამეს ოდენ ღაღადებაი იყო, ვითარმედ: აჰა ესერა სიძე მოვალს, გამოვედით მიგებებად მისა. მაშინ აღდგეს ყოველნი იგი ქალწულნი და აღიგნეს ლამპარნი მათნი. ხოლო სულელნი იგი ეტყოდეს ბრძენთა მათ: მეცით ჩუენ ზეთისაგან თქუენისა, რამეთუ ლამპარნი ჩუენნი დაშრტებიან. მიუგეს ბრძენთა მათ და ჰრქუეს: ნუუკუე ვერ კმა-გუეყოს ჩუენ და თქუენ, არამედ უფროისღა წარვედით სავაჭროდ და იყიდეთ თავისა თქუენისა. და ვითარცა წარვიდეს იგინი სყიდად, მოვიდა სიძე იგი, და განმზადებულნი იგი შევიდეს სიძისა თანა ქორწილსა მას, და დაეხშა კარი. შემდგომად მათსა მოვიდეს სხუანიცა იგი ქალწულნი და იტყოდეს: უფალო, უფალო, განგ?ღე ჩუენ! ხოლო მან მიუგო და ჰრქუა მათ: ამენ გეტყვი თქუენ: არა გიცნი თქუენ. იღვიძებდით უკუე, რამეთუ არა იცით დღე იგი, არცა ჟამი, რომელსა შინა ძე კაცისაი მოვიდეს.
მგალობელთა: დიდებაჲ შენდა, უფალო, დიდებაჲ შენდა.
მკითხველმან: დიდება მამასა და ძესა და წმიდასა სულსა.
მეოხებითა ყოვლად ქებულისა დიდ-მოწამისა თეკლაისითა, მოწყალეო, აღხოცენ ცოდვათა ჩუენთა სიმრავლენი.
აწ და მარადის და უკუნითი უკუნისამდე, ამინ.
მეოხებითა წმიდისა ღმრთისმშობელისათა, მოწყალეო, აღხოცენ ცოდვათა ჩემთა სიმრავლენი.
მიწყალე მე, ღმერთო, დიდითა წყალობითა შენითა, და მრავლითა მოწყალებითა შენითა აღხოცენ უსჯულოებაჲ ჩემი და შემიწყალე მე, ღმერთო.
გერი: დედათა დიდებაო და წინამძღუარო მოღუაწეთაო, რომელმან განუღე ყოველთა წამებისა გზაი, მოციქულთა სწორო თეკლა, და პირველ-მოღუაწეო ყოვლად ქებულო, ევედრე ქრისტესა ღმერთსა, რაითა განკურნოს სულთა ჩუენთა წყლულებანი და მოსცეს სოფელსა მშვიდობაი, ხოლო ერსა ჩუენსა მოანიჭოს ძლევაი მტერთა მიმართ და მშვიდობაი ეკკლესიათაი, ვედრებითა შენითა ჩუენთვის, სძალო ღმრთისაო.
ლოცვა მღვდლისა მიერ სათქუმელი
აცხოვნე, ღმერთო, ერი შენი, და აკურთხე სამკვიდრებელი შენი, მოხედენ სოფელსა შენსა წყალობითა და მოწყალებითა, აღამაღლე რქაი ქრისტეანეთა მართლმადიდებელთაი, და გარდამოავლინენ ჩუენ ზედა მდიდარნი წყალობანი შენნი, მეოხებითა ყოვლადწმიდისა დედოფლისა ჩუენისა ღმრთისმშობელისა, და მარადის ქალწულისა მარიამისაითა; ძლიერებითა პატიოსნისა და ცხოველსმყოფელისა ჯუარისაითა; მეოხებითა პატიოსანთა უხორცოთა ზეცისა ძალთაითა; პატიოსნისა, დიდებულისა, წინაისწარმეტყუელისა, წინამორბედისა და ნათლისმცემელისა იოვანეისითა, წმიდისა დიდისა წინაისწარმეტყუელისა ელია თეზბიტელისა და მართლისა ენუქისითა; წმიდათა დიდებულთა, და ყოვლად–ქებულთა მოციქულთა თავთა, პეტრეისა და პავლეისითა; წმიდისა მოციქულისა თომასი და საქართველოს განმანათლებელთა მოციქულთა: ანდრია პირველწოდებულისა, სვიმონ კანანელისა, ბართლომესი, თადეოზისა და მატათაისითა; ღირსისა დედისა ჩუენისა, მოციქულთა სწორისა ქალწულისა ნინო ქართველთ განმანათლებელისა და წმიდათა მოციქულთა სწორთა: მეფისა მირიანისა და დედოფლისა ნანაისითა; წმიდათა შორის მამათა ჩუენთა, და მსოფლიოთა დიდთა მოძღუართა და მღდელმთავართა: ბასილი დიდისა, გრიგოლი ღმრთისმეტყუელისა, და იოვანე ოქროპირისაითა; წმიდათა შორის მამისა ჩუენისა ნიკოლოზ მირონ–ლუკიის მთავარეპისკოპოსისა და საკვირველთმოქმედისაითა; წმიდისა დიდებულისა და ღუაწლისა–მძლისა მოწამისა, ძლევა–შემოსილისა გიორგისა და წმიდათა დიდთა ქალწულ–მოწამეთა ბარბარეისა და მარინეისითა; წმიდათა მამამთავართა ჩუენთა: პეტრე, სამუელ, სარმიან, მამაი, არსენ, მელქისედეკ, იოანე–ოქროპირ, ნიკოლოზ, ევდიმოზ, იოსებ, კირიონ, და ამბროსისაითა; ღირსისა მამისა ჩუენისა იოვანე ზედაზნელისა და ათორმეტთა მისთა მოწაფეთა, მეორედ განმანათლებელთა საქართველოს ეკლესიისა და მარადის მფარველთა მისთა და წმიდისა მღდელმოწამისა ნეოფიტე ურბნელისაითა; ღმრთივ–განბრძნობილთა ნეტართა მამათა ჩუენთა: ილარიონ ქართველისა, სერაპიონ ზარზმელისა, გრიგოლ ხანძთელისა და საბა იშხნელისაითა; ღირსთა მამათა ჩუენთა ათონელთა: იოვანე და გაბრიელ ქართველთა, იოვანე თორნიკ–ყოფილისა და ეფთვიმე და გიორგი მთაწმინდელთაითა; წმიდათა დიდებულთა და ღუაწლისა–მძლეთა მოწამეთა ჩუენთა: რაჟდენისა, ევსტათი მცხეთელისა, ჰაბო ტფილელისა, მიქაელ–გობრონისა, თევდორე მღდლისა, ქრისტეფორე გურულისა, ნიკოლოზ დვალისა, კოზმანისა, არგვეთისა მთავართა დავით და კონსტანტინეისა და კონსტანტინე მთავრისაითა; წმიდისა მთავარ–მოწამისა ბიძინასა და წმიდათა დიდებულთა მოწამეთა: შალვა და ელიზბარ ქსნის ერისთავთაითა; წმიდისა მოწამისა შალვა ახალციხელისა და წმიდათა ათთა–ბევრთა მოწამეთა, ტფილისს ხუარაზმელთაგან მოწყუედილთაითა; წმიდათა მოწამეთა ექვსი ათასთა გარეჯელთა ბერთა და მრავალთა წმინდათა მამათა და დედათა, აჭარაში თურქთაგან წამებულთაითა; წმიდათა ღუაწლისამძლეთა მეფეთა და დედოფალთა: მირდატ, აშოტ, არჩილ, დემეტრე, ლუარსაბ, შუშანიკ და ქეთევანისაითა და წმიდათა კეთილ–მორწმუნეთა და დიდთა მეფეთა ჩუენთა: ვახტანგ გორგასალისა, დავით აღმაშენებელისა, დემეტრე–დამიანეისა, თამარისა და სოლომონისაითა; წმიდისა ილია მართლისა, ექვთიმე ღმრთისკაცისა და ექვთიმე აღმსაარებლისაითა; წმიდათა აღმსარებელთა მამათა ჩუენთა, იოვანეისი და გიორგი–იოანე ბეთანიელთა და ღირსისა მამისა ჩუენისა არქიმანდრიტისა გაბრიელისა, აღმსაარებელისა და სალოსისაითა; წმიდათა და მართალთა მშობელთა ღმრთისაითა იოაკიმ და ანნაისითა (და წმიდისა სახელი, რომლისა არს ტაძარი და დღის წმიდანი მოიხსენიოს), და წმიდისა დიდისა მღდელმთავრისა, შანხაისა და სან–ფრანცისკოს მთავარეპისკოპოსისა იოანესი, განმანათლებლისა და საკვირველმოქმედისაითა, და ყოველთა წმიდათა შენთაითა გევედრებით შენ, მრავალ–მოწყალეო ღმერთო, შეისმინე ჩუენ ცოდვილთა ვედრებაი, და შეგვიწყალენ ჩუენ.
მგალობელთა: უფალო, შეგჳწყალენ (12-გზის).
მღდელმან: წყალობითა და მოწყალებითა და კაცთმოყუარებითა მხოლოდშობილისა ძისა შენისაჲთა, რომლისა თანა კურთხეულ ხარ, თანა ყოვლადწმიდით, სახიერით, და ცხოველსმყოფელით სულით შენითურთ, აწ და მარადის და უკუნითი უკუნისამდე.
მგალობელთა: ამინ.
გალობა 7, კურთხეულარსა
ძლისპირი: ქუეყანით იუდაისით ბაბილონს წარიტყუენნეს მძლავრისა მიერ ყრმანი, სულითა შემოსილთა ცეცხლი სახუმილისაი მის განაქარვეს და იტყოდეს: მამათა ჩუენთა ღმერთო, კურთხეულ ხარ მარადის.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
წარსდეგ შენ პავლეს თანა, წინაშე მსაჯულისა, თეკლა ღმერთშემოსილო, და სთქუ განკვირვებასა შინა: სირცხვილი უჯერო განმიგდიეს და ვიტყვი: მამათა ჩუენთა ღმერთო, კურთხეულ-ხარ მარადის.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
შესთხიე თავი შენი სახუმილსა შინა, პირველ-მოწამეო თეკლა, ნებსით სიყუარულისათვის მხსნელისა, და არა დაიწუ და ღაღადებდ: მამათა ჩუენთა ღმერთო, კურთხეულ-ხარ მარადის.
დიდებაი მამასა და ძესა და წმიდასა სულსა
ღრუბელმან აღვსებულმან წვიმითა და სეტყვითა განაბნია სახუმილი და შეწუნა უსჯულონი, ხოლო შენ დაგიცვა, ვითარცა მოწამე თვისი და იტყოდი: მამათა ჩუენთა ღმერთო, კურთხეულ-ხარ მარადის.
აწ და მარადის და უკუნითი უკუნისამდე, ამინ.
კუერთხ-იქმენ ძირისაგან იესესა, ქალწულო ყოვლად სანატრელო, ცხორებისა ნაყოფისა ყვავილ-მქონებელი, სარწმუნოებით მგალობელთა ძისა მიმართ შენისა, მამათა ჩუენთა ღმერთო, კურთხეულ ხარ შენ.
გალობა 8, აკურთხევდითსა
ძლისპირი: მეუფესა ცათასა, რომელსა ჰმსახურებენ გუნდნი ანგელოზთანი უგალობენ და ამაღლებენ მას უკუნისამდე.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
ქრისტეს ცხორებისა მომცემელსა, სიძესა მას ზეცისასა, სძალ ექმენ, წმიდაო, და მხეცთაგან მძვინვარეთა დაგიცვა უვნებელად.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
აღხვედ რაი მთასა მას კალამონსა, მუნცა პოვე კლდე, რომელსა შინა დაყავ მრავალნი წელნი მარხვითა და ლოცვითა.
დიდებაი მამასა და ძესა და წმიდასა სულსა
იქმენ რაი მკურნალი ხელოვანი საღმრთოითა ძალითა, მრავალთა დედათა აღძრვიდი მოსავ-ყოფად ტკბილისა მაცხოვარისა.
აწ და მარადის და უკუნითი უკუნისამდე, ამინ
მიუწდომელი ღმრთეებითა დამბადებელი და მხსნელი ჩუენი სიტყუაი ღმრთისაი შევ, ზეცისა სძალო, ამისთვის ყოველნი გადიდებთ.
გალობა 9, ადიდებდითსა
ძლისპირი: შენ, რომელი უქორწინებელ ხარ, დედაო უსძლოო, შენ, რომელმან უზესთაეს ბუნებათა შევ დაუსაბამოი, რომელ არს შემოქმედი, ღმერთი ჭეშმარიტი, გალობითა დაუდუმებელითა გადიდებთ.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
ღრმასა მას მხცოვანებასა მიღწეული, ვითარცა უხორცოი ცხოვნდებოდი რაი ქუეყანასა ზედა, შურითა საეშმაკოითა აღიძრნეს მოგუნი და ბილწნი ჭაბუკნი მოავლინეს შენდა.
წმიდაო, პირველ-მოწამეო და მოციქულთასწორო დედაო თეკლა, ევედრე ღმერთსა ჩუენთვის.
უწყოდი რაი მიზეზი მისლვისა მათისაი, ღაღადყავ სასოებითა: `ყოვლისამპყრობელო უფალო, რომელმან ცეცხლისაგან და მხეცთა განმარინე, აწ მიხსენ მე უსჯულოთაგან და ნუ უტევებ გინებად ქალწულებისა ჩემისა, რომელი დავიცევ სახელისათვის შენისა~.
დიდებაი მამასა და ძესა და წმიდასა სულსა
შეჰვედრე რაი სული შენი იესუს, ძესა ღმრთისასა, კლდე განუღებელი ბრძანებითა ღმრთისათა განიპო, და მლტოლვარე ეგე ქალწული შეგიწყნარა რაი წიაღთა თვისთა, დაიცვა ქალწულებაი შენი და შეგრთო დასსა მას წმიდათასა.
აწ და მარადის და უკუნითი უკუნისამდე, ამინ.
შენ ყოვლად დიდებულსა და ყოვლად წმიდასა ღმრთისმშობელსა ყოველნი მორწმუნენი გადიდებთ დაუდუმებელითა ბაგითა და გიგალობთ, ვითარცა მშობელსა ყოველთა უფლისასა ცხორებად მგალობელთა შენთა.
მგალობელთა: ღირს-არს ჭეშმარიტად, რათა გადიდებდეთ, შენ ღვთისმშობელო, რომელი მარადის სანატრელ იქმენ, ყოვლად-უბიწოდ და დედად ღვთისა ჩვენისა. უპატიოსნესსა ქერუბინთასა, და აღმატებით უზესთაესსა სერაბინთასა, განუხრწნელად მშობელსა სიტყვისა ღვთისასა, მხოლოსა ღვთისმშობელსა გალობით გადიდებდეთ. ("ღირს - არს" - ის ნაცვლად საკითხავი საგალობლები)
მღვდელმან აკმიოს.
მკითხველმან: მწყობრნი განეწყვენით, მარტვილთმოყუარენო, რამეთუ ღუაწლთა წარმოდგა ჟამი და პირველ-მოწამისა წლითი წლად ხსენებაი ყოველთა მოგვიწოდს დიდებისმეტყველებად ღმრთისა, რამეთუ თეკლა – დედათა შორის მოღუაწებრივისა სტადიონისა განმღებელი, პირველ გვირგვინ-შემოსილად გამოსჩნდების, და ითხოვს ღმრთისა მიერ მოსავთა თვისთათვის მოტევებასა ცოდვათასა.
არა ხოლო თუ კაცთა დაუკვირდა სიმხნე შენი, ჰოი, შუენიერო სძალო ღმრთისაო, არამედ ანგელოზნიცა განკვირდეს, რამეთუ მძვინვარებაი მხეცთაი მოამდოვრე და დაშრიტე რაი სახუმილი ცეცხლისაი, ზახებაი მძლავრთაი განაქარვე და სატანჯველთა მრავალფერთა სიმწარე საცინელ ქმენ ძალითა ქრისტეს ღმრთისაითა, მას ევედრე აწ, თეკლა სანატრელო, რაითა გვიხსნნეს წარწყმედისაგან სულთა განმხრწნელისა, და ღირს გვყოს მკვიდრ ყოფად შენ თანა სასუფეველსა.
უბიწოი ეგე ტარიგი ქრისტესი განემზადებოდი რაი დაკლვად ჩუენთვის დაკლულისათვის, ჰოი, პირველ-მოწამეო ქალწულო თეკლა, მძლავრნი დაამხუე სარწმუნოებითა და მოდასე იქმენ რაი ანგელოზთა, აწცა გაქუს კადნიერებაი წინაშე ღმრთისა, რაითა მოგვანიჭოს სიმხნე სულისაი და სიწმიდე გულისაი, და განგვარინოს სიცბილსა ეშმაკისასა.
ჰოი, შუენიერო ქალწულო თეკლა, რომელმან შეჰვედრე საღმრთოსა მას ძალსა თავი შენი, სამართლად მის მიერ განძლიერებულ იქმენ, და ზესთა ექმენ რაი ყოველთა ტანჯუათა, მოღუაწებაი შენი უძლეველი სრულ-ყავ კეთილად, და წარსდეგ რაი წინაშე სამებისა წმიდისა საყდრისა, აწ გვიმეოხე წინაშე მისა, რაითა მოგუმადლოს ჩუენ შენდობაი ცოდვათაი და ამაო-ჰყოს ყოველნი საფრხენი უხილავისა და ხილულისა მტერისა.
ყოველსავე სიხარულითა მიითუალევდი რაი ქრისტესთვის, წმიდაო, სოფელსა განეშორე და ღირს იქმენ პოვნად ზეცისა სიხარულსა, აწ ჩუენცა შეგვაწყნარე ყოვლადწმიდასა ღმრთისმშობელსა, რაითა თქმულნი მისნი აღასრულოს, ვითარცა მოწყალემან, და ნუ განაშორებს მეოხებასა სამწყსოსა თვისსა, რამეთუ ვსცოდეთ, გარნა დღეყოველ განვაკუთნებთ სასოებათა ჩუენთა მისა მიმართ და სამწმიდაარსობისა გალობითა ვადიდებთ ღმერთსა:
წმიდაო ღმერთო, წმიდაო ძლიერო, წმიდაო უკვდავო, შეგვიწყალენ ჩვენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
ყოვლადწმიდაო სამებაო, შეგვიწყალენ ჩვენ, უფალო, გვიხსენ და გვილხინე ცოდავათა ჩვენთაგან,მეუფეო, შეგვინდევ უსჯულოებანი ჩვენნი, წმიდაო, მოიხილე და განჰკურნენ უძლურებანი ჩვენნი სახელისა შენისათვის.
უფალო შეგვიწყალენ (3-გზის).
დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
მამაო ჩვენო, რომელი ხარ ცათა შინა, წმიდა იყავნ სახელი შენი, მოვედინ სუფევა შენი, იყავნ ნება შენი, ვითარცა ცათა შინა, ეგრეცა ქვეყანასა ზედა, პური ჩვენი არსობისა მომეც ჩვენ დღეს, და მომიტევენ ჩვენ თანანადებნი ჩვენნი, ვითარცა ჩვენ მივუტევებთ თანამდებთა მათ ჩვენთა და ნუ შემიყვანებ ჩვენ განსაცდელსა, არამედ მიხსენ ჩვენ ბოროტისაგან.
მღვდელმან: რამეთუ შენი არს სუფევა, ძალი და დაიდება, მამისა და ძისა და წმიდისა სულისა, აწ და მარადის და უკუნითი უკუნისამდე.
მგალობელთა: ამინ.
მკითხველმან: მიწყალენ ჩუენ, უფალო, შემიწყალენ ჩვენ, რამეთუ ყოველსავე სიტყვის-მიცემისაგან უღონო ვართ, გარნა ამას ვედრებასა შენ, მეუფისა სახიერისა, ცოდვილნი ესე შევსწირავთ. მიწყალენ ჩუენ, უფალო, შეგვიწყალენ ჩუენ.
დიდება მამასა და ძესა და წმიდასა სულსა.
უფალო, შემიწყალენ ჩუენ, რამეთუ შენ გესავთ, ნუ განმირისხდები ჩუენ ფრიად, და ნუცა მოიხსენებ უსჯულოებათა ჩუენთა, არამედ მოიხილე ჩუენზედა წყალობით, ვითარცა სახიერ ხარ, და გვიხსენ ჩუენ სამართლად რისხვისაგან შენისა, რამეთუ შენ ხარ ღმერთი ჩუენი, და ჩუენ ვართ ერნი შენნი, ყოველნივე ქმნულნი ხელითა შენთანი ვართ და სახელი შენი წოდებულ არს ჩუენზედა, და შემიწყალენ ჩუენ.
აწ და მარადის, და უკუნითი უკუნისამდე, ამინ.
მოწყალების კარი განგვიღე, კურთხეულო ღმრთისმშობელო, რათა, რომელნი ესე შენ გესავთ, არა დავეცნეთ, არამედ განვერნეთ წინააღმდგომთა მტერთაგან, რამეთუ შენ ხარ ცხოვრება ნათესავისა ქრისტიანეთასა.
მცირე მრჩობლი კვერექსი
დიაკონმან: შეგჳწყალენ ჩუენ, ღმერთო, დიდითა წყალობითა შენითა, გევედრებით, ისმინე და შეგჳწყალენ.
მგალობელთა: უფალო, შეგჳწყალენ (3-გზის).
დიაკონმან: მერმეცა გევედრებით, მოწყალებისა, სიცოცხლისა, მშჳდობისა, სიმრთელისა, დღეგრძელობისა, მყუდროებისა, განათლებისა, ცხორებისა, შეწევნისა, შენდობისა და ცოდვათა მოტევებისათჳს ყოველთა შვილთა ჩუენისა ეკლესიისა, რაჲთა დაიცვას უფალმან ღმერთმან ჩუენმან სამეუფოჲ ქალაქი ესე ჩუენი და წმიდაჲ ესე მონასტერი (ანუ ეკლესია) და ყოველი სოფელი სიყმილისაგან, სრჳსა, ძრჳსა, მახჳლისა, ზედა მოსლჳსაგან უცხო თესლთასა და ყოვლისაგან ბოროტისა; რაჲთა მოწყალე გუექმნეს ჩუენ ღმერთი კეთილად დგომისათჳს სახიერებითა და კაცთმოყუარებითა თჳსითა, და გარე წარაქციოს რისხვაჲ, მარადის ჩუენ ზედა მომავალი, და გჳჴსნეს ჩუენ სამართლად ჩუენ ზედა მოწევნულისა რისხვისაგან, და შეგჳწყალნეს ჩუენ.
მგალობელთა: უფალო, შეგჳწყალენ (12-გზის).
მღდელმან: შეისმინე ჩუენი, ღმერთო, მაცხოვარო ჩუენო, სასოო ყოველთა კიდეთა ქუეყანისათაო, და რომელნი არიან ზღუათა შინა შორს და ცასა შინა, და მლხინებელ, და მოწყალე ექმენ შეცოდებათა ჩუენთა, და შეგჳწყალენ ჩუენ, რამეთუ მოწყალე და კაცთმოყუარე ღმერთი ხარ და შენდა დიდებასა აღვავლენთ, მამისა, და ძისა, და წმიდისა სულისა, აწ და მარადის, და უკუნითი უკუნისამდე.
მგალობელთა: ამინ.
დიაკონმან: მუხლმოდრეკით უფლისა მიმართ ვილოცოთ.
მგალობელთა: უფალო, შეგჳწყალენ.
კვერექსის ნაცვლად ერისკაცი იტყვის – უფალო, შეგვიწყალენ 3-გზის. დიდებაი… აწდა…
სავედრებელი ლოცვა
ჰოი, წმიდაო მოციქულთასწორო ქალწულო, პირველმოწამეო თეკლა, ჭეშმარიტო სძალოო ქრისტესო, შუენიერო სამკაულო ეკლესიისაო, მთიებო გონიერისა ცისაო და უბრწყინვალესო მარგარიტო უბიწოებისაო, კეთილსუნნელო ყუავილო სამოთხისა მტილისაო, ტანჯვითა განწმედილო, ღუაწლთა მიერ ყვავილოვან-ქმნილო და მრავალთა სასწაულთა მიერ განბრწყინვებულო რტოო სიწმიდისაო!
ჰოი, წმიდაო, დიდებულო და ყოვლად-ქებულო ქალწულ-მოწამეო თეკლა, ღმერთშემოსილო, ვითარცა ზეცისა სიძისა დაწინდებული, სავანეთა მისთა დამკვიდრებულ ხარ ხუთთა მათ თანა ბრძენთა ქალწულთა, და გვითხოვე აწ ქრისტეს ღმრთისაგან, შეუძრველად დაცვაი ეკლესიისაი, რომელი განაბრწყინვა სისხლითა თვისთა, და ხსნაი ივერიისაი ზედამოსლვათაგან მტერისა და ჭეშმარიტსა სარწმუნოებასა შინა განმტკიცებაი ერისა ჩუენისაი. უფროისად განაძლიერებაი უწმიდესისა და უნეტარესისა, სრულიად საქართველოის კათალიკოს-პატრიარქისა, მცხეთა-თბილისის მთავარეპისკოპოსისა, და ბიჭვინთისა და ცხუმ-აფხაზეთის მიტროპოლიტისა, დიდისა მეუფისა, მამისა ჩუენისა ილიასი, ყოვლადსამღდელოთა მიტროპოლიტთა, მთავარეპისკოპოსთა და ეპისკოპოსთა, პატიოსანთა მღდელთა ქრისტეს მიერ დიაკონთა და ყოველთა სამონაზვნოთა წესთა, ზიართა მართლმადიდებელისა ეკლესიისათა და ყოველთა მართლმორწმუნეთა ქრისტეანეთა.
ჰოი, უპირველესო მოწამეო დედაო ახლისა აღთქუმისაო, მოციქულთასწორო დედაო თეკლა, რომელმან უფროის ყოველთა კეთილთა უფალი შეიყუარე და სახელისათვის მისისა დაითმენდი მრავალთა დევნათა და იწროებათა, აწ გარე-მიაქციე თუალნი ჩუენნი ვნებათა და საცთურთაგან ამა სოფლისათა, რაითა შეუმწიკულებელითა სვინიდისითა მივეახლოთ დაწინდვად ქრისტესა, და აღავსე ლამპარნი ჩუენნი ზეთითა სიწმიდისაისა, რამეთუ მრავალშემცოდენი ვართ, და სიძისა ჩუენისა ქრისტეს მიმართ არცაღა დამმარხველნი ერთგულებისა, ამისთვის დახშულ არს ჩუენთვის კარი საქორწინესა პალატისაი, გარნა ნუ განგვაგდებ შენდა მვედრებელთა, არამედ ვითარცა გულმოწყალემან მეოხმან შეგვმოსე სამოსლითა მტკიცისა სარწმუნოებისაისა, შეგვარტყ სარტყელი სიწმიდისაი, ვნებათა მოკუდინებისაი და სულისა განახლებისაი, უფროისად კი შეამკევ სულნი ჩუენნი სიმდაბლითა და მორჩილებითა, რაითა ვითარცა შვილნი ღმრთისანი და ვითარცა კრავნი და ცხოვარნი ქრისტესნი უბრკოლველად თანა-წარვხდეთ ცდუნებათა უსჯულოისა ამის სოფლისათა და მივეახლოთ სანატრელსა მას პალატსა სამოთხისასა, სადაცა ყოველთა ბრძენთა მათ ქალწულთა თანა წარდგომილ-ხარ წინაშე ქრისტესა, და უგალობთ ღირსად თაყუანისსაცემელსა სახელსა მამისა და ძისა და წმიდისა სულისასა, აწ და მარადის, და უკუნითი უკუნისამდე,
მგალობელთა: ამინ.
დიაკონმან: სიბრძნით! ყოვლადწმიდაო ღმრთისმშობელო, გუაცხოვნენ ჩუენ.
მგალობელთა: უპატიოსნესსა ქერუბიმთასა და აღმატებით უზესთაესსა სერაბინთასა, განუხრწნელად მშობელსა სიტყჳსა ღმრთისასა, მხოლოსა ღმრთისმშობელსა გალობით გადიდებდეთ.
მღდელმან: დიდებაჲ შენდა, ღმერთო ჩუენო, დიდებაჲ შენდა.
მგალობელთა: დიდებაჲ მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
უფალო, შეგჳწყალენ (3-გზის).
სახელითა უფლისათა, უწმიდესო და უნეტარესო მეუფეო გუაკურთხენ.
მღვდელმან: უფალო იესუ ქრისტე, ძეო ღმრთისაო, ლოცვითა ყოვლად წმიდისა დედისა შენისათა, ღირსთა და ღმერთშემოსილთა მამათა ჩვენთათა და ყოველთა წმიდათა შენთათა, შეგვიწყალენ ჩვენ, ამინ.
მგალობელთა: ამინ. უფალო, შეგჳწყალენ (3-გზის).
დიდებაი მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.
უფალო, შეგვიწყალენ (3-გზის),
უფალო, იესუ ქრისტე, ძეო ღმრთისაო, ლოცვითა ყოვლადწმიდისა დედისა შენისაითა, და ყოველთა წმიდათაითა, შეგვიწყალენ ჩუენ, ამინ.
ვაქებთ წმიდასა ცხორებასა შენსა, ჰოი, ყოვლისა კეთილისა შემწეო და წარმმართებელო ყოველთა მვედრებელთა შენთაო, მოციქულთა სწორო დედაო თეკლა, და გევედრებით, რაითა უვნებელად დაგვიცვა სულთა და ხორცთა ვნებისაგან და მოღვაწებრივითა კადნიერებითა წარგვიმართო სასასუფეველისა მიმართ ცათაისა, რაითა უკუნისამდე შენ თანა ვადიდებდეთ ღმერთსა.
შემდგენელი: თინათინ მჭედლიშვილი